Read Nyishi LUK 24 Bible Online

LUK 24 - Nyishi bible

LUK 24

¹Doonu dvk aal arkomci huudar humarho sungam albo kutiam mwx-mvaql apnam mam bvvlayil nyem tulungv nyubu dookub wnum.

²Bulv wlw pwam nyubu bug hoqgv ngurgin doodwb kaapanum.

³Bulv urab haabnv kaanum, hvbmabde bulv At Sw Jisug svmangam kaapa kumanum.

⁴Bulv soq sam mwwdar lamab hoqho doqdunum, kwlwq-kvlaq dvb vj koonbo nyi vnyi go bulug ogumho daqnum.

⁵Hoo nyem tulungv vcjaqb bos sol ked daiyab pvxwl doqdu yukam hoq nyi vnyiv bulam benum, “Nulv sikbo tulug pengko ho turkur kunbo akam hoggab meegaq dvn?

⁶Mwv so dookma, mwv gorab nukun. Mwwgabto, mwv Galili alo doodho nulam mwv hog hvla xeq benum,

⁷Nyia Ko Tuupam nyic-nyiya bog nyi tulug alaqho gvqlwqtvl daapo ao tol dvvcw silongv taqtin banv mengtayin, hoo aal loum deen aalam lokta torab tayin.”

⁸Hoo mwwg otuqho benam mam nyem tulungv mwwpa kunum,

⁹hoo bulv nyubu hoqgv wkur laikul soq hog mwlwngam buu wyw leq akinam la hoo nyi mwlwngam puiyam bekinnum.

¹⁰Meeri Magdalin, Joana, Jemsig ann Meeri hoo bulug lvgab wba bo nyem asaq tulungv xuqnam tulungam soq pui sam bekinnum.

¹¹Hvbmabde xuqnam tulungv nyem tulug pui benam mam hog jwwma-damagob mwwbnv bulam tvjw maanum.

¹²Hvbmabde Pitor gorab banv nyubwb xarl; mwv gubxwl pvwr banv kaanamv svma tumnan buug vj rooxongam kaapanum. Hoo hognvkam nyiknum ham mwwmo soso banv mwv nammwb wkur kunum.

¹³Hoq aal lookin ho buu tulug vnyi gon Jerusalem hoqgv mail kvn yooma gob aado ho doonbo Emmaus nampam ngvk hvl benam nampamb wdul doonum.

¹⁴Hoo hognvkv xeq nyiknum hoq mwlwngam gool wba sunum.

¹⁵Bulv goobnv hwwmin sunum, hoo Jisu mwv atv ogumb haabnv bulug lvgab wmin gvnum.

¹⁶Bulv mwam kaapa sunum, hvbmabde bulv mwam kaacin maanum.

¹⁷Jisu bulam benum, “Nulv hog nvkamxeq gookur gookur gool wdu dvn?” Bulv nyuqmv moiya rvxa tvl biimajaqb daqnum.

¹⁸Kliopas ngvk hvl emin benam, bulug akgon mwam birwqnum, “Suiyum sor hognvkv xeq nyidul doodwn, hoqham Jerusalemho dootwl cengmajaqb nyinbo nyiv nootwq yv?”

¹⁹Mwv bulam toxnum, “Hognvkv xeq nyipa kun?” Bulv mwam birwqnum, “Najaret Jisun mengnam bvrwq gosmab. Soq nyi aksi nyiqry kaanbo nyi akwb nyitwl koijaqb bonam nyinum, hoo Pwnbo gvla nyi tulug agaho swrdorxeq agam goonum,

²⁰hoo ngulug nyub buda tulungv la saab tulungv mwam mengm dvb gvqlwqnum, hoo bulv mwam daapo aoho dvvcw silongv taqtin kunv meng nukun.

²¹Hvbmabde Israel nyi tulungam nyedar dardybov mwv bo hvl ngulv mwwgw yaanum! Hoq hog mwlwngam bet lakam, soq sam nyinamv sija aal loum yuku.

²²Hvbsujaqkam ngulug acam soqg nyem ata gon ngulam lomdwb benum, bulv arkomc huudar humarho nyubwb wnum,

²³hvbmabde mwwg svmangam kaapa maanum. Mwv turl doodnvk hvl bulam bekinbo ao gumtw tulungam kaapa peenwk hvl bulv wkurnv bekinnum.

²⁴Ngulug lvgab yvba bo ata gon nyubwb wbnv nyem tulug bekjaqb kaaknum, hvbmabde bulv mwam kaapa kumanum.”

²⁵Hoo Jisu bulam benam, “Nulv hvkam bvxeqkvl paca caadwn, nyiqry benbo tulug benam hog mwlwngam mwwkub saqxeql mwwjw maanbo nyi tulu!

²⁶Mwam yuuma daab Kristo otuqcob hentwr kaasngam hendwb nyima namyv?”

²⁷Hoo Mojes pota xeqpwl apnam hoqgv berab banv nyiqry benbo tulug xeqnam mwlwngam, mwwg pagoqkam dvrwqbo potalo xeqpnam mam Jisu hog mwlwngam mwv bulam xwkinum.

²⁸Bulv nampam mam wnwq kunum, hoqgv Jisu mwv hvraqb aadob wd deen hwiyw jaqb nyil kaakinum,

²⁹Hvbmabde bulv mwam ceceq jaqb bulug lvgab dootwk hvl gumnv benum, “Ngulug lvgab dooto; aalv wiyum svqtwqb nyidku hoo kanv pua yuku.” Hoqgab mwv bulug lvgab dooba taakub wknum.

³⁰Mwv bulug lvgab tebol ho doa minggwl wtwngam naarab banv pingmwq banv lvqc cil bulam jinum.

³¹Bulug vnyiqkv nyiqbio kunv mwam kaacin xiqknum. Hvbmabde bulug kaaga hoqgv mwv jimy-jema gob nyiileq kunum.

³²Bulv bemin sunum, “Mwv ngulam lamtaho gool wdu yikho dvrwq potag niqtuqkam xwkin wdudvk ho soq si ngulug hang uralo wm hvbjaq gudul doomanum i?”

³³Bulv rwdwq-paqb gorab banv Jerusalem wkur kunum; hoqho bulv buu wyw leq akinam la bulug lvgab yvba bo nyi tulungam lvkin gob dookum doolum gvtwl,

³⁴hoo begamv, “At Sw jvqtw jaqb gorab nukun! Simon mwam kaapa kunum!” hvl bel doodu dvb kaapanum.

³⁵Ho lamtaho hognvkv xeq nyiknum, hoo mwv wtwngam pindub dukho bulv hogbvxeq mwam kaacin kunum hoq mwlwngam bunyiv bulam xwkin kunum.

³⁶Bunyiv bulam soq sam bekin banv doodu yukam cengma lvpab Jisu mwv atv bulug pengko lo daqabanv bulam benum, “Swrsomalongv nulug lvgab dooba nvka.”

³⁷Hvbmabde bosil lomkaq saqbanv bulv oram gosnag maab koodu gvdwn si hvl bulv mwwnum.

³⁸Hvbmabde mwv bulam benum, “Nulv hoggab mooka-saqgob nyidwn? Hoggab nulug hang uralo soq mwum-soqum sam haam gvdwn?

³⁹Ngoqg all alaqsam kaato, ngo, ngo sulak. Ngam idaq gvdwl kaaka to, hoggab, nulv ngam kaag dvn hvbkalam oramv alo ayaq baqmadvn.”

⁴⁰Mwv sam bejo-ywwtwl, bulam mwwg all alaqkam kaakinum.

⁴¹Hvbsujaqkam bulv sija godab hvraqb mwwjw maanum; hoggab bulv hemp pol doosam mwwjw kumab mwwmo sosol doonum. Hoqgab mwv bulam toxnum, “Nulv hog dvs doog ma i?”

⁴²Bulv mwam xwwnul apnam ngui garg jinum.

⁴³Mwv ham nvvrwqnv bulug kaagaho dvnum.

⁴⁴Mwv bulam benum, “Ngo nulug lvgab hvraqb dooba do ho, soq tulu sam lak nulam ngo bekinnum, Mojes pvvblo, nyiqry benbo tulug pota tulu lo la Mwmin nwswrlo ngoqg pagoqkam hog mwlwngam xeqpwl apnamv niqtuq lengdwb doonum.”

⁴⁵Ho mwv dvrwq potangam cengm dvb bulug hangam pumb rwlwq tukul cenglaq mvknum,

⁴⁶hoo bulam benum, “Hoqhvb dvrwq potalo xeqpnamv doodwn, Kristo hentwr kaasngam hentayin, hoo loum deen aalam sinam hoqgv lokta gorab tayin,

⁴⁷hoo Jerusalem hoqgv jaq nyirab layil mwwg eminb mwwkurnam pagoqkam la nyic nyiangam kol xaqgub axia jinam Tugu Puiyam nyob luucw-luutwg agaho betam dvb nyitayin.

⁴⁸Nulv soq mwlwg hvvkib swwtayin

⁴⁹Hoo ngoqg Ab hog hvla xeq goorwl apnum, ham ngo nulug dookub kanam jitayin, hvbmabde nulv ao toloqgv atoram kaapa maad deedib nulv soq bopam so doodwb nyitayin.”

⁵⁰Kokw so mwv bulam Betani nampam ogum xaqb wggwl mwwg alaqkam irab banv bulam lvqc cinum.

⁵¹Mwv bulam lvqc cil doodu dvb mwam bulug galoqkv ao gvdab booca gvnkun.

⁵²Hoo bulv mwam xumnum hoo Jerusalemb hemp-hvnyir kunv wkur kunum,

⁵³hoo bulv looxiam xumk nam uraho Pwnboam poqdul doodu kunum.