Read Nyishi LUK 12 Bible Online

LUK 12 - Nyishi bible

LUK 12

¹Lwwyw lwwyw nyiv lvkin gob hwwt kvlwl doonum, bulv bulug pengko ho caajab-caiyab minsnyinum. Jisu otuqcob mwwg buu tulungam benum, “Parisi tulug opappam hvvminto, hvgdvn si kaak-takdvb gwwlywnam mam hvvmin tvk hvl benum.

²Hognvkam kulub ap pan ham kulub maabjaqb aptayin. Hoqgv luucw-luutam mvvsnam mam cengdwb mvtayin.

³Hoqgab nulv hognvkam xeq kan uralo benum ham huto lo tapa dvb nyitayin, hoqgv wrw uraho nulv hognvkam xeq nyi tulug nyuruho jebs-japeql benum hamnvn nam bootu baaglo sogoql bedwb nyitayin.

⁴“Ngoqg ajin tulu, ngo nulam bedwn gv apongam mengxo kokwngam hog gokam mvnyi deema bo nyi tulungam bos somabv.

⁵Hiyvn bos sodwb nyidwn ham ngo nulam bekin tayin: mengxo kokwngam sux-ywlw gvdab hurlwq dvb ator doogbo Pwnboam nulv bosto, ngo nulam bedwn mwam bosto!

⁶Pvta pwdw dorngam naiya tayin tvqnyi gob puqma dvn yv? Hvbsujaqkam bulug ak nvkam Pwnbov mwwpa maabjaq nyima dvn.

⁷Hvbmabde nulug dumpo dum sooxiam xipwl ap pakun. Hoqgab bos somabv. Nulv pvta pwdw tulungam hilayab xibinamv!

⁸“Ngo nulam bedwn, hiyv lajaqkam nyi mwlw rolu agaho ngam bekin baloqkam Nyia Ko Tuupv kam mwwg gab Pwnbog ao gumtw tulug agaho bekin tayin.

⁹Hvbmabde nyi rolu lo ngam bekin maanboam Nyia Ko Tuupv kam mwam Pwnbog ao gumtw tulug agaho bekin kalam maab haqpaq tayin.

¹⁰Hiyv akgon Nyia Ko Tuupwg ceebiob bebaloqkam mwam kol xaqb axia jitayin, hvbmabde dvrwqbo yalam ceebiob benbo akam kol xaqb axia jidwb nyiram.

¹¹Hwdlo bulv nulam Sinagog nam bvla laat saab tulug hoo ab bokum tulug dookub bool wg baloqkam hog bvxeq nulv atv atam ceetor tayin ho hoggv birwqtayin hoqgab nvl nulv mwwdwq maabv,

¹²Hoggab Dvrwqbo Yalv nulam hoq mood jaqkam tomswr tayin hoggv nul gootayin.”

¹³Nyi acam hoqgv nyi ak mwam benum, “Tomswr bov, ngulam apaq jipe kul sileq kunum ngulug abwg gumnam ngoqg lvgab mvpin sudub no ngoqg vbwngam betbv.”

¹⁴Jisu mwam birwqnum; “Noqg nyi no, hiyv ngam nunyig lvpaho pw-hwwl gumnam mvpin mvra mvdwb mvnum?”

¹⁵Hoqgv mwv bul mwlwngam benum, “Hog mwlw rvvswnam hoqgv atam luucum gvdwl hvvmin minsto, hoggab mwv nyetwb nyisjaqkam naleq baleq gob doosjaqkam nyiig swwnamv mwwg gumnwb nyima dvn.

¹⁶Kokw so Jisu bulam soq doocnam sam benum, “Nyi nyetbo ak dvg alwb swwnbo kedam doognum.

¹⁷Mwv atv atam mwws banv benum, ‘ngoqg dvg mwlwngam ocumko noosu dooma, ngo hoggub mvtayin

¹⁸Mwv atam besnum, ngo soq sam ya nyitayin: ngo noosu tulu sam sapia gvdwl koi aldvb mvtayin hoqgv ngoqg dvg mwlwngam la dvrab pam ocum tayin.

¹⁹Hoo ngo atv ngoqg yvjam betayin, ngoqg yvj, naleqgo vnyw gab dvggam baqp pakun; hoqgab doominto, dvminto, twwminto, hoo jamp pominto!

