Read Nyishi LUK 6 Bible Online

LUK 6 - Nyishi bible

LUK 6

¹Doonu dvk aal golo Jisu am rongo rwqtag rwqra jaqb wdul doonum. Mwwg buu tulungv am vmlywngam cwqbnv bulug alaqho keexaq banv ham dvl wnum.

²Parisi nyi ata gon benum, “Doonu dvk aalam pvvblo nyingam maanam bonam nulv hoggub nyidu dvn?”

³Jisu bulam birwqbanv benum, “Debid la mwwg nyi tulungv kano yukho hog bvxeq nyinum ham nulv poory maad nvi yv?

⁴Mwv Pwnbog nammwb haabnv mwv Pwnboam aky jinam wtwngam naabnv dvtwl hoo mwwg nyi tulungam kam jinum. Hvbmab, hiyvkam dvngam maadnvk hvl bedwn, hvbmab nyub arongv dvdwb nyidwn?”

⁵Hoqgv Jisu hvlakam bulam benum, “Nyia Ko Tuupv Doonu aal gvkam At Swb nyidwn.”

⁶Kokw so Doonu dvk aal golo Jisu Sinagog nam urab haabnv tomswrnum. Uraho alaq lvqbwqkv singtw talol laqyabo nyi ak doonum.

⁷Ho Pvvb tomswrbo tulungv la Parisi tulungv mwam kaagab jinjinum, mwv Doonu aalam mwpnam mam kaadwb, ho bulv mwwg pagoq nyixiaqkam kaapal yolu bigw naadwb.

⁸Hvbmabde Jisu bulug mwwsnam mam cengtvl alaq laqyabo nyi ak ham benum, “No gorab gvdwl lvpajaqso daqto” Hoo nyi akv gorab banv hoqho daqnum.

⁹Ho Jisu bulam benum, “Ngo nulam toxdvn, Doonu dvk aalam hog nvkamxeq nyitwk hvl ngulug Pvvblo bedwn? Svka tvk hvla yv ma un mvg tvk hvl yv? Nyi akwg swwgam ywwlin tvk hvl yv ma ham twrm tvk hvl yv?”

¹⁰Ho mwv nywkur banv bulam kaatwl, hoq nyi akam benum, “Noqg alaqngam ilinto.” Hoo mwv alaqngam ilin yin mwwg alaqkv lokta al kunum.

¹¹Ho bulv hang lingtwr banv Jisun hoggub mvbnyiloqkam altayin ham bulug pengko ho hwwrab nyanum.

¹²Hoq mood ho Jisu xumtab puutu golo caabnv hoq ai yupwho Pwnboam swgw gwwl doodunum.

¹³Huto yukam mwwg buu tulungam goqanum hoo bulug pengko hoqgv wyw leq vnyi gon xuqlinl ham mwv kanamnam tulungv hvl goqnum:

¹⁴Simon (hiyam mwv Pitor hvlakam eminum) hoo mwwg bor Andriyo, Jems Jon, Pilip ho Bartolomiyu,

¹⁵Metiyu la Tomas Alpiyus gv ko Jems, Simon (Mwam at gvdangam hang cinbo hvl benum.)

¹⁶Jemsig ko Judas, nyepinbo Judas Iskeriot.

¹⁷Yorn hoqgv bulug lvgab ipoq laikul Jisu mwwg buu acam gv lvgab haapa golo daqgnum. Judiya gvla Jerusalem gvda mwlw hoqgv la Taiyar gvla Sidon swnyiq bviywr hoqgvkam;

¹⁸bulv mwwg tomswrnam mam tata bvla bulug vc apy mwlwngam mwp kodwb nyiv vijaqg hoqho haal doonum. Ig oram nootunam nyi mwlwngv vijaqg haabnv mwp konum.

¹⁹Mwwg galo atorv lengl bulam mwlwngam mwp jigam gab nyi mwlwngv mwam gvbw tvnam gob nyinum.

²⁰Kokw so Jisu mwwg buu tulungam kaanv benum, “Jwwgw nyi tulu nulv jaqmolo hemp ponam jaqkv, hoggab Pwnbog lvpwngv nulug gab doodwn!

²¹“Sijag kano bo nyi tulu nulv jaqmolo hemp ponam jaqkv, hoggab nulug ayeqngv bwwtayin! “Sijag xabn bo nyi tulu nulv jaqmolo hemp ponam jaqkv, hoggab nulv nyirtayin!

²²Nyia Ko Tuup gabnvl nyi tulug oyumnam, haqpaqnam, tob-tainam, ho almak hvl benam nyi tulu nulv jaqmolo hemp ponam jaqkv!

²³Hoq hvb nyiyi nyiloqkam nulv hemp pogdvl hwnyir-hvmar gob soomin to, hoggab nulgab ao gvda tv soq sib jis koi albo ak ap pan. Hoqgab bulug ab ann tulu ngvkam soq nyinam akin sam nyiqry benbo tulungam kam nyinum.

²⁴“Hvbmabde sijag nyet tvnbo nyi tulu nul gabnvl hvkam bvxeq hentwr-kaas jaqkv; hoqgab nulv hemp pomin banv swwnyia nukun.

²⁵Sijag dvmin twwmin doonbo nyi tulu nul gabnvl hvkam bvxeq hentwr-kaas jaqkv! Hoggab nulv kano nootayin!

²⁶“Nyi tulungv aljaq pak hvl benyanam nyi tulu nul gabnvl hvkam bvxeq hentwr kaasngv hog gabnvl nyi tulu ngamkam soq luukin sam nyijnum.

²⁷“Hvbmabde ngoqg benam mam tanbo nyi tulungam ngo nulam bekin dvn, nulam ceebio baqnbo nyi tulungam aby boto. Nulam oyum bo nyi tulungam anyab nyijto,

²⁸Nulam beenbo tulungam lvqc cito hoqgv nulam nyic nyia nyinbo nyi tulug gabnvl xumj to.

²⁹Hiyv akgon nam nyuqm mam pitaql mvbnyiloqkam taqgin hamrub mwam pitaq mvto, hiyv lajaqkam noqg kamtam naareq yinyiloqkam mwam noqg lvlwq ngamkam naamto.

³⁰Ho nam nyi ak hog koi nyiloqkam bulam mwlwngam jito, hoqgv hiyv akgon noqg dvrab-pacab pam naai nyiloqkam, hoqham akvkam jikurtuk bvk hvl komab.

³¹Nyiv hogbvxeq nyiyam nulv hang hinglwqdvn hoq hvbkalam nulv bulam nyilwq kalam to.

³²Nulam aby bonbo nyi tulungam xeq nulv aby bolwq kalam twqbnyiloqkam, hoggab yu nulv lvqc cinam loqmai yv mwwkin dvn? Nyic nyia nyinbo nyi tulu ngvkam aby bon boamkalam bulv aby bolwq kalam dvn!

³³Hoqgv nulam alwb nyijbo nyi tulungam xeq nulv alwb nyitwq bvnyiloqkam hog gab yu nulv lvqc cinam loqmai yv mwwkin dvn? Nyic-nyia nyinbo nyi tulu ngvkam hoq hvkam nyiaq dvn lak!

³⁴Hoqgv ceetwl jikur nyokin sudbo nulug mwwnam nyi tulungam xeq nulv cwwrwqtwqb nyiloqkam hog gabyu nulv lvqc cinam loqmai yv mwwkin dvn? Nyic nyia nyinbo nyi tulu ngvkam ceenam mam nookur dukub hvnv nyic nyia nyinbo kalam mam cwwrwq haqd nvlak!

³⁵Hvbmabde nulam ceebio hang baqnboam nulv abyto hoo bulam alwb anyab nyito, cwwrwqto hvbmabde hog gokam nookur tuknvp mwwma bvka. Nulug lvqc naasv xitor jaqgo doodwn. Ho nulv mwlwjaqkam koi Yaanbo Pwnbog koob nyitayin. Hoggab mwv koam aya mwwpa dvn.

³⁶Nulug Abwg anyanam hvbkalam nulvkam anyato.

³⁷“Nyiam pw-hwwma bvka, hoo nulamkam Pwnbov pw-hwwram, Nyiam bepaq-taiyaq maabka, hoo Pwnbov kam nulam bepaq-taiyaqram, Nyiam axia jilaka, hoo Pwnbov nulam axia jitayin.

³⁸Nyiam jito hoo Pwnbov nulam jitayin nulam laleq dvb nulug jinam hwdkalam go nulug alaqho gvqlwq tayin. Nulv hognvkam nyiam xil jin pan hoqho Pwnbov kam nulam xil jintayin.”

³⁹Ho Jisu bulam soq doocnam sam doocil benum, “Nyiqca bo nyiv nyi nyiqca bo akwn bool wg nyoma dvn, mwv bool wg bvnyiloqkam bulv vnyi vnyiv ung golo yoqlwq tayin.

⁴⁰Tomswrnamv Tomswr boam koi yaama dvn hvbmabde tomswrnam vcw atv hog mwlwngam cingyum yukam bulv tomswrbo hvbkalam nyitayin.

⁴¹Hvbmabde atwg vnyiq uralo doonbo nyiqwr cwrt alboam kaaxaq tvs mwwma jaqb, hoggab no noqg bor vnyiq uralo doonbo nyiqwram kaadwn?

⁴²Noqg vnyiq uraho nyiqwr cwrt alboam kaapa maapel no hoggub bela dvn borv, noqg vnyiq nyiqwram kaatws hvl benyi tayin? Gwwnbo no! Otuqcob no noqg vnyiq nyiqwr koi alboam naalinto hoomo lo no dardarjaqb kaal noqg borwg vnyiq uraho doonbo nyiqwr cinyio boam naalin tayin.

⁴³“Albo svvnv aaxy almanbo xeema dvn, ho almab svvnv albo aaxy xeema dvn.

⁴⁴Svvn nwwcw nwtam mwwg aaxy xeenam hoqgv sulak cengsdvn, nulv taoq svvn hoqgv taa aaxiam puma dvn hoq maabnyiloqkam roo liinam aaxiam taa svvn hoqgv puma dvn.

⁴⁵Albo nyiv atwg hang uralo doonbo albo noosu hoqgv alboam naalin dvn, almab nyiv kalam atwg hang uraho doonbo almab noosu hoqgv almabam naalin dvn. Hoq gabnvl atwg hang uraho hog nvkvxeq doodwn ham sulak nyig agam ho bedwn.

⁴⁶“Ngo nulam hog hvla xeq bedwn ham tama peel hog gabyu nulv ngam, At Sw, At Sw,’ hvl goqdwn?

⁴⁷Hiyv lajaqkam ngoqg dookub haal ngoqg benam agam tulungam tatwl ham bugil swwn boam mwv hvbjaq nyidwn ngo nulam kaakin dumtayin.

⁴⁸Mwv nam mvnbo nyi hvbjaq nyidwn mwv ura jaqb dulwq banv lwwn aolo nammam mvnum. Pobungv diidwr wbnv nammam tubsbakam diidwr issiv ham biidbvkam mvnyi maanum.

⁴⁹Hvbmabde ngoqg benam agam tulungam tatwl ham bugi maