Read Nyishi LUK 14 Bible Online

LUK 14 - Nyishi bible

LUK 14

¹Doonu dvk aal golo Jisu Parisi tulug Koibo akgonwg namho dvnam dvtab haaikam nyi tulungv Jisun rodul doonum.

²All alaqngv goonbo nyi ak Jisug dookub haanum.

³Jisu Pvvb tomswrbo nyi tulungam la Parisi tulungam benum, “Ngulug Pvvbv Doonu dvk aalam mwp dvb dood nvi yv ma dooma dvn?”

⁴Hvbmabde bulv agam gamgkam birwq maanum. Ho Jisu nyi akam nootunum, mwam mwpnum, hoo kanam kunum.

⁵Kokw so mwv bulam benum, “Nulug ko tuupv maalo svv hvvbv iss sokum urab Doonu dvk aalam holwq baloqkam, mwam Doonu dvk aal kujaqkam nyebia alwb pulin ram yv?”

⁶Hvbmabde bulv mwwg toxnam mam birwq maanum.

⁷Nyiin ata go mwlwngam dook alboam xuqdunam mam Jisu kaapa tvl mwv hoqgab soq doocnam sam bul mwlwngam bekinnum,

⁸“Hiyv akgon nulam nyem naal durum kob dogoq goqba nyiloqkam, dook albo ho doomab. Hoggab hiyv cengdwn nam hilayab koi yaanbo nyiam kam dogoq goqkam supa yv,

⁹Kokwngam nunyi vnyiam dogoq goqnbo akv haalayil nam bvkam suiyv, ‘Mwam soq dook sam jito.’ Ho no hvnyw layil ked haty ho doodwb nyitayin.

¹⁰Hvbmabde nam dogoq goqi nyiloqkam, wgdvl ked haty ho dooto, hoo nam dogoq goqnbo akv haabnv nam bei nvp, ‘Ajinv odumg dook yaab caan.’ Ho noqg lvgab dooba nyanbo nyiin mwlwg agaho nam xidwb nyitayin.

¹¹Hoqgab hiyv atam atv ab bokum algob mwwsbo akam anyo kocaqdvb mvtayin, hoo hiyv atam atv anyo kocaq gob mwwsbo akam ab bokum algob mvtayin.”

¹²Kokw so Jisu mwam dogoq goqnbo akam benum, “Sool lvpag maalo ariyumg okum amaqkam, noqg ajin tulungam, ho noqg vbw-bor tulungam, ho noqg nyiin-orum tulungam ho gutu-gorag nyetbo nyi tulu ngamkam dogoq goqmabv hoggab hiyv cengdwn bulv kam nam dogoq goqlwq kalam tai hoo no dwlwq kalam gvdwb nyis yico.

¹³Hvbmabde no okum amaq nyib nyiloqkam jwwgw tulungam, hungku bo tulungam, lvca bo tulungam, nyiqca bo tulungam dogoq goqto.

¹⁴Ho bulv nulam dogoq goqlwql dwlwq gvnyiram ho no hemp poky dvb nyitayin hoqgab albo nyi tulungam sig hoqgv turkur dvb mvikam Pwnbov nam kam dogoq goqlwq kalam tayin.”

¹⁵Tebol hoq doonbo nyi akwn sam tatwl Jisun benum, “Hiyv Pwnbog lvpwlo dvnam dvdy bo hvvjaq molo hemp podynam jaqkv!”

¹⁶Jisu mwam benum, “Nyi ak durum poot alwb durum ak rumnum, mwv nyiv vijaqg dogoq goqnum.

¹⁷Kokw so durum dvd moodv haaikukam mwv mwwg nyera akwn benv mwwg dogoq goqnam nyi tulungam bemnum, hoocum nyatku, ho mwlwngam sija mwx-mvaq pakun!

¹⁸Ho mwlw jaqkv lvkin gob akwn kokwb akwn axia tvbwk hvl xumrabnum. Otuq akv nyera akam benum. Ngo svpa—rongo rwqg rvpen, hoqgab ngo ham kaatab wdeen anya mwwpa gvdwl ngoqg xuml benum sam tatbv.

¹⁹Akwn kalam benum, “Ngo svv dorngo rvpen, hoqgab bulam ngo mvka nata deen, anya mwwpa gvdwl ngoqg xuml benam sam tatbv.’

²⁰Akwn kuiyiq benum, ‘Ngo nyem ak naada tvl doodwn, hoqgab ngo haanyiram.’

²¹Hoq nyera akv wkur banv mwwg atam soq pui sam mwlwngam bekinnum. Ho nam at akv hang lengnv mwwg nyera akam benum, ‘No vnwqb pamda vlib lengdvl jwwgwbo tulungam, hungku bo tulungam, nyiqca bo tulungam la lvca bo tulungam soqb boa ta.’

²²Kokw so hoq nyera akv benum, Atv noqg gaml jikjaqb nyipa kun, hvbmabde hvraqb dookv vigo dooxiq do.

²³Hoqgab At akv nyera akam benum, vly paada bvla vly baanyob lengdwl ngoqg nammam bwwr mvdwb nyi tulungam haam dvb goqta.

²⁴Hoqgab ngo nulam bedwn, soq dogoq goqnam nyi tulug akgon kam ngoqg okum hoq dvsam dvla deema!’”

²⁵Kokw so doolwg nyi pvtw go Jisug lvgab wmin gvnum mwv nyikur banv bulam benum,

²⁶“Atwg abam, atwg annam, atwg nywxwngam, atwg koam, atwg vbw mwlwngam atam kam hog hvvtw maadwn hvl mwwma deedib hiyvkam ngoqg dookub haanbov ngoqg buub swwnyiram.

²⁷Hiyvkam mwwg atwg daapongam jool ngoqg kokwb wma baloqkam ngoqg buub swwnyiram.

²⁸Nulug pengko ho hiyv nyiv nam mvdwb mwwb nyiloqkam otuqcob doal; hog hwdwg hiqdwb nyitayin hoqgv ham mvnya naadwb twngk dood nvi yv dooma dvn ham kaadwb nyidwn.

²⁹Nam doopiam mvxo kokwngam mwv nammam mvlin nyomab nyib nyiloqkam, hiyv cengdwn kaaya bo nyi tulungv mwam nyirnyi-nyirya dvn.

³⁰Bulv betayin, ‘Soq nyi ak si nammam mvrab aptvl mvnya nyokma!’

³¹Ho lvpw at asaq lvgab lvpw at ak nyob patab wrab yin lwwyw lwng sipai tulungam bool wg layil lwwyw camnyi sipai tulungam nyob pvrwq dvb nyita yin yv ma nyiram, otuqcob dool sam hoggub jaq mvtayin ham mwwdy maanbo lvpw at hiyv doodwn?

³²Mwv nyob pvrwq nyoma baloqkam, mwv daaxar xarnbo kanam nvmlwqtvl swrsomalo jaqb twiyw padwb toxtayin.

³³Hoq hvbkalam, Jisu bitup kunum, “Nulug pengko lo hiyvkam mwwg hog mwlwngam ludum dumnya maad deedib mwv ngoqg buub swwnyiram.

³⁴“Alv alsudwn, hvbmabde alv atv atwg tiinam mam niim baloqkam hoggv sam tiikur dukub mvnnan dookma.

³⁵Ked gab si yaajaqkam al kamadvn, ho nwmw nwsin gabkam alkuma, hoqgab sam hurpaq gvdkun. Tagabto, hiyv nyuru gvdwn hv tato!”