²⁰Hvbmabde Pwnbov mwam benum, ‘Paca no, soiyig ai jaqso no noqg swwgam apaqdvb nyitayin; hoqnyiloqkam noqg at gab pvvcumnam dvrab tulu si hiyv gab dootayin?’”

²¹Hoo Jisu bitup kunum, “Hiyv Pwnbog gab nyet tvma jaqb hvbmabde at gab ya nyet tvnbo nyi akv soq sib nyidwn.”

²²Kokw so Jisu buu tulungam benum. “Hoqgab ngo nulam betam dvn, turl doodwb hognvkam dvl swwtayin, ho gv gab hognvkam kootayin ham mwwdwq dwqmabv.

²³Hoggab dvnam mam, la vj koonam mam hilayab swwgv alyadwn.

²⁴Poaq tulungam kaaka to, bulv vly liima ho vly naama, bulv noosu gokam dooma ho noosu bvkam bvqlwq maadwn. Hvbsujaqkam Pwnbov bulam dvdwb jidwn. Nulv hog hwdgo pvta tulungam hilayab xinamv!

²⁵Nulug pengko ho hiyv vpjaqkv mwwdwq dwql atwg swwgam wm swlw duur jaqkam mwwg swwgam vbw nyotayin?

²⁶Hoqgab mwlwngam anyo yaabam nulv nyinyi maapel hog buiyu asaq bvrwqgab mwwdwq dwqnyi tayin?

²⁷Mwwka to hog bvxeq nyoro lo opu tulungv swwdwn! Ho at gab vj cuma dvn. Hvbmabde ngo nulam bedwn, lvpw at Solomon kam mwv hwdgo nyet subakam soq opu tulug akgon anyanam hvbkalam hog doog maanum.

²⁸Aaram wm mvramlo hurlwql guxia mvta tanam mam soq sib Pwnbov soolog nyoro wwngam vj koom dvnyiloqkam, hoo mwv nulam vi jaqg vj koomram yv? Nulug mwwjwngv hvkam bvxeq mvneq kocaq dvn!

²⁹“Hoqgab hognvkam dvtayin, hognvkam twwtayin, soq svkam nulv mwwdwq dwqmabv.

³⁰(Hoggab gvda gvt soqg nyob luusaqkv looxiam soq mwlw sam meedwn) Hvbmabde nulug Abv nulam hognvkv xeq nulv nvvnw dvn ham cengdwn.

³¹Hvbmabde otuqcob mwwg lvpwngam nulug swwca lo meeto, hoo hog mwlw ham nulam vbw jitayin.

³²“Nyob luunyo ko nul, bos somabv! Hoggab nulug Abv nulam lvpwngam jidwb pwbwq jaqdo.

³³Nulug hog mwlwngam twngkwb puqgdvl jwwgw tulungam jito. Hogloq nyook ho dvco conbov ogum wnwq nyoma dvn hoqgv topum mvkam dvnyi maadwn hoqhvk ao gvda tolo at gab nywywngam nyimabo nyetam tvl swwto.

³⁴Hoggab hogloq ho nulug twngk noosungv doodwn nulug hangv kam hoqho dootayin.

³⁵“Mwx-mvaqto hog mwlwngv haas jaqkam, bon nyidwb vj koox-koaqto hoo nulug lemp tulungam gudul doomto,

³⁶nyem naal hwrl gol ducum twcumko hoqgv bulug atwg haanam mam kaaya yoodul doonbo nyera hvbjaq nyito. Mwv haal viyap pam cedinl mviyam bulv viyap pam vnwqb kuqko jitayin.

³⁷Bir atv haatayi hvl hvvmin mingl doodwb kaapanam nyera tulungv hemp ponam jaqkv! Ngo nulam jvqtw jaqb bedwn. Mwv bon nyidwb mwwg atwg vjam koox-koaq tayin hoo tebolho bulam doom tvl, mwv haal bulam bon nyijtayin.

³⁸Mwv ai nywywrangam maabnyiloqkam ar komcam haabnv bulam hoq hvbkvda hingkub doodwb kaapa bvnyiloqkam hoq nyi tulungv hvkam bvxeq hemp podwb nyidwn.

³⁹Hoqgv sam mwwgabto! Hwdlo moodam dvco conbov haatayin ham nam at akv ceng nyiloqkam hvvmin mingl mwv dvco conboam mwwg nammam mvkol haam dvb jimab nyikam subaco.

⁴⁰Hoqgv nulvkam hvvmin mingl dooto, hoqgab hogloq moodam nulv mwwpa maab dootayin hoq ditaqngam Nyia Ko Tuupv haatayin.”

