Read Nyishi LUK 21 Bible Online

LUK 21 - Nyishi bible

LUK 21

¹Kokw so Jisu kaakar-taar banv nyet nyi tulungam bulam Xumk nammwg noosu ho aky jidwb kaapanum,

²hoo mwv jwwgwbo xwwmy akwg lwwcw taiyin tvqnyi go hoqho vlwq dvb kam kaapanum.

³Hoo mwv benum, “Ngo nulam bedwn, mwlwjaqkam hilayab soq jwwgwbo xwwmy aksi jvqtw jaqb vi yaag jibin gvnkun.

⁴Hoggab nyet nyi tulungv bulug at atwg twngk dvleqngam aky jinum, hvbmabde nyem akv hog hwdgo mwv twngk doognum ham jitwr twrxa kunum.”

⁵Bulug buu tuugin Xumk nam pagoqkam bel doonum, hvkam bvxeq anya albo wlw tulu lvgab la Pwnboam aky jinam soq Xumk nam sam kangam aldvb mvpa nui yu. Jisu benum,

⁶“Soq mwlw nulug kaag dvn sam wlw pwkin gonkam mwwg atwg dookho pwggin aoho pwggin doom mvma dvb pwcw-pwtam hurxa dvb moodv haatayin.”

⁷Bulv toxnum, “Tomswr bov,” Soq si hwdam yu nyitayin, hoo hognvk xeq kaacin dvb nyitayin hwdlo soq tulu si nyita yukun?”

⁸Hoo Jisu benum, “Nulam booxar kuma dvb hvvminto. Hoggab ngoqg emin gab nyiv vijaqg haalayil hvl betayin, ‘Ngo sulak mwv!’ hoo ‘Moodv haapa ku!’ Hvbmabde bulug kokwb wmin gvma bv.

⁹Hoo nyob panam mam la hur-marabnam pagoqg pui tapa ywnyi lo, nulv bos maabv, hvbmabde soq hog mwlwngv otuqcob nyico keedwb nyitayin; hvbmabde hoqhv hvraqb xoyiqram.”

¹⁰Mwv benum, “Gvda akwnv gvda akwn nyob patayin, hoo lvpw akwn lvpw asaqkam ceeko tayin.

¹¹Hoqgv nyioby bitv hwqtayin, hoo dwr kanongv hoo sig-dorgv gvda gvtwb wiywq tayin; hoo doa toloqgv bos dvb kvvnyir-tamar koox dvb lengtayin.

¹²Hvbmabde soq hog mwlw si nyima wmadab nyiv nulam benyi-beya leel-parl jipaqtayin, Sinagog namlo pvtwq vlwq tayin; ngoqg emin gab nulam lvpw tulu gvla laat saab tulug agaho boatayin.

¹³Tugu puiyam bekin dvb soq si nulgab pagoq aljaqkv;

¹⁴Otuqcob nulv mwo cooto hog bvxeq birwq tayin,

¹⁵hoggab no hognvkv betayin hoqham noqg nyemaq tulungv hiyv lajaqkam bitur nyoma dvb hoq moodam nulug agamlo goolaq kamla mwwlaq nanlo ngo jitayin.

¹⁶Hoqgv noqg ab annv vbw-bor tulungv hoo lvqry-laqso tulungv hoo ajin tulungv, hoo nulam tuugin bulv mengdwb gvqlwq tayin.

¹⁷Ngoqg gab vcw atv nulam oyum yumtayin.

¹⁸Hvbmabde nulug dumpo dum soocw jijaq gokam yuupaqram.

¹⁹Nulv atv hwngkw bvnyiloqkam nulug swwgam lokta kaapa tayin.

²⁰Jerusalem mam sipai tulungv hwwiywql doog dvb nulv kaapa bvnyiloqkam, ho nulv Jerusalem sam twrgum gokbo hvl cengpa yinpv.

²¹Hoqho Judiya gvdaho doonbo nyi tulungv yorn aob kecal keky dvb nyitayin, bopamho doonbo nyi tulungv wleq dvb nyiky yinpv, hoo nampam ho doonbo nyi tulungv bopam urab haadwb nyiram,

²²hoggab dvrwqbo potalo xeqpko jaqb hog mwlwngam niqtuq lengdwb, soq tulu si laqm bvqd aalam nyitayin.

²³Ko gvnbo nyem tulu gabla gwwi twwm xiqnbo ann tulungv hoq aalam hentwr henbin yaatayin! Hoggab hoq aalam hentwr hemanamv soq gvda so vcjaqb haatayin, hoo Pwnbog hang lengnamv soq nyi tulug ceebiob dootayin.

²⁴Bulv lyoqr orioq niqtuqho haatayin hoo nyumwb leelayil gvda gvtwb bool wgtayin, hoqgv nyob asaqg nyi tulungv bulug mood wiyum maad deedib Jerusalem mam caatam-caabaql wtayin.

²⁵“Doonyi poolv hoo takarv kaacin taxdvb nyitayin, hoo sa-svlog iss suduq duql dugum guml duqgam gab swcw nvg aoso nyob luuxiv vs-axaql mwwdar-saqpar maab nyitayin,

²⁶Gvda gvtlo hog bvxeq nyitayin ham mwwdwq dwqdy bo nyi tulungv bos sotayin. Hoggab doa toloq ator mwlwngam likub dvb mvtayin

²⁷Hoo Nyia Ko Tuupam xitor ab bokum gob nyil swcwso yuupw dvb doomwq lvgab haadwb kaapa tayin.

²⁸Hvbmabde soq benam nyinam mwlw si nyirab wrab twqda kalam noqg dumpongv ngiirab kaanto, hoggab nulam nyedarko mood ogum hvvnwq paku.”

²⁹Hoo kokw so Jisu bulam soq doocnam sam bekinnum: “Taoq svvnam la svvn mwlwngam kaanto.

³⁰Soq tulu sam okv jurlinl jurab yukam dwr poolv ogum yikbo hvl nulv cengdwn.

³¹Hoq hvbkalam, nulv soq sam nyil doodvb kaapa ywnyiloqkam, ho nulv Pwnbog lvpwngv hvvnwq pakbo hvl nulv cengtayin.

³²“Sam mwwgabto soq swwca soq nyi tulungv sima daab soq mwlw si nyidwb nyitayin.

³³Doonyi Poolv la swcw nyodongv niitayin, hvbmabde ngoqg agamv nywywngam niiram.

³⁴“Hvbmabde nulv atv atv hvvmin gvdwl dooto hvbmab nyiloqkam durum dvmaq dvk lo twwxum dvb-twwl atwg swwgam mooma nyipaql yvmabv, hoo hoqhvk moodv haqmapaqb nulug aolo haatayin.

³⁵Hoggab soq aal si gvda gvtso doonbo nyi tulug mwlw jaqg aolo haatayin.

³⁶Hvbmabde soq nyidy wdynam mwlw soqgv nulv kipwql Nyia Ko Tuupwg agaho atorwb daqdwb hvvmin mingl xuml looxiam mvdaq kvlaq gvdwl dooto.

³⁷Hoq apo ho Jisu looxiam xumk nam uraho tomswr swrnum; hoo ariyum kanam mwv agab lengnv Olib nyiody puutuho soiyam doonum.

³⁸Hoo nyi mwlwngv xumk namho mwwg tomswrnam mam tatab ar komcam mwwg dookub haanum.