Read Nyishi LUK 16 Bible Online

LUK 16 - Nyishi bible

LUK 16

¹Jisu mwwg buu tulungam benum, “Mwwg gumnam kaaya mvdwb nyetbo nyi akv kaaya bo ak doognum hoq nyet akam mwwg twngkam kaaya bov sooxia gvdwk hvl sornum.

²Mwv mwam goqa banv benum, ‘Noqg bvrwqkam ngo soq sib tapa gvdwn? Ngoqg gumnam noqg bvvnam hvdam jopwb hwwg dukul jipe kub, hoqgv no ngoqg kaaya bob doonyi kuram.

³Hoo kaaya bo akv atv atam benum, ngoqg atv ngam bon hoqgv apaq mvdwb beg yuku ho ngo hoggub nyita yukun? Ked habdwb ngoqg ator dookma, hoo kogaq dvb hvnyw mwwpa do.

⁴Ngam ngoqg bon hoqgv apaq yukam, nyi tulungv bulug namlo ngam lookam twqto hoqgab ngo hogam nyitayin, ham sija ngo ceng paku.’

⁵Hoqgab mwv mwwg at galo ceenyiabo tulungam goqa banv otuq akam toxnum, no ngoqg atam hog hwdgo jisv doodwn? Kaaiya bo akv benum,

⁶‘Olib kuty uppum lwwg jisv doodo.’ Kaaiya bo akv mwam benum, noqg xeqpwl apnam potangam naag dvl vnwqb doog dvl camng go hvl xeqto.’

⁷Ho mwv asaq akgon benum, ‘No hog hwdgo jisv doodwn?’ Mwv benum, ‘Wtw am igin lwwg. Ho mwv mwam benum, ‘Noqg xeqpnam potangam naag dvl campiin gob xeqto.’

⁸Ho mwwgw maadwb nyinbo kaaya bo akv niqtuq dooma dvb nyigam gab, mwwg atv mwam paqnum, hoqgab soq gvda soq nyi tulungv huto nyi tulungam hilayab nyixiaq dvn.”

⁹Hoo hvraqb Jisu benum, “Ngo nulam bedwn, nulug nyet swwnam lvgab nyet loq nulug at gab ajin jinto, soq sib nulug nyet swwnamv wnya yukun nulam nwrba cwtam swwgwg namho albv haato hvl loorwq tayin.

¹⁰Hiyv vcwr ko bvvnamho mwwjw dvb nyibaloqkam koi alwb bvvnam mam kam mwwjw dvb nyitayin hoo hiyv vcwr ko bvvnamho mwwjw dvb nyima dvn koi alwb bvvnamho kam mwwjw dvb nyiram.

¹¹Hoqgab nulv gvdag gumnam hindib mwwjwl bvvma baloqkam nulam jvqtw nyet loodangam hiyv mwwjw dvb nyitayin?

¹²Hoo nyi gumnam bvvm dvb jinam ho mwwjw dvb nyima nyiloqkam hiyv nulam nulug atv gumnam alaqho gvqlwq jitayin?

¹³“Hiyvg nyerangv at vnyig nyerab swwnyiram hoggab mwv akwn mwwiyum yumxia tayin hoo akwn ham aby botayin, hoo mwv akwn doog twqtwl akwn ham apaq xaatayin. Nulv Pwnboam la nyetam vnyi bwbwngam nyijiq nyoram.”

¹⁴Hog mwlwngam tanya tvl twngk abybo Parisi tulungv mwam nyirnyi-nyiryanum, bulv twngkam abynum.

¹⁵Jisu bulam benum, “Nulv lak nyi tulug agalo atam atv nyedar yaagub kaakin bo nyi tulungv, hvbsujaqkam Pwnbov nulug hangam cengdwn. Hoggab hognvkam nyiv xitor torlw yaagub xigdvn hv Pwnbog kaagalo hog hvvtw bvkam nyima dvn.

