Read Nyishi LUK 22 Bible Online

LUK 22 - Nyishi bible

LUK 22

¹Dvtv Durum hvl benam opap ciqlwq maanam wtw durumko moodv hvvnwq kunum.

²Nyub buda tulungv la pvvb tomswrbo tulungv Jisun mengdwb mengk pagoqkam meekar banv sur rusil doonum, hoggab bulv nyi tulungam bos sonum.

³Ho Uiyv Judas Iskeriot hvl goqnam urab haanum, mwv buu wyw leq vnyig pengko hoggv akwn.

⁴Hoqgab mwv hog bvxeq Jisun bulug alaqho gvqlwq dvb nyitayin, hoq pagoqkam nyub buda tulu gvla saab tulug lvgab bibwq mins dvb wnum.

⁵Hoo bulv hempnum, mwam twngk jidwb goobwq kunum.

⁶Ho Judas loorwqnum hoo nyi tulungam cengma dvb bulug alaqho Jisun nyepin tvl gvqlwq dvb sur bwwl cucub kaayal doonum.

⁷Kokw so opap kiilwq maanam wtw durum dvd aalv haaikukam Dvtv durum ho sviya koam patabl dvd aalv haaknum.

⁸Jisu Pitor nvla Jonnvn soq sam bilwqnv kanamnum: “Wgdvl Dvtv durum mam dvdwb mwx-mvaql ap yaata.”

⁹Bulv birwqnum, “Hogloq ho soq sam ngulam mwx-mvaql aptak hvl no bedwn?”

¹⁰Mwv bulam benum, “Kaato, hwdlo nulv bopam urab haaikam, iss uppum pumg jootwl nyi ak nulam wrwq tayin, nulv mwwg kokw kokwb wmin gvgdvl mwwg haak nam urab haamin gvta.

¹¹Nam atam beta, ‘Tomswr bov nam bilwqpa ngoqg buu tulungv la ngo Dvtv durum dvdy ko imiqkv hoglo?’

¹²Mwv mwwg nam aoho mwsiqnam imiq miqt albo golo hog mwlwngam doodwb kaapa tayin; hoqho nulv mwx-mvaq ta.

¹³Hoo bulv wknv bulam Jisug bekinko jaqb hog mwlwngam kaapa tukul bulv Dvtv durum dvsam mwx-mvaql munul ap kunum.

¹⁴Kokw so moodv haaikukam, Jisu xuqnam nyi tulu lvgab tebol ho dvdwb doa mingnum.

¹⁵Jisu bulam benum, “Ngo hentwr hema daab nulug lvgab soq Nyedarko durum dvnam sam dvdwb ngo mwwkynum!

¹⁶Hoggab ngo nulam bekin dvn, Pwnbog lvpw lo soq si niqtuq lengma deedib ngo sam dvram.”

¹⁷Kokw so Jisu twwn nan pvtaqngam naarab banv Pwnboam paqnum, hoo mwwg buu tulungam benum, “Nulv sam naagdvl twwbam to;

¹⁸Hoggab ngo nulam bekin dvn Pwnbog lvpwngv haama deedib, ngo sija galoqkv soq roo ala sam twwkram.”

¹⁹Hoo wtwngam naarab banv Pwnboam paqnum, ham pindub banv bulam jijo ywnv benum, “Soq si ngoqg gv soodinv nulgab birnanv. Ngam mwwpa dvb soq sam nyito.”

²⁰Hoq hvbkalam dvnam mam dvxo kalam, mwv bulam twwnam pvtaqngam jinv benum, “Soq pvtaq si nulgab toolinam ngoqg ui lvgab Pwnbog nitib birnanv.

²¹“Hvbmabde kaato! Ngam nyepin bo akwg alaqkv ngoqg lvgab tebol si dooba do!

²²Hoggab sam Pwnbog mwwrko jaqb Nyia Ko Tuupv sitayin; hvbmabde mwam nyepin bo nyi akv vcjaqb hentwr hen nvpv!”

²³Hoo bulug pengko ho hiyvjaq soq sam nyita tadwn, ham bulv akwn akwnv tox minsnum.

²⁴Ho buu tulug pengko ho hogloq akv mwlwngam koi yaadwn hoq pagoqkam bulv hwwiyaq minsnum.

²⁵Hvbmabde Jisu bulam benum, “Soq gvda gvtwg lvpw at tulungv nyi tulug aoho lvpw at saab swwdwn, hoo ab bokum tulungv nyi tulungam niqtuq lengn bov hvl goqdwn.

