Read Nyishi LUK 17 Bible Online

LUK 17 - Nyishi bible

LUK 17

¹Jisu mwwg buu tulungam benum, “Nyi tulungam nyic nyia nyig wgbo tulungv nyiky dvb doodwn hvbmabde bulam hvb nyimdvb jiya bo nyi akgab hvkam bvxeq hentwr jaqkv!

²Soq nyi si soq anyo tulug ak yaiya gon nyic nyia nyimdvb jimmam lingsam mwwg lwwpo ho wlw lo dembaq tvl sa-svlo urab hurlwq hindwn.

³Nulv atv atam hvvmin suto! Noqg borv nyic nyia nyid nyiloqkam mwam yolu ruqto, hoqgv mwv mwwkur baloqkam mwam kol xaqb axia jitku.

⁴Aal lookinam mwv noqg ceebiob kvn gob nyic nyia nyibaloqkam, hoqgv lwx-ceram mwv noqg dookub haal ngo mwwkur dukun hvl bebaloqkam no mwam kol xaqb axia jidkub nyidwn.

⁵Hvvky tulungv At Swn benum, “Ngulug mwwjwngam koi yaadwb mvtwb.”

⁶At Sw birwqnum, “Ywwm aaxy hwdgokam nulug mwwjwngv koi baloqkam nulv soq malbari svvn sam, no atv busuq gvdwl buuxa to hvbnyiloqkam hoqhv nulug gaml jikub tatayin.

⁷“Nulug pengko ho hiyv akgon hvl benbo doomanyiloqkam sviya rvkybo nyera akam mwv rongo hoqgv haada kalam, no hvl bed nvi yv, vnwqb haagdvl noqg dvnam mam dvla?

⁸Hvbmabde mwv mwam hvl ya betayin, vjlo hingkib kootwl ngoqg dvs-twwsam mwx-mvaql ngam kaaya yaal dooiya to, hoq kokwngam no noqg dvs-twwsam dvt-twwto.

⁹Mwwg gamlam tagam gab mwv nyerangam paqyalinco paqd nvi yv?

¹⁰Soq luukin si nulug lvgab doodwn hwdlo nulv hog mwlwngv nyibam yukam nulam hoqhvb betwk hvl bekinnum, ‘Ngulv hog hvvtw-pvbw maanbo nyerangv, ngulv ngulug bonam nyitkun.’”

¹¹Kokw so Jerusalem daiyab wikam Jisu Samariya gvla Galilig lvpa jaqb wnum.

¹²Hoqho mwv nampam pamg golo haanum, ho tviyiq nyinbo nyi wyw taqtgo mwam wrwqnum, bulv doqtu tvl,

¹³Sogoqnum, “Jisu Bir ata! Ngulam anya mwwpa tvb!”

¹⁴Jisu bulam kaapa tvl benum, “Wgdvl nyub tulungam nulam kvvdy kota.” Lamtaho wdul doodu dvkho bulug vcv alkunum.

¹⁵Bulug akwn mwam aldvb mwp kunam mam kaapa tvl wkur kunum, Pwnboam vcjaqb paqnum.

¹⁶Mwv atv Jisug lvpia lwkw kedho maajo tvl mwam paqnum, hoq nyi akv samariya nyiv.

¹⁷Jisu benum, “Nyi wyw taqtam mwp tukun, kiya gon hoglo yu?

¹⁸Hoggab yu soq nyoodo nyi akin ciqnyi si Pwnboam paqtab wkurnum?”

¹⁹Jisu mwam benum, “Gorab gvdkul wnku; noqg mwwjwngv nam al dukub mwp pakun.”

²⁰Parisi ata go Pwnbog lvpw-hativ hwdlo haatayin hvl Jisun toxnum, Mwwg birwqnamv, “Pwnbog lvpw-hativ kaapa dvb haaram sulak!

²¹Hiyvkam beram, kaato, siilak!’ ho vlak! Hvbmabde Pwnbog lvpw-hativ nulug pengko lo doodwn.”

²²Kokw so mwv buu tulungam benum, “Aal golo nulv Nyia Ko Tuupwg aal loog gon kaapa dvb mwwby tayin, hvbmabde nulv sam kaapa nyoram.

²³Hoo kaato, vlak doodwn!’ ho ‘Kaato, siilak doodwn!’ Hoqhvb beikam ham kaatab bulug lvgab wmabv.

²⁴Taiyamv doonyi-pool taqc gon hoqgv bioqlin yukam doonyi poolwg taqc gon kalam hutongv jardaq dvn, Nyia Ko Tuupv kam, mwwg aalam hoq hvbkalam nyitayin.

²⁵Hvbmabde otuqcob mwv hentwr henl soq hotam soqg nyi tulungv haqxia yinpv.

²⁶Noag swwca de mood ho nyinam hvbkalam nyi Ko Tuupwg aalv kam hoqhvb nyitayin.

²⁷Nyi mwlwngv dudul twwdul hoo nyem nyega noodu nyanum hwdlo Noa hulu urab haaknum hoo bulam diidwr issiv toa kunv bulam twrknum.

²⁸Soq si Lotwg swwca de moodho nyinam hvbkalam nyitayin. Nyiicw-nyiitv dvmin-twwminl, rvmin-puqminl, vly liiminl hoo namlo poodu nyanum.

²⁹Hvbmabde Sodom hoqgv Lot lengd aal lookin twqda ho doa tologv wmv la gubiaqbo nyodongv hol kunv mwlwngam twryum kunum.

³⁰Hoq hvbkalam Nyia Ko Tuupwg aalam kaapa yukam nyitayin.

³¹“Hoq aalam hiyvkam mwwg nam lvvglo doon bov mwwg dvrab pam naatab mwwg nam urab haanyiram, hoqgv hoq hvbkalam hiyvkam rongolo yvnbov nammwb wkur lakram.

³²Lotwg nywxwngam mwwpato.

³³Hiyvkam atwg swwgam ywwt ywwdwb mwwd nyiloqkam mwv sam nyim tayin, hvbmabde hiyvkam atwg swwgam niimbov ham ywwt ywwtayin.

³⁴Ngo nulam bedwn hoq aiyam nyi vnyi go kark akin hoq lvkin gob yubk boam, akwn naal wgtayin, akwn apaqtayin.

³⁵Nyem vnyi go lvkin gob dux xudul yvyi nyiloqkam akwn naal wgtvl akwn apaqtayin.

³⁶Nyi vnyi go lvkin gob rongo ho yvi nyiloqkam akwn naal wgtvl akwn apaqtayin.

³⁷Buu tulungv mwam toxnum, “Hoglo yu At Sw?” Jisu birwqnum, “Hogloq ho svmangv doodwn hoqho poaqkv pumkum tayin.”