⁴¹Pitor benum, “At Sw soq doocnam sam no ngulam yv begdvn ho maalo nyi mwlwngam yv begdvn?”

⁴²At Sw birwqnam, “Ho hiyv yu mwwjw jwwxam bvla mwwlaq saqpaqbo nyerangv? Mood jaqkam atv mwwg nyera tulungam bulug dvnam mam jitak hvl bel apnam ak hv sulak.

⁴³Bir atv nammwb hookur yukam mwwg bonam nyidul doodwb kaapanam nyera ak ham hog hwdgo hemp podwb nyidwn.

⁴⁴Ngo nulam jvqtw jaqb bedwn, atv hoq nyera ak ham mwwg gumn mwlwngam bvvm tayin.

⁴⁵Hvbmabde hoq nyera akv atv atam beswl, ‘Ngoqg bir atwg hvvd moodv hvraqb vijaqg dooxiqdo hoqgv nyera asaqkam nyem ge nyega ge jwwnv dvt-twwtwl twwxum twwiyaql nyirab sunum.

⁴⁶Kokw so aal loog golo hoq nyera akv mwam haai kunup hvl hog mwwpa maab doodu dvk aalam mwwg cengma lvpab dood mood jaqkam mwwg at akv hookur kunv mwam tunyi gob potu to hoo mwwjw maanbo tulug lvgab mwam aptayin.

⁴⁷Mwwg bir atwg mwwnam mam cengdum sutwl kvtaq rvpaqb mwwg mwwkwb nyimab doomin bo nyera akam aoho cwqla maadwb xipwql mvmdvb nyitayin.

⁴⁸Hvbmabde mwwg bir atwg mwwnam mam cengma tvl anyo go hog ak nyibnyiloqkam hoq nyera akam vi yooma go xipwql mvmdvb nyitayin. Hiyvn vigo jinum, mwwg galo vigo naadwb nyitayin, hiyvn lvvt yaag jinum, mwwg galo lvvt yab kodwb nyitayin.

⁴⁹“Ngo swcw sam wm rwlwq taab haanum, hoo hoqham mwx-mvaql pargab kunyiloqkam alyindo!

⁵⁰Ngo baptijum lvgab baptijum ak naadwb doodwn, hoo sam nyima deedib ngo hog hwdgo vs-axaqb nyil mvl dootayin!

⁵¹Ngo swcw sam swrsomalongam jitab haaikun hvl nulv mwwd yv? Ngo nulam bedwn, swrsomalongam maslak hvbmabde mvpin mvra taab.

⁵²Hoqgab sija galoqkv nam gonwg nyi ang-ngwg imiqkv, oum gonv vnyi gonwg ceebiob hoo vnyi gonv oum gonwg ceebiob nyimin sutayin.

⁵³Ko tuupwg ceebiob abv, abwg ceebiob ko tuupv, ko nyem ceebiob annv, annwg ceebiob ko nyemv, aiyv nyeexwngv ceebiob, hoo nyeexwngv aiywg ceebiob nyitayin.”

⁵⁴Hoqgv Jisu nyi tulungam benum, “Doonyi haaga daiyab doomwq ata go hwrca dvb kaapa twqda kalam nulv bedwn, nyodongv hota do hoo kokwngam hoq hvbkalam soq si nyidwn.

⁵⁵Hoqgv svko daiyab dooiyv nvn yidwb henglaq yukam nulv bedwn, ‘ogtayin hvl’ kokwngam hvbkalam nyidwn.

⁵⁶Kaak-takdvb nyinbo tulu, nulv swcw nyodog la doonyi poolwg nyuqtuq-mooram bekin dvb cenglaqtvl hoggub nyitwl nulv soq apog mood sam bekin dvb cengnyi maadwn?

⁵⁷“Hoo hoggab yu nulv atv at gab albo bonam nyidwb mwwma dvn?

⁵⁸Hiyv nyi akgon nam yolu bvrwq bel saab dookub sortab bool wg baloqkam mwwg lvgab lamta ho wjo ywwtwl mwv nam saab agaho sipai alaqb gvqlwqtvl nam pvtwq lwqma daab nam sornbo lvgab twiyw pvvbam padwb hindib nyika to.

⁵⁹Ngo nulam bedwn nulam paqgabl naiya taiyin tvqcw gonkam nulv jima deedib hoggub nyilakam hoq hoqgv nulv lengkram.”