²⁶Hvbmabde nul lvgab hoqhvb nyima dvn; nulug pengko lo mwlwjaqkam koi yaanbo akv mwlwngam anyo ko hvb nyitayin, hoo nyig-wgbo akv nyera hvb nyitayin.

²⁷Hvnyiloqkam hogloq akv mwlwngam koi yaadwn, dvnam dvtab doabo ak hvviya yv, ma mwwsul hornbo ak hvviya yv? Vvjaqsu dvnam dvtab doabo ak hvvsu. Hvbmabde ngo nulug pengko ho mwwsul dvnam mam hornbo akwb nyidwn.

²⁸“Ngam pooka-yirka dvk mwlwho nulv ngoqg lvgab dooba bo nyi tulungv.

²⁹Hoo ngam ngoqg Ab lvpw ak bwwm dvb jinam hvbkalam, ngokam ham tvlwqnum hoq hvbkalam nulug lvgab mvtayin,

³⁰nulv ngoqg lvpwlo doonbo tebol lo dvba twwba dvb nyiyi nvpv hoo Israelwg nyob wyw leq vnyiam nulv pw-hwwdwb dootayin.

³¹“Simon, Simon! Kaato! Uiyv nam gumdo, mwv wtw ammam dorxubnam hvb dorxub tan,

³²hvbmabde Simon noqg mwwjwngam niim mvma dvb mwwl ngo noqg gab xumt kunum. Hoo no ngam mwwkur kurxo kokwngam, noqg vbw-bor tulungam no ator mvdwb nyidwb nyitayin.”

³³Pitor birwqnum, “At Sw, ngo noqg lvgab pvtwq bvkam wmin gvdwb hoo simin gvd bvkam ngo mwwr svqkwl doodwn!”

³⁴Jisu birwqnum Pitor, “Ngo nam bekin dvn, no ngam kaacin maak hvl luum go bema deedib soi poroqkv xoqram.”

³⁵Kokw so Jisu bulam benum, “Twngk kui, cuk ho luxuq gvma dvb ngo nulam kanam nvmlwq dvkho nulv hog vs-axaq gob nyin mvi yv?” Bulv birwqnum, hog nyimanum.

³⁶Jisu birwqnum, “Hvbmabde sija hiyv twngk kui doogdvn, mwam ham naamto, hoq hvbkalam cukam naamto, hoo hiyv lyoqr orioq doog maadwn, mwam mwwg lvlwqkam puqg dvl daag rvmto.

³⁷Hoggab ngo nulam soq dvrwq pota soq benam mam bekin dvn, ‘Mwam nyic nyia nyinbo nyi tulug lvgab xitaq gvnkun.’ Hvnam si ngoqgab niqtuq nyilin tayin. Hoggab ngam benam pagoqkv jvqtw jaqb nyitayin.”

³⁸Bulv benum, “Kaato, At Sw, soq si lyoqr orioq dvnyi go doodo.” Hoo mwv bulam benum, “Hoqhv jotv ku.”

³⁹Hoo Jisu mwwg nyicwb lvvgwb lengnv Olib puutub wgnum, hoo buu tulungv mwam wmin gvnum.

⁴⁰Hoo hwdlo mwv hoq nyookam wc yukam, mwv bulam benum, “Pooka-yirka koma dvb nulv swgwnam mam swgw gvdvl dooto.”

⁴¹Kokw so mwv bulug dook hoqgv goqto gob wlayil lwbwngv kumbw tvl xumnum.

⁴²Mwv benum, “Abv, no mwwd nyiloqkam soq twwnam pvtaq sam ngoqg galoqkv naaxatvb. Hvbmabde ngoqg mwwk bvma noqg mwwlwqb nyimto.”

⁴³Hoo ao toloqgv ao gumtw ak mwam kaakin banv ator jinum.

⁴⁴Kokw so mwv hentwr alwb henl dwqdwq dwqdwqyab swgwnam mam swgwnum; mwwg gv hoqgv haaxorv ui hilum gob nyitwl kedwb dilnum.

⁴⁵Mwv swgwnam mam mvxo peekul gorab kunv mwwg buu tulug dookub wkur kunv bulam mwwdwq dwql yubngaql doodwb kaapa kunum,

⁴⁶hoo mwv bulam benum, “Hoggab nulv yubdul doodu dvn? Pooka-yirka koma dvb nulv gorab gvdwl xuml dooto.”

⁴⁷Mwv hvraqb goodul doodwkho nyi olum gola buu wyw leq vnyig pengko hoggv Judas Iskeriot ngvk hvl benam akv bulam wgnum. Mwv Jisun moopup taab mwwg ogumb wnwqnum,

⁴⁸hvbmabde Jisu mwam benum, “Judas, no moopup layil Nyia Ko Tuupam nyemaq alaqb gvqlwq gviyin?”

⁴⁹Hoo hwdlo mwwg taqg-loosaq daqnbo tulungv kaapanum hoo bulv benum, hoggv nyita dvn, “At Sw, ngulv ngulug lyoqr orioq lvgab pag ywnkv i?”

⁵⁰Hoo bulug akgon nyub butwg nyera akwg nyuru rubwqngam xaqpaqnum.

⁵¹Hvbmabde Jisu benum, “Hoboku, soq sam nyikmab!” Mwv nyi akwg nyurungam idaq banv mwam mwp jiknum.

⁵²Ho mwam nootu taab haanbo nyub buda tulungam la xumk nammwg rvkybo tulug saab tulungam la nyi axa tulungam Jisu toxnum, “Dvco conbo nyi tulungam nootu taab wnam hvbkalam ngam hog nyitwl nulv lyoqr orioq kam la dvvpam jootwl ngam nootu taab lengnya yin?

⁵³Ngo nulug lvgab looxiam xumk namlo yvbanum, hoo nulv ngam hiyvkam mvdwb alaq irab maanum. Hvbmabde sija nulug moodv, hoo kanwg atorv.”

⁵⁴Bulv Jisun leela yukul nyub but abwg nammwb bool wg kunum; hoo Pitor aado aado kvtaq ho kokw-kokwb rumin gvnum.

⁵⁵Kokw so nyel nam lvpa jaqho bulv wm ak partwl lvkin gob doobamnum. Pitor bulug pengko ho doonum.

⁵⁶Paqn ko ak mwam rogab jinjin banv benum, “Soq nyi ak siikam mwwg lvgab yvbanum!”

⁵⁷Hvbmabde Pitor mwam vm mvvnv benum, “Nyemv, ngo mwam cengka maas lak!”

⁵⁸Hoo oyu maadab miceqg dooxo kokw so, nyi ak mwam kaapa tvl benum, “Nookam bulug pengko ho akgon!” Hvbmabde Pitor benum, “Ma, ngoma sulak!”

⁵⁹Hoo mood ak dooxo kokw so, nyi asaq ak hvraqb hind-pwcw banv benum, “Jvqtw jaqb soq nyi ak si mwwg lvgab yvba bo ajin akgon, hoggab mwv kam Galili nyiv!”

⁶⁰Hvbmabde Pitor benum, “Noq nyi no, hognvkam bedwn ham ngo cengma lak!” Mwv hvraqb gool doodu ywk ho poroqkv xoqknum.

⁶¹Hoo At Sw nywwkur banv Pitornvn kaagab jinjinum. Hoo Pitor At Swg agam beknam mam mwwpa kunum, “Soi poroqkv xoqma daab, no ngam kaacin maak hvl luum go vm mvvtayin.”

⁶²Pitor agab lengknv vcjaqb mwwdwql xabnum.

⁶³Jisun daqg nyanbo rvkybo tulungv mwam bej-bepar banv jwwnum.

⁶⁴Bulv mwwg vnyiqkam vjv putum tvl mwam toxnum, “Hiyv nam sija jwwn bov nyiqry kaalin kaat!”

⁶⁵Kokw so bulv mwam vijaqg hvnyw-har dvb bej-beparnum.

⁶⁶Ar huto yukam Juhudi nyi axa tulungv lvkin gob wkum banv Jisun bulug nyel dookum ko nammwb boanum.

⁶⁷“Bulv benum, ngulam bekin tvb, no Ywwnbo ak hvvjaq yv.” Hvbmabde mwv bulam benum, “Ngo nulam bekin baloqkam, nulv ngam mwwjwram,

⁶⁸hoo ngo nulam tox baloqkam nulv birwq nyoram.

⁶⁹Hvbmabde sija galoqkv Nyia Ko Tuupv Pwnbog lvqbwq alaq daiyaho doodwb nyitayin.”

⁷⁰Ho bul mwlwngv benum, “Hoqnyiloqkam, no Pwnbog Ko Tuupv yv?” Mwv bulam birwqnum, “Nulv nyook hvl bedo.”

⁷¹Hoo bulv benum, “Ngulv hiyv nvkam hvvky naadwb nyikma! Ngulv atv mwwg agam jaq hoqgv tatkvl tukba!”