Read Nyishi LUK 19 Bible Online

LUK 19 - Nyishi bible

LUK 19

¹Kokw so Jisu Jerikob haabnv hoq gora lvpajaqb wdul doonum.

²Hoqho Jakiyasvk hvl benam gvda nyooga kokar bo saab ak doonum. Mwv nyetnum

³Mwv Jisun hiyv yu mwwl kaadwb mwwnum, hvbmabde mwv otu ama bo nyiib nyinum, hoqgv nyi rolungv mvqlw ko-gab mwv Jisun kaapa nyomanum.

⁴Hvb nyigam gab mwv Jisun kaadwb mwwl nyi tulug wgab otuqb xarco banv taoq svvn golo geecal dooiyanum.

⁵Kokw so Jisu hoq lamta agarho wnwq yukam koodul kaapa tvl Jakiyasnvn benum, “Jakiyas soolo ngo noqg namho dootayin, hoqgab vnwqb geepoq tuk.”

⁶Jakiyas vnwqb geepoq kunv mwam ocuqpaqlaq kunv svgagvrwqnum.

⁷Sam kaanbo nyi tulungv budum-bvram berab nyanum, soq nyi si nyic nyia nyinbo nyi akwg nammwb nyiin wnkun!

⁸Jakiyas daqrab banv, At Swn benum, “Tomswrbo, taiya to! Ngo ngoqg swwnam gumn pacgon jwwgwbo nyi tulungam jikur tayin, hoo ngo hiyv akgon galoq bibum wbuml hog ak naapa kunyiloqkam ngo ham mwam tompy yaago jikur taikun.

⁹Jisu mwam birwqnum, Soolog aal so nyedarnamv soq nammwb haapa ku, soq nyi ak siikam Abraham gv ko hosiqkv,

¹⁰Hoggab Nyia Ko Tuupv nyiin boam meegaql meepal ywwt ywwtab haanum.”

¹¹Hoqho nyi tulungv soq benam tulu sam tal doonum, mwv Jerusalem ogumho wnwq yukam hoqho bulv Pwnbog lvpwngam vnwqb oyu maadab haata ywk hvl mwwnyianum.

¹²Hoqgab mwv benum, “Xinam nyi ak lvpw atwb mvklayil nammwb hookur dukub gvda aado golo wnum.

¹³Mwwg wma daab mwv mwwg nyera wyw go goqkum banv bulam vcw atam hun twngk hoq borsaq twqb jinv bulam benum, ‘kaato, ngo wleq deeso nulv soq lvgab mwwjwr jwrg dvl kor mvnya ya.’

¹⁴Hvbmabde, mwwg at gvda nyi tulungv mwam mwwiyum yumxianum, hoqgab daaxar xarnbo tulungam kanam nvmlwq banv benum, ‘Ngulv soq nyi aksam ngulug atwb swwmram.’

¹⁵Hvbmabde xinam nyi akam lvpw atwb mvknum. Mwv wkur yukam twngk jinam nyera tulungv bulv hog hwdgo mwwjwr jwrknum ham cengdwb hookum mvdwb gaml jinum.

¹⁶Ho otuq akv haabnv benum, ‘At Sw, ngo noqg ngam twngk jinam bar lvgab ngo hun twngk bvrywgo mwwjwr jwrlin pakun.’

¹⁷Hoo mwv mwam benum, ‘Vjaq bo, no albo nyera gonyi! Mvneqko lo mwwjw jwwl nyigam gab bopam pvmyw go ngo nam kaaya mvdwb aptayin.’

¹⁸Hoq kokwb nyera vnyi deen akv haabnv benum, ‘At Sw, no ngam jinam bar lvgab ngo hun twngk barg go mwwjwr jwrlin pakun.’

¹⁹Mwv soq aksam benum, ‘Nam bopam pamngo doog mvtayin.’

²⁰Hoqgv nyera akgon haabnv benum, ‘At Sw, soq si noqg hun twngkam ngo vj tona golo kvsil puucwl apnum, no vdw albo nyiib nyigam gab.

²¹Ngo bosnum, noqg ap maanam mam no naadwn, hoqgv noqg liimanam mam no naadwn.’

²²Mwv mwam benum, ‘No almanbo nyera go! Noqg atwg agam lvgab ngo nam pw-hwwtayin! Ngo vdwbo nyi gonyi, hognvkam ngoqg naady maanam ham ngo naadwn hoqgv hognvkam ngo liimanum ham ngo naadwn, ham nyi no cengdwn.

²³Vv, hoq nyiloqkam, hog nyitwl no ngoqg twngkam nvn twngk noosu lo ap maanum? Ham nyinam gonyiloqkam, ngo nookur yukam laqbaqkam naataql ngo sam nookur kams paco.’

²⁴Hoo ogumho doonbo nyi tulungam benum, ‘Mwwg galo hun twngk baram naagdvl bvrywgo doogbo nyera akam jito.’

²⁵Bulv mwam benum, ‘At Sw, mwv twngk bvrywgo doog paku!’

²⁶‘Ngo nulam bedwn, ‘Hiyv vigo doodwn mwam vi yaab jibwtayin, hvl mwv birwqnum. Hvbmabde hiyv dooma dvn mwwg galo vcir doonam mam naareq dvb nyitayin.

²⁷Hvbmabde sija, ngoqg ceebio tulungam hiyv bulug aoho ngam lvpw at gob swwm ramwk hvl benbo tulungam soqb boa gvdwl ngoqg kaaga so bulam mengto!’”

²⁸Sam bexo kokw so Jisu bulug otuqyab Jerusalemb wdul dooknum.

²⁹Kokw so Olib ngvk hvl benam yorn ogumho doonbo Betpagiv la Betaniho mwv wnwq yukam mwv soq benam sam bilwq banv mwwg otuqyab buu vnyi gon kanam nvmlwqnum,

³⁰haabo poqtaq daiyag nampamb nulv wgdvl, hoq urab haaikam nywywngam nyi caol wka maanam svdam ak rwwtul apnam mam kaapa yin pv ham poqsuq gvdwl soqb boal haagta.

³¹Hoqgv sam hoggab poqsuq gviyin hvl hiyv akgon nulam tox bvnyiloqkam mwam bekinto, ‘Nyiit at sam nyinsv ak doodo hvta.”

³²Ho kanamnam nyi tulungv wknv bulam Jisug bekjaqb kaqxab bulv hog mwlwngam kaapa kunum.

³³Bulv svdam koam poqsu yukam hoqg at tulungv bulam toxnum, “Hoggab sam nulv poqsuq gvdwn?”

³⁴Bulv birwqnum, “Nyiit at sam nyinsv ak doodo.”

³⁵Hoqgv svdam koam Jisug dookub boanum. Kokw so bulv at atwg vjam svdam aoho puup jitwl hoq aoho Jisun doomnum.

³⁶Hoo mwv wdul doonum, ho bulv bulug vjam lamtaho puup jinum.

³⁷Kokw so Jerusalemwg ogum wnwq yukam Olib yorn ao hoqgv ipoqko agarho mwwg buu mwlwjaqkv mwwg nyima vrr jaqb koi alwb nyis tulungam nyinam mam kaanbo nyi tulungv bulv vc alwb Pwnboam paqrabnv hemp ponum,

³⁸begamv, “At Swg eminlo haanbo lvpw atv molo lvqc cinam jaqkv! Ao gvdag swrsomalongv la yuunamv Pwnbo gab dooky nvka!”

³⁹Hoo nyi rolug pengko hoqgv Parisi ata go bulv Jisun benum, “Tomswrbo, noqg buu tulungam cooikab dootwk hvl yolu ruqto!”

⁴⁰Jisu birwqnum, “Ngo nulam bedwn, bulv cooikab doob nyiloqkam, soq wlw tulu si atv atv sogoq goqrab tayin.”

⁴¹Kokw so mwv ogum wnwqnv bopam mam kaapa tvl hoq gab xabnv benum,

⁴²“Swrsomalo gab hognvkv doodwn ham sool cengnam gonyiloqkam alpa! Hvbmabde sija no sam kaapa nyokram!

⁴³Hoqgab noqg nyemaq tulungv taqg-loosaqb gurum nwqtum tvl hwwiyiql nam doqtuml apdvk moodv haatayin.

⁴⁴Pwnbov haal ywwt goor ywwtab haanam moodam no cengmako gab bulv nam jopwb twryum tayin, hoqgv noqg sulu uraho doonbo wlw pwg jijaqkam bulv soq dook so apaq jiram.”

⁴⁵Jisu Xumk nam urab haabnv hoqho puqdul doonbo nyi tulungam bviywrb ruqlin xaanum.

⁴⁶Bulam benum, “Xeqpwl apnam dvrwqbo potalo Pwnbov bedwn, ‘Ngoqg nammam swgw gwwkumko namlongvk hvl bedwb nyitayin.’ Hvbmabde nulv ham dvco conbo nyi tulug lwwpwq yaab mukub paku!’

⁴⁷Aal looxiam Jisu Xumk nam uraho tomswrnum. Nyub buda tulungv la pvvb tomswrbo tulungv hoo xilo bo nyi tulungv mwam mengdwb mwwnum,

⁴⁸Hvbmabde nyi mwlwngv mwwg benam mam tagab jinjin tal doogam gab hog bvxeq nyitayin ham bulv hendar maab nyinum.