Read Nyishi LUK 13 Bible Online

LUK 13 - Nyishi bible

LUK 13

¹Hoq ditaq lvpa jaqho Pilat hoggab nyi ata go gool doodu dvb Galili nyi tulungam mengnum hoq puiyam Jisun nyi tulungv bekinnum.

²Jisu bulam birwqnum, “Hoqgab Galili nyi tulungam hoqhvb meng gam gab bulv Galili nyi mwlwngam tembo yaab nyimur nyinbo nyi tulungv mwwd yv?

³Ngo nulam bedwn hvvma! Hvbmabde nulv nulug nyimur hoggv mwwkur maabnyiloqkam bulug nyinam kalam hvb nulv mwlwngv sitayin.

⁴Hvbmaba loqkam Siloam hoq doonbo sojangv yaqpia yukho nyi camleq piin go yaqtin tukul sinum. Jerusalemho doonbo nyi mwwjwngam hilayab bulv haajaq jaqb yolu nyinam hvl nulv mwwd nvi yv?

⁵Ngo nulam bedwn, Hvvma! Hvbmabde nulv nulug nyimur hoqgv mwwkur maabaloqkam bulug nyinam hvbkalam nul mwlwngv sitayin.

⁶Kokw so Jisu bulam soq doocnam sam benum, “Nyi akv mwwg roo booluho taoq svvn nwwg liinum, Mwv ho wnv soq aaxiam meenum, hvbmabde pwgkam aaxy kaapa maanum.

⁷Hoqgab mwv mwwg boolu nyiam benum, ‘Kaato vnyw nyium go ngo haabnv soq taoq svvnwg aaxiam meenum hvbmabde pwg jaqkam meepa tukma, sam patab xaato, hoggab yu soq si kedam muiyu gvdo?’

⁸Hvbmabde boolu nyi akv mwam benum, atv soq vnyw nywkin gobta sam doomto, ngo soqg taqg-loosaqb habyeq gvdwl sam swwg mvdwb dealo mwlwqtayin.

⁹Vnyw nywgwn aso svvn si taoq aaxy xeeb nyiloqkam alv, hoq maabnyiloqkam sam no patab xaadwb nyiyi nvpv.’”

¹⁰Doonu dvk aalho Jisu Sinagog nam golo tomswr swrdul doonum.

¹¹Vnyw camleq piin go vc cil doodwb ui mvnam nyem ak hoqho doonum nyem akv hungku ko-gab hoggub nyila kam atv gorabl dindab daqrab nyomanum.

¹²Jisu nyem akam kaapa tvl mwnwn mwwg dookub goqbanv mwnwn benum, “Dvnv, no noqg vc cinam hoqgv al paku!”

¹³Hoqgv nyem mam mwwg alaqkv idaq kalam twqda, mwn dindab daqrab kunv Pwnboam paqknum.

¹⁴Jisu Doonu dvk aalam mwp ko-gab Sinagog nam atv hang lengnum, hoqgab mwv nyi tulungam benum, “Aal loox go bonam nyidwb doodwn; hoqgab hoq aal tuluho haag dvl mwp koto; hvbmabde Doonu dvk aalam ma!”

¹⁵Ho At Sw mwam birwqnum, “Kaak-takdvb nyinbo tulu nulv! Nulug vcw atv Doonu dvk aalam at atwg svv svbam hoo svdam mam nam hoggv boolayil iss twwm taab booma gvd nvi yv?

¹⁶Hoo soq vnyw camleq piin go tapia parnam mam Abraham gv ko hosiqkam doonu dv aalam mwp dvb nyima dvn yv?”

¹⁷Mwwg birwqnamv, ceebio nyi mwlwngam bulam atam hvnyw mvdvb mvnum, hoo nyi rolu bumpwngv mwwg yuuko rooto dvb nyidul doonam mwlw lo hwnyir hvmarnum.

¹⁸Jisu benum, “Pwnbog lvpwngv hoqhvb nyidwn hoq sam ngo hognvk lvgab dooc citayin?

