Read Nyishi LUK 20 Bible Online

LUK 20 - Nyishi bible

LUK 20

¹Aal golo Jisu Xumk namho nyi tulungam Tugu Puiyam tomswrl bekin kidu yikho nyub budangv la pvvb tomswrbo nyi tulungv, nyi axa tulu lvgab haanv benum

²ngulam bekin tvb, “Hognvk ator lvgab soq tulu sam no nyidwn? Hiyv nam soq tulu sam nyim dvb jinbov?”

³Jisu bulam birwqnum, “Sija ngo nulam hog ak tox tayin ham nulv ngam bekin tvb,

⁴Jonwg baptijum jinam hv Pwnbo galoq kvi yv ma nyia ko galoq kv?”

⁵Hoo bulv hwwmin sunum, “Ngulv hog hvlayu betayin? Pwnbo galo, hvl ngulv beb nyiloqkam, hoqnyiloqkam hoggab yu nulv Jonnvn mwwjw maanum?’

⁶Hvbmabde ngulv mwam hvl bebnyiloqkam, ‘Nyi galoqkv hvl ngulv bebnyiloqkam,’ Jonnvn nyiqry benbov hvl mwam mwwjwbo nyi tulu si ngulam sidwb wlw hurx tai.”

⁷Hoqgab bulv birwqnum, “Hogloqkv haasnum yv ham ngulv cengma.”

⁸Hoo Jisu bulam benum, “Hoq nyiloqkam hognvk ator lvgab soq tulu sam ngo nyidwn ham ngokam nulam bekin ram.”

⁹Kokw so Jisu soq doocnam sam nyi tulungam bekinnum: “Nyi ak roo boolug mvp pel, ham rongo mvnbo nyi tulug alaqlo gvqlwqpel oyu mood gob dootab gvda asaq galo wleqnum.

¹⁰Roo aaxy pud moodv haai kukam mwam roo boolug aaxiam tuugin jidkub nyinam mam bulug dookub mwv nyera akgon kanamnum. Hvbmabde rongo mvnbo nyi tulungv mwam jwwnyiaq mvtwl alaq asarb ruqkur kunum.

¹¹Lokta mwv mwwg nyera akgon hvraqb kanamnum, mwam kam bulv jwwnyiaql hvnyw dvb mvtwl alaq asarb ruqkur kunum.

¹²Hoo mwv oum dvb nyera ak kanamnum, rongo mvnbo nyi tulungv mwam kam un mvgtvl bviywrb seepaqnum.

¹³Kokw so roo boolu atv benum, ‘Hognvkv ngo nyita yukun? Ngoqg tumanam Ko Tuup sam kanam tayin; bulv lokam mwam xikam yinpv!’

¹⁴Hvbmabde rongo mvnbo nyi tulungv mwam kaapa tvl bulv akwn akwn bemin sunum, ‘Soq siilak atwg Ko Tuup akv. Kuj vi roo boolungam ngul gab doom dvb ngulv mwam mengtuj!’

¹⁵Hoo mwam mengnum hoo bulv mwam roo boolu hoqgv agab joopaq xaanum. “Hoqnyiloqkam hoq roo boolu atv rongo mvnbo nyi tulungam hog bvxeq mvtayin?” Jisu toxnum.

¹⁶“Mwv haabnv hoq rongo mvnbo nyi tulungam mengtwl roo boolungam rongo mvnbo nyi asaqkam jitayin.”

¹⁷Jisu bulam kaagab banv toxnum, “Hvnyiloqkam soq dvrwqbo potalo xeqnamsi hog hvla xeq bedwn? ‘Nam mvnbo nyi tulungv hogloq wlwngam haqxianum, hv sulak rwwda annwb nyiknum.

¹⁸Hiyv lajaqkam hoq wlw aoho hodaqbov vmwq yumgub nyitayin, hoo wlwngv hiyv aoho hodaq tayin, hoq hv mwam diimwr olumgob mvtayin.”

¹⁹Pvvb tomswrbo nyi tulungv la nyub buu tulungv bulug ceebiob soq doocnam sam bekinpa hvl cengtkul ho dara Jisun nootu dvb sur runyianum, hvbmabde bulv nyi tulungam bosnum.

²⁰Hoqgab bulv hoq aal jaqkam nootu bvnyiloqkam altayin hoq moodam tooiya yaal doonum, mwwg benam mam yolu gob tokub twqnv mwam ab bokum gvla Roman laat saabwg alaqb gvqlwq dvb nyiilo nyinbo nyi ata gokam jitwl bulam kanamnum.