¹⁶“Mojes pvvb la nyiqry benbo tulug xeqnamv Jon Baptist swwcanam xaqb niqtuq doonum, hoq jaqgv Pwnbog lvpwg Tugu Puiyam betam pakun, Hoo vcw atv raijaqb hoq urab haadwn.

¹⁷Hvbmabde Pvvb lo xeqpwl apnam vcwr pajaq gokam yuumam lingsam doonyi poolv la swcw nyodongv wleqnamv alyadwn.

¹⁸Hiyv nyi atwg nywxwngam apaqpel nyem asaqkam nyem naab nyiloqkam mwv nyiig nywxwngam nyireq dvn, hoo nyega axanam nyem mam naanbo nyi ak nyiig nywxwngam nyireqbo hvb nyidwn.

¹⁹“Nyetbo nyi ak doonum, mwv mwlwngam alyanbo vjam kootwl dvp twwiyin alwb dvl-twwl looxiam nyeram yaagub nyil swwnum.

²⁰Gv dorpw lo un-tar rooxob gvnbo Lajarvk hvl benam nyi jwwgwbo ak hv mwwg viyap yabg ho doonum,

²¹Mwv hoq nyet nyiig tebol hoqgv yoql bo vcin cincwr tulungam dvl hang xumtws mwwnum, hoqgv iky tulungv haabnv mwwg unnam yaqxaqnum.

²²Jwwgwbo nyi akv siknum hoo mwam ao gumtwngv ao lvpwb Abraham gv dvmin-twwminko ho baqpnum. Nyet nyi akv kam siknum hoo mwam svma liiknum.

²³Hvbmabde ig-oram gvdaho mwv hentwr lwwywngam hindu tvl kaanv aado ho Abraham Lajarasnvn mwwg haabo ho doog dvb kaapanum.

²⁴Hoqgab mwv mwam goqnv benum, ‘Ab Abraham ngam anya mwwpa gvdwl Lajarg lvqcw niqtuqho ngam isslo nyiabam tvl ngoqg lyol sam xwql gvdwl xwqyaq mvdwb mwam soqb kanam tvb, hoggab soq wm moily so ngo hentwr hindu dvn.’

²⁵Hvbmabde Abraham benum, ‘Ngoqg ko tuupv mwwgab tvka, noqg swwca de aalho no jamp jaqb swwnum, hoq hvbkalam Lajaras hentwr henl swwnum hvbmabde noqg hentwr henl dooikam mwv sija so jamp pominl doomin dvn.

²⁶Sam betlakam ngul gvla noqg lvpaho pakam koi albo kamg mvpnamv doodwn, hiyvkam soqgv noqg dookub rabdwb mwwnbo tulungv hoq kvtinho rabnyiram hoqgv hiyvkam aloqgv ngulug dook kvtin so rabnyiram.

²⁷Nyetbo nyi akv benum, hvbnyiloqkam ab nam ngo mvnyi-moiyul bedwn,

²⁸ngoqg borv ang-go doodwn bulam soq hentwr henk gvda so haam mvmadvb bulam bidil bekin mvdwb Lajarasnvn ngoqg abwg nammwb kanam nvmlwq tvb.’

²⁹Hvbmabde Abraham benum, ‘Bulam bidil bekin mvdwb noqg bor tulungv Mojes nvla nyiqry benbo tulungam doog gvdwn, bulv hog hvla xeq bedwn ham noqg bor tulungam tamto.’

³⁰Nyetbo nyi akv birwqnum. ‘Hvb maas lak Ab Abraham! Hvbmabde sinbo tulu hoqgv hiyv akgon gorabl bulug dookub wb nyiloqkam hoomo lo bulug nyic nyia hoqgv mwwkur tayin.’

³¹Hvbmabde Abraham birwqnum, ‘Bulv Mojes gvla nyiqry benbo tulug agam mam tama baloqkam, sinbo tulug pengko hoqgv hiyv gorab sujaqkam bulv tvjw ram.’”