¹⁹Hiyv nyi akgon atwg rongo ywwm aaxy paql liinam hvb nyidwn. Kokw so hv beqrab kunv svvnwb nyil swwknum, hoo pvtangv hoqg haqb tuluho bulug osupam subgwnum. Hoq hvbjaq Pwnbog lvpwngv nyidwn.”

²⁰Lokta Jisu toxnum, “Hognvk lvgab Pwnbog lvpwngam dooc citaq naiyin dvn?

²¹Nyem dvn akgon opappam naanv hucig wtwngam mviyo tvl mwlwngv goobur burtv maady deedib kulubnam hvbkalam soq lvpwngv nyidwn.”

²²Kokw so Jisu bopam vxib la nampam pvmxib tomswr swrl-swrl Jerusalem wnum.

²³Hoqho nyi akgon mwam toxnum, “Tomswrbo, ywwt ywwdnam nyi tulungv anyo gotwq yv?” Jisu bulam birwqnum.

²⁴Yabg goqcwb haadwb nulv alwb ruky-ruito, hoqgab ngo nulam bedwn, vijaqg nyiv haadwb mwwtayin hvbmabde haanyiram.

²⁵Nam at akv gorab laikul viyap pam ciqtumro kokwngam nulv bviywrho daqtwl yabgam jwwdinl bebnyiloqkam, Tomswrbo, ngulam viyap pam ciqko tvb, mwv nulam birwqtayin, ‘Nulam ngo cengka ma nulv hogloqkv haanya yin.’

²⁶Ho nulv birwq dvb mwwtayin, ‘Ngulv noqg kaagaho dvnya twwnya tukun, hoqgv no ngulug nampamg lvmbwq hoolak tomswr swrnum!

²⁷Hvbmabde mwv lokta nulam betayin, hogloq gvda hoggv haanya yin? Nyic-nyia bonam nyinbo tulungv ngoqg ogum soqgv wleqto!’

²⁸Nulv Abraham, Aisak, Jakub nvla nyiqry benbo mwlwngam Pwnbog lvpwho doodwb hvbmabde atam atv bviywrho doodwb kaapanum. Hoqho xabnam mvla exy dvxeqnamv dootayin!

²⁹Dou-caga gvla haaga, nyoodum gvla nyooko hoqgv nyi tulungv haalayil Pwnbog lvpw tebol lo dvbam twwbam tayin.

³⁰Hoo kaato, sijag kokw ho doon bov otuq yaab dootayin, hoo sijag otuqho doonbo tulungv kokw yaab dootayin.”

³¹Hoq ditaq lvpaho Parisi ata go haabanv Jisun benum, “No soqgv lengdvl hog golo wggin dvb nyido, hoggab Herod nam mengta do.”

³²Jisu bulam birwqnum, “Nulv wgdvl siyalam bekin ta: ‘Ngo sool la aarmnvn ui tulungam ruqxa xoodu dvn hoo vc apybo tulungam mwp pudu dvn, hoqgv aal loum deenam ngoqg bonam ngo nyiyum tayin.’

³³Hvbsujaqkam sool-aram nvla relon ngo nyoyw wdul doodwb nyiky yinpv, Jerusalem mam bepa maab hoglo jaqkam nyiqry kaanbo akgon mengdwb nyiram.

³⁴Jerusalem ma Jerusalem ma! Ho nyiqry benbo tulungam mengdwb hoqgv no Pwnbog noqgab kanam tvl pui baqnboam no wlw hurx do! Poroq roqnv mwwg pocu tulungam alap uraho lobyum doognam hvbkalam ngo kam noqg ko tulungam hog hwdgo lobyum doog dvb mwwnum, hvbmabde nulv sam ngam nyidwb jimanum!

³⁵Kaato, sija nulug nammam ludum dumtw gvikun. Ngo nulam bedwn At Swg emin gab haanbo akam Pwnbov lvqc cito, hvl bed moodv haama deedib nulv ngam kaapa kuram.’”