²¹Soq pui baqnbo nyi tulu si Jisun toxnum, “Tomswrbo, ngulv cengdwn no hognvkam bedwn hoo tomswr dvn, hoqhv kvtaq jaqdo.

²²Kaisarnvn nyooga jim dvb pvvbv ngulam loody nvi yv ma looma dvn?”

²³Hvbmabde Jisu bulug suram hempa tvl bulam benum.

²⁴“Ngam rup twngk lo barg kaakin tvb hiyvg nyuqtuq moorv la eminv soq aoso doodwn?” Bulv birwqnum, “Lvpw Bir abgv.”

²⁵Hoqgab Jisu benum, “Vv hoqnyiloqkam Lvpw Bir abgam Lvpw Bir abam jijto, hoo Pwnboam jidynam mam Pwnboam jito.”

²⁶Hoo bulv nyi tulug agaho mwwg benamlo yolu nootu nyoma layil mwwg birwqnam mam tatwl cooikab mool doonum.

²⁷Kokw so Sadusi nyi ata go Jisug dookub haanum, nyiv sipekul gorab robkur kuram hvl haqpaqbo tulungv,

²⁸hoo bulv mwam toxnam ak toxnum, “Tomswrbo Mojes soq pvvb sam ngul gab xeqpnum, nywxw doonbo nyi ak ko doomab sileq yukam ho mwwg vbw maab nyiloqkam borgon hoq xwwmy akam xwwmy sol sinbo akgon koam doom dvb nyidwn.’

²⁹Vbw bor kvn paqta go lok doonum, vbw jaqkv nyem naal ko doomab sileq kunum.

³⁰Kokw so vnyi dvn akv nyem akam xwwmy sonum.

³¹Hoq hvbkvda hoq vbw-bor kvn paqtangv ko doomab twryum kunum.

³²Kokw jaqso, hoq nyem akv siknum.

³³Hvnyiloqkam, sinbo tulungv turab yukam, hoq nyem akv hiyvg nywxw yaab dootayin? Hoggab kvn bwbwngv mwnwn nywxw boonum.

³⁴Hoo Jisu bulam birwqnum, “Soq swwca so nyegangv nyem naadwn hoo nyemv nyem wdwn,

³⁵hvbmabde hiyv xeq xinam swwgam naatws mwwnbov hoo sinam hoqgv turab deenbov nyem naama dvn hoo nyem gokam jima dvn.

³⁶Bulv ao gumtw tulu hvbkalam nyidkun, hoo bulv sikram bulam sik boam turab ko-gab bulv Pwnbog koob nyidkun.

³⁷Hvbmabde sinbo tulungv turab taikun hvl Mojes dardar aljaqb bekinnum, puum ho wm gudul doonbo bvrwqlo, hoqho mwv Abraham gv Pwnbo hoo Aisak gv Pwnbo hoo Jakubg Pwnbo At Swv hvl goqnum.

³⁸Soq hengnam si mwv sinbo Pwnbo ma, hvbmabde turn bov, hoggab mwlw jaqkv mwwgab turl doodwn.”

³⁹Pvvb tomswrbo ata go bvrwqnum, “Tomswrbo, no alwb bedo!”

⁴⁰Hoggab Jisun bulv lokta tox dvb hampeq kumanum.

⁴¹Hvbmabde Jisu bulam benum, “Ywwn bov Debidg ko hosiqkv hvl hoggub nyil benyi tayin i?

⁴²Hoggab Debid atv Mwmin nwswr lo begamv, ‘At Sw ngoqg At Swv hvl benum: Ngoqg lvqbwq alaqso dooto hvnum,

⁴³hwdlo ngo noqg nyemaq kam noqg lvpia niikum ho doom dvb mvma deedib.’

⁴⁴Hoqhvb Debid mwam At Sw hvl goqnum, hvnyiloqkam Ywwnbo hoggub Debidg ko hosiqb nyitayin i?”

⁴⁵Hoo kokw so nyi mwlwngv tvpw dvb Jisu mwwg buu tulungam benum

⁴⁶“Aaso dvb vj kootwl gaql yvdwb mwwnbo, hoo kwm-kor mvk haty lo xumnam mam, Sinagog namlo dootam alboam, okum amaqlo dook alboam abybo tulungam hengab to,

⁴⁷hiyv xwwmy tulug nam-rongongam hubreq-hubceq bov hoo aaso aldvb swgw do. Bulv vcjaqb laqm-baqma vrram baqntayin!”