Read Nyishi LUK 5 Bible Online

LUK 5 - Nyishi bible

LUK 5

¹Aal golo Geneseretwg swnyiq bviywrho doodu yukam nyi tulungv mwam hwwiyum tvl Pwnbog agam mam tadwb doonum.

²Mwv swp pwnyig swnyiq bviywrho kaapanum, ngui mengnbo nyi tulungv swpam apaqpel bulug wswqngam hwrxaq xoqdul doonyianum.

³Jisu soq swp pwnyig Simong swpwb caobanv mwam swpngam swnyiq bviywr hoqgv miceqgo urab tuulwq tvk hvl benum. Jisu nyi tulungam swp ura hoqgv dootwl tomswrnum.

⁴Mwv tomswr swrxo kokw so Simonnvn benum, “Swpngam meegta iss svrab tuulwql no la noqg ajin tulungv ngui mengdwb wswqkam hurlwqto.”

⁵Simon birwqnum. “Bir at ngulv soi yupw nyitwr tukul hog gokam nootu kuma. Hvbsujaqkam no begam gab, ngo wswq sam hurlwq kaatayin.”

⁶Kokw so nyi tulungv wswq tulungam gamjar svqtwqb nguiyv vijaqg wswqkam hurlwq tukul nootunum.

⁷Hoqgab bulv swp pwsaqho doonbo bulug ajin tulungam haagdvl bulam svka tvbwk hvl alaqkv hoqyab kobol benum. Bulv haaknv swp pwnyi bwbwho jot kvlwl yumyum-yamyam daqdwb ngui tulungam pvvlwq yukam swp tulungam issiv hinglup svqtwqb nyinum.

⁸Soq sam Simon Pitor kaatwl Jisug agaho lwbw kumbw tvl benum, “Ngo nyic-nyiabo nyiv, hoq gab At Sw, ngoqg ogum soqgv wggin to.”

⁹Simon mwv la mwwg lvgab yvba bo ajin tulungv hoq hwdgo ngui nootunam mam kaatwl lomnum.

¹⁰Simong ajin Jems la Jon Jebedig ko tuup vnyivkam hoqham lomnum. Jisu Simonnvn benum, “Bos maabv sija galoqkv no nyi tulungam nootu yinpv.”

¹¹Kokw so swp tulungam swnyiq bviywrho seelin ap tukul bulv hog mwlwngam apaqpel Jisug kokw kokwb wmin gvknum.

¹²Gv dorpw lo tviyiq nyil doonbo nyi akwg dook nampam golo Jisu aal golo doonum. Mwv Jisun kaapa daqxy kalam mwv mwwg agaho bumjo tvl swr-swrtwqb benum, “At, no mwp jib mwwd loqkam no ngam mwp jitayin.”

¹³Ho Jisu alaqkv irab banv mwam idaqtvl benum, “Ngo mwwdwn,” “Dvrwq tuku!” Ho dara tviyiqkv mwam apaq kunum.

¹⁴Jisu mwam benum, “Hiyv nvkam sam bekin maabv, hvbmabde nyub dookub ws wda gvdwl mwam hindy kvvdy kotwl Mojesg bekwb noqg alkunam mam nyiam kaakin dvb Pwnboam paqgdvl aky jita.”

¹⁵Hvbmabde Jisug puiyv vi viyab goopor kunv wiywq kunum, hoqgv mwam tal bulug vc apy hoqgv mwp kotab nyiv olum olumb mwwg dookub haanum.

¹⁶Hvbmabde mwv mooro cumciqb wbnv xuml doonu kunum.

¹⁷Aal golo Jisu tomswr swrl doodunum, Galili, Judiya gvla Jerusalem nampam pvmx hoqgv haanbo Parisi nyi tulungv la nyijwq-nyegam tomswrbo nyi tulungv mwwg ogumho doonyianum. Ho nyi vcam mam mwp dvb At Swg atorv Jisug lvgab doobanum.

¹⁸Nyi tuugin palgon sil doonbo ak guly ho jootwl nam urab joal mwam Jisug agaho joop dvb mwwnum.

¹⁹Nyi rolu ho vs-axaqko gab bulv mwam urab joa nyomanum. Hoq gab bulv mwam nam mwwlob jooca layil tapoqkam hoqko tvl mwam guly lvgab Jisug agaho nyi tulug dook maqra lvpajaqb tvpoql ap jinum.

²⁰Ho mwv bulug hwdjaqg mwwjwngam kaatwl nyi akam benum. “Ngoqg ajin noqg nyic nyia mwlwngam apaqjig yukun.”

²¹Pvvb tomswrbo nyi tulu ngvla Parisi tulungv bulv bemin sunum, “Hiyv yu soq nyi aksi Pwnboam soq sib bepaq beyaql bedwn? Hiyv nyiv nyic nyiangam axia jikin dvn, hvbmabde Pwnbo rooxo ngwtwq lak.?”

²²Jisu bulug mwwsnam mwlwngam cengtwl bulam benum, “Hoggab nulv nulug hang uraho hwwdul doodwn?

²³Noqg nyic nyia mwlwngam axia jipa kun. ‘Gorabtuk hoo wl yvtku hvnam yaangv bengam dvn yv’?

²⁴Hoq nyiloqkam nyic nyia mwlwngam axia jidwb gvda gvt so Nyia Ko Tuupv ator doodwn ham ngo nulam kaakin dvb nyidwn.” Hoq gabnvl mwv gv palgon sil doonbo nyi akam benum, ngo nam bedwn, gorab gvdwl noqg kartaq nanam jool wnku.

²⁵Ho nyi akv rwdwq-paqb bul mwlwg aga hoqgv gorab layil atwg kartaqngam joolayil Pwnboam paqjo kunv nammwb wknum.

²⁶Bul mwlw jaqkv lomtwr kaamangam lomnum! Bos sonyia banv bulv Pwnboam paql benum, “Soolo ngulv hwdjaqgo swrdorxeq ak kaat kuba!”

²⁷Soq kokw so Jisu lengknv Lebi ngvk hvl gvda nyooga kokar bo nyi akam mwwg gvda nyooga kol dook namho doodu dvb kaapanum. Jisu mwam benum. “Ngoqg kokw kokwb wmin gvto.”

²⁸Ho mwv gorab banv hog mwlwngam apaqpel mwwg kokw kokwb wmin gvnum.

²⁹Kokw so Lebi mwwg namho Jisug gabnvl koi alwb durum ak rumnum, hoqho gvda nyooga kokar bo nyi ata gola nyi asaqngv bulug lvgab doobanum.

³⁰Parisi nyi ata gola bulug dulu hoq Pvvb tomswrbo nyi tulungv Jisug buu tulungam todunum. Bulv toxnum, “Hog gabyu nulv gvda nyooga kokar bo nyi tulug lvgab la nwd xipa maanam nyi tulug lvgab dvba twwba dvn?”

³¹Jisu bulam birwqnum, “Vc cimabo nyi tulungv nyub loqmai mwwma dvn hvbmabde vc cinbo nyi tulungv nyub goqdwn.

³²Dvrwqb swwnbo nyi tulungam mwwkur tvk hvl betab ngo haama hvbmabde nwd xipa maanam nyi tulu gab.”

³³Nyi ata go Jisun benum, “Jonwg buu tulungv dvmab vrr rwdaq kvlaq dvn hoo swgwnam mam kam hvb nyidwn, hoqgv Parisi tulug buu tulu ngvkam nyinam akinam nyidwn, hvbmabde noqg buu tulungv dvd twwdo.”

³⁴Jisu birwqnum, “Nyem naak ho nyem naanbo nyi ak lvgab doonyia bo nyiin tulungam nulv dvma twwmab wwmdvb bekin yindo hvl nulv mwwd nvi yv? Hvbdi nyim keeram!

³⁵Hvbmabde moodv haatayin bulug galo bool wleq yukam hoq aalam bulv dvma twwma taikun.”

³⁶Jisu bulam soq doocnam sam bekinnum, “Hiyvkam nitbo kamt rum hoqgv vcwr go swrlin layil kucuqbo rumho hamtaq maadwn. Ham mwv hamtaq bvnyiloqkam, mwv nitbo kamt rummam puceqtayin, hoo nit hoqgv pulinamv kucuqbo lvgab kaataqram.

³⁷Ho uppum kucuqlo hiyvkam roo ala nitiam ap maadwn. Ham mwv ap bvnyiloqkam roo ala nitbo uppumv buqceq tayin hoo roo alangv biqxia tayin, hoo uppum mamkam muiyu tayin.

³⁸Hvbmabde roo ala nitiam uppum nitho toolwq gvdwl apto!

³⁹Hoo roo ala pookam mam twwxo kokwngam hiyvkam roo ala nitiam twwb mwwma dvn. Nulv bedwn! Pookamv alyadwn.”