Read Nyishi LUK 23 Bible Online

LUK 23 - Nyishi bible

LUK 23

¹Kokw so nyi acamv gorab layil Jisun Pilat agaho boanum.

²Hoo bulv mwam yolu berabnum, “Ngulug nyi tulungam nyixiaq wxiaq gvl bulam Kaisarnvn nyooga jima bvk hvl biturbo, hoo atv atam Kristo ngvk hvl bisbo soq nyi aksam ngulv nootu pakun.”

³Hoo Pilat mwam toxnum, “No Juhudi hvdwg lvpw atv jaq yv?” Hoo Jisu mwam birwqnum, “No sulak sam bedwn.”

⁴Kokw so Pilat nyub buda akam la nyi tulungam benum, “Soq nyi aksam yolu bedwb ngo hog pagoq goqgkam kaapa ma.”

⁵Hvbmabde bulv hvraqb ceceq yaiyab biduqnum, “Soq nyi aksi Galili hoqgv nyirab banv Juhudi gvda tvqpwngam nyilayil soq xaqgub tomswr banv, nyi mwlwngam hwrda kvlagob mwv biur-wr banv yolu swcin gob nyig wgdo.”

⁶Pilat sam tatwl, mwv toxnum soq nyi aksi Galili nyiv yv.

⁷Hoo kokw so Pilat Jisun Herodg gvda aloqgv haai bala nyik hvl cengtkul, mwv Jisun Herodg dookub kanam kunum. Hoq apoho Herod kam Jerusalemho doonum.

⁸Hwdlo Herod Jisun kaapa tvl vcjaqb hangv hempnum; hoggab mwv Jisug puiyam otuq hoqgv tapanum, hoo mwv Jisug swrdorxeqb nyinamlo ak kaaky tvnam gob kvvnwnum.

⁹Hoqgab Herod Jisun vijaqg toxnum, hvbmabde Jisu mwam gamkin gokam goorwq maanum.

¹⁰Nyub buda akv la pvvb tomswrbo nyi tulungv daqrab banv ceceq jaqb Jisug ogumb haabnv Jisun yolu benum.

¹¹Herod kam mwwg sipai tulug lvgab lvkin gob Jisun bej-beparl nyijab-nyiyap nyinum; hoo bulv mwam lvpw atwg vj koonam rumg mwam koomtvl, Pilatg dookub kanam nomkur kunum,

¹²Hoq aal jaq hoqgv Herod la Pilat bunyiv ajin mins kunum, hvbmabde hoq otuqho bunyiv ceebio baqminsul doonum.

¹³Kokw so Pilat nyub buda tulungam, hoo gora ab tulungam la nyi tulungam lvkin gob goqkum banv,

¹⁴hoo bulam benum, “Nyi tulungam nyixiaq-wxiaql nyig wgdvn hvl benam nyi aksam ngoqg dookub boapa. Sija ngo nulug agaho mwam tox mvkanamv, mwam nulug yolu bekwb ngo mwwg aoho hog yolu swcin ak jijaqkam doonam meepa ma.

¹⁵Herod kam mwwg yolu swcin doonam mam meepa kuma gab mwv ngulug dookub mwam lokta kanam nomkur jipa ku. Mengda puqda yoodub soq nyi aksi hog nyic nyia ak jijaqkam nyima.

¹⁶Hoqgab ngo soq nyi sam laqm-baqm tvl apaq jitayin.”

¹⁷(Nyedarko durum dvk moodam, vnyw nywxiam, pvtwqho lwqnam nyi tulug pengko hoqgv akgon Pilat tolin jidwb nyinum.)

¹⁸Hvbmabde nyi tulungv lvkin gob sogoq goql benum, “Mwam mengto! ngul gab Barabasnvn tolin tuku!”

¹⁹Bopam uraho yolu swcin dul nyi meng gam gab Barabasnvn pvtwqho lwql apnum.

²⁰Pilat Jisun topaq dvb mwwnv, nyi tulungam lokta benum,

²¹hvbmabde bulv sogoq goqdu twql benum, “Mwam daapotol mengto! daapotol mengto!”

²²Pilat bulam luum dvb benum, “Ho nyiloqkam mwv hognvk nyic nyiangam nyipan? Mwam mengd puqdwb ngo hog yolu swcin ak jijaqkam kaapa nyoma, hoqgab ngo mwam laqm-baqm tvl apaq jitayin.”

²³Hvbmabde bulv Jisun daapotol dvvcw silongv taqtin gvdwl mengtwk hvl bulv sogoql kiir banv benum, ho kokw so bulug sogoql goqnamv mviya kunum.

²⁴Hoqgab Pilat Jisun mengta hvl bulug bekwb kobwql gamlin jiknum.

²⁵Yolu swcin dul nyi meng gam gab pvtwq lwql apnam nyi akam topaq tvbwk hvl gumnyiabo bekwb mwv hoq nyi akam topaq jiknum, hvbmabde mwv Jisun bulug mwwlwqkob bulug alaqb gvqlwq kunum.

²⁶Bulv Jisun bool wgnum. Bulv wdul doodu dvk ho, Simon nvk hvl benam Siren nyi nampam hoqgv bopamb hoodul doonbo akam bulv kaapanum. Bulv mwam nootu banv Jisug daapongam mwwg aohv tvbaq tvl Jisug kokw-kokwb jool wmin gvmnum.

²⁷Hoo nyi pvtw go mwwg kokwb wmin gvnum, hoq pengko ho mwwg gab bulug hangam cedin cedin banv xabl nyem ata-gorab wmin gvnum.

²⁸Jisu nywkur banv bulam benum, “Jerusalemwg nyem tulu! Nulv ngoqgab xamab, hvbmabde at gab la nulug ko tulu gab nulv xabto.

²⁹Hoggab aal loog hoq hvb bid moodv haatayin, ‘Twrngum bo nyem tulungv la ko bwwka maanbo nyem tulungv la nywywngam gwwi twwka mvmabo nyem tulungv xinam jaqkv!’

³⁰Ho nyi tulungv puutungam berab nyatayin, ‘Ngulug aoso yaqjabto!’ hoo yorn tulungam betayin, ‘Ngulam yulub tvb.’

³¹Hoggab bulv soq tulu sam svvnv leelaq yikho nyip nyiloqkam, hwdlo svvn tulungv sengyi kukam nulv hoggv nyikin do?”

³²Bulv yolu doonbo nyi vnyi gokam Jisug lvgab mengtaq taab bool wgnum.

³³Hoo bulv Dungklo alo ngvk hvl benam nyookam wc kunum, bulv hoqho Jisun daapo aoho dvvcw silongv taqtinum; yolu doonbo guunyi nyi vnyiamkam akwn mwwg lvqbwq daiyaho hoo akwn laqc daiyag daapo aoho mengnum.

³⁴Jisu benum, “Abv, bulam axia jito! Hognvkam bulv nyidu dvn ham bulv cengma.” Tak kaanya banv, bulv mwwg vjam bulug pengko ho hormin sunum.

³⁵Hoqho nyi tulungv daqtwl rodul doonum. Juhudi nyi tulungam nyig wgbo nyi tulungv mwam bej-bepar banv benum: “Mwv nyi asaqkam ywwt ywwnum; mwv Pwnbog xuqnam Kristo jaqnyiloqkam mwam atam atv ywwt ywwm suto!”

³⁶Sipai tulu ngvkam mwam bej-bepar banv benum. Bulv mwwg dookub haabnv opo cumdwq boam jinv benum,

³⁷“No Juhudi nyi tulug lvpw atv jaq nyiloqkam atv atam ywwt ywws toloq kam!”

³⁸Soq sam mwwg daapo aoho xeqtwl tengtaql apnum, “Soq aksi Juhudi tulug Lvpw Atv.”

³⁹Daapo aoho taqtin apnam guunyi nyi akwn hv mwam tobul benum, “No Kristo maai yv? At no atamkam ywwt ywwsto hoo ngulamkam ywwt ywwtbv!”

⁴⁰Hvbmabde akwnv mwam yolu ruqnv benum, “No Pwnboam bos maad nvi yv? Ngul mwlwngv sig gombu ukinho doodwn.

⁴¹Hoo ngulam nyiloqkam jvqtwngam nyijpa, hoggab ngulv hognvkam nyimur-wmur tukun hoqg niqtuqkam ngulv noodu yaas dukun, hvbmabde mwv nyiloqkam hog gokam nyigo wgo jima.”

⁴²Hoo mwv Jisun benum, “Jisu, no noqg lvpwb haaikukam, ngamkam mwwpa tabka!”

⁴³Jisu mwam benum, “Ngo nam jvqtw jaqb bedwn, no ngoqg lvgab soolo daq ao gvda tolo dooba tayin.”

⁴⁴Doonyiv taab svqtwqb nyid agar hoqgv doonyiv kaak maab gvda gvt mwlwngv rwqram mood naagub kan pul doonum,

⁴⁵hoqgv Jerusalem xumk nam hoqg vj tornam rummv tvqnyi gob swrc nukun.

⁴⁶Kokw so Jisu vc alwb sogoql benum, “Abv! noqg alaqho ngoqg yalam jig yukun!” Mwv sam gaml bepekul swwrw bingnum.

⁴⁷Sipai saab akv Jisu hog bvxeq nyil siknum ham kaatwl Pwnboam paqnv benum, “Jisu jvqtw jaqb nyidybo nyi goj kunyi!”

⁴⁸Hognvkv nyidu dvn bwdwq mwwl kaatab haanbo nyi tulungv Jisug sinam mam kaapel bulv atwg hangam cedin cedin sul nammwb wkur kunum.

⁴⁹Hvbmabde Galili hoqgv mwwg kokw-kokwb wmin gvnbo nyem tulungam betaql mwam kaacin bo nyi tulungv aado hoqgv doqtul soq nyinam mwlw sam kaal daqnum.

⁵⁰Josap pvk hvl eminam Juhudi nyi ak Arimatiya nampam hoqgv hoqho yvnum. Mwv albo nyi bvla xinam paqnam nyib nyinum,

⁵¹mwv bulug pvvb mvl hoo bon nyinam mam loomin gvmanum; hoo mwv Pwnbog lvpw hvvd moodam kaayal doonum.

⁵²Mwv Pilat dookub haabnv Jisug svmangam konum.

⁵³Kokw so mwv svmangam joopoq banv topum vj golo tumtwl nywywngam liika maanam wlw lwwn golo dukoql apnam nyubu ung golo liiknum.

⁵⁴Soq si swwrab aalwb nyinum, hoo Doonu aalv haasv twqb nyiknum.

⁵⁵Galili gvda hoqgv Jisug kokw-kokwb wmin gvnbo nyem acamv Josap lvgab wmin gvbanv Jisug svmangam hogloq ho liiknum ham kaanum,

⁵⁶Kokw so bulv nammwb wkur kunum mwwg gvvho piaqn dvb kuty sungam alboam mwx-mvaql apnum. Pvvb gaml jikjaqb bulv Doonu aalho doonunum.