Read Nyishi LUK 2 Bible Online

LUK 2 - Nyishi bible

LUK 2

¹Hoq apoho nyiam xil apdvb hvbnv at atwg eminam xeql jitwk hvl mwwg lvpwho nyi tulungam Agastas lvpwg bir at akv gaml jilinum.

²Siriya gvdag laat saab Kuiriniyas swwca duk hoolak nyiingam xit xilub xikanum.

³Ho nyiicw-nyiitv atam emin xeqtab at atwg nampamb wnum.

⁴Galili gvdaho doonbo Najaret nampam hoqgv Josap Debid lvpw at ko bwwk Judiya gvdag Betleham nampamb wnum. Josap Debidg ko hosib nyigam gab hoq nampamb wnum.

⁵Mwv atv atam emin xeqktab mwwg nyem begaqnam Meerinvn wgnum. Nyem akv ko gvnum.

⁶Kokw so bulv Betlehamho dooikam mwwg ko bwwd moodv haaknum.

⁷Nyiin namho bul gab yubk dooma ko-gab, nyem akv mwnwg Ko Tuup vbw coociqngam ko bwwnum, mwam dokum uraho karmtvl vjv pomlubnum.

⁸Hoqho hoq gvdag sviya rvkybo tulungv at atwg sviya pvtwngam ai yupw svpa pataq golo rvkil doonum.

⁹Haqmapaq golo At Swg ao gumtw akv haabnv bulug ogumho daqnum, hoqgv At Swg yuunamv bulam hulub apnum. Bulv bosil tvmdwr hwqnum.

¹⁰Hvbmabde ao gumtw akv bulam benum, “Bos maabv! Hvbmabde nyi mwlw gab Tugu Puiyam ngo nulgab soq hemp-hengamnam tugu pui sam bekin dvn”

¹¹Soiyig aiso Debidg bopam alo nulam Nyedarbo At Sw Kristonvn dwr buqpakun!

¹²Ko akam vjv pomtum tvl dokum uralo karmnam mam nulv kaacin yinpv.

¹³Haqmapaq golo ao gumtw pvtw go hoq gumtw lvgab haabnv Pwnboam bemin bel paqnum.

¹⁴Yuunamv ao tolo doonbo Pwnbog gabku “Hoqgv swrsomalongv swcw nyodo nvg aolo doonbo mwwg xumtnam nyi tulu gab doon ka”.

¹⁵Bulam ao gumtwngv wleq yukam, sviya rvkybo nyi tulungv akwn akwn bemin sunyianum, “Kuj vi ngulam, At Sw soq sib bekinnum pui sam Betlehamb wgdvl ngulv kaaka taju!”

¹⁶Ho bulv vnwqb wknv Meeri, Josap hoo dookum uraho ko hoiyin akam sumyubl apnam mam meegaql kaapa kunum.

¹⁷Sviya rvkybo nyi tulungv mwam kaapa yukam soq ko bvrwqgab ao gumtwngv bulam hog hvla xeq pui bekinnum ham bulv bulam bekin kunum.

¹⁸Hoqho sviya rvkybo nyi tulug puiyam tanya bo nyi mwlwngv swr gokbo hvl mwwnyianum.

¹⁹Hvbmabde Meeri soqg hog mwlwngam mwwgab kunv mwnwg hang uraho hindjaqb mwwgab ap kunum.

²⁰Kokw so ao gumtw ak hoggv bulam pui bekin kojaqb bulv tapa kaapa paku mwwnv Pwnboam bemin bel paqknv sviya rvkybo nyi tulungv wkur kunum.

²¹Piin aalwg kokw so ko akam pepaql-muxde moodho, ao gumtwg otuq hoq mingp kunum mam mwam Jisu hvl emin kunum.

²²Kokw so Mojesg pvvb xeqpwl ap kojaqb nyedar darxaq deenam moodv Josap la Meeri bunyi gab haagam gab At Swn jitab bulv ko hoiyin akam Jerusalem Xumk namho bvqlwqnum.

²³Soq si hvbnyiloqkam At Swg pvvblo xeqpwl apnamv “Otuq coocib ko nyega bwwt bwwlnam mam At Swn jipaq dvb nyidwn.”

²⁴At Swg birwl apnam hvbkalam bulv kam hog ak jitab wnum, pwk yobur dornyi goma lo pukum ko dornyi go Pwnboam pwr jitab wnum.

²⁵Hoqho Simon nvk hvl nyi ak Jerusalemho doonum. Mwv dvrwqbo bvla Pwnboam bos sonbo nyi akwb nyinum, hoqgv Israel nyi tulungam ywwt ywwtayin hvl benam mam kaayal doonum. Dvrwqbo yalv mwwg lvgab doobanum.

²⁶Hoqgv At Swg dingrnam Ywwnbo akam kaama lo mwam siram hvl dvrwqbo yalv mwam bekinnum.

²⁷Yalv Simonnvn Xumk nam urab wgnv haanum. Pvvblo nyidwb birwl apnam pagoqkam henl ko hoiyin Jisun Xumk nam urab boal haagnum.

²⁸Simon ko hoiyin akam mwwg haabob joocal Pwnbog beminam bel benum, hoo Pwnboam paqnum.

²⁹“At Sw no ngam dingrnam mam hwdjaqg ngam ap paku, sija no noqg nyerangam swrsomalob wwm tuku.

³⁰Noqg ywwnam mam ngoq atwg vnyiqkv kaapa paku.

³¹Hogloq ham no nyiilu mwlwg kaagaho mwx-mvaql apkunam mam:

³²noqg mwwlwqkam nyoodo nyi tulungam hutob huulinv hoo noqg Israel nyi tulungam yuunam mam baqa jidwn.”

³³Mwwg pagoqkam soq sib Simong benam mam tatwl ko hoiyinwg ann ab nyu deedyjaq gokbo mwwnum.

³⁴Simon bulam lvqc citwl mwwg ann Meerinvn benum, “Soq ko si Pwnbog Israelam muiyu-mvcanam mam la ywwlinam gab xuqlin pan. Mwv Pwnbog galoqkv mwiyw mwwcinam mam nyiv naleqgo ceekol agam gootayin

³⁵hoo bul mwlwg mwwsnam mam belin dvn. Hoo mwwdwq-saqkv lyoqr orioq hvb nyitwl, noqg atwg hangam piiriq tayin.

³⁶Anna ngvk hvl Panuelwg ko nyem Aser nyob hoolug nyiqry kaanbo nyem xox ak doonum. Mwn vnywngv vigo wknum, hwdlo mwn mvvam yukho mwnwg nyol lvgab vnyw kvn go swwl doobanum,

³⁷hoo mwn xwwmy akwb nyitwl vnyw campiin leq nywpy go doonum. Mwn Xumk nammam apaq maab doonum, aal aiyib dery reel mwn Pwnboam swgwl doonum.

³⁸Hoq mood jaqho mwnkam urab haabnv Pwnboam paqyalinco paqnum hoo Jerusalem mam Pwnbov nyedar daryi nvpv hvl kaaya yal doonbo nyi tulungam mwn hoq ko hoiyin hoq pagoqkam benum.

³⁹Kokw so bulv At Sw bekwb hog mwlwngam nyiyum yukam bulv Najaretwb bulug Galili at bopamb wkur kunum.

⁴⁰Kokw so ko akv koi kunv Pwnbog pumb rwnam mvla lvqcnamv mwwg aoho doonum.

⁴¹Mwwg ann abv vnyw nywxiam Nyedarko Durum gab Jerusalemb innum.

⁴²Jisu vnyw nywyw leq nywnyi yukam, bulv Nyedar ko durum wcw nyoywngam wnum,

⁴³Nyedarko durum mam nyiyum tukul nammwb wkur duk moodho himy Jisu Jerusalemho dooknum. Hvbmabde mwwg ann abv ham cengmab nyinum.

⁴⁴Mwam ajin tulug lvgab wba dvn mwwnv bulv aal loopwg lamtangam wnum.

⁴⁵Kokw so mwam ajin orum pengko ho meepa maaikukam bulv hindjaqb meek-meeknv Jerusalem xaxab wkur kunum.

⁴⁶Aal loum deen kokw so bulv mwam Xumk nam uralo Juhudig nyijwq-nyegam nyi tulug lvgab doobal bulug benam mam tal bulam puqtu tox xudul doodwb meepa kunum.

⁴⁷Mwwg benam mam tatwl nyi mwlwngv mwwg cingx pvqrwl birwqnam mam deedyjaq gokbo mwwnum.

⁴⁸Hoqgv mwwg annv mwam benum, “Kov, hoggab no ngulam soq sib nyidwn? Noqg ab ngunyiv mwwdwq kunv nam meel yidu dvn.”

⁴⁹Mwv bulam birwqnum, “Ngam nulv hoggab meedwn? Ngo ngoqg Abwg namho doodynam mam nulv cengma dvn yv?”

⁵⁰Hvbmabde mwwg soq benam sam bulv tacin maanum.

⁵¹Kokw so Jisu Najaretwb bulug lvgab wknv bulam bugil swwl annv soq benam mwlwngam hang uraho mwwgab ap kunum.

⁵²Kokw so Jisu pumb rwnamho koi kunum hoo Pwnbo gvla nyia kog vnyiq kaagaho poqkum dukub nyil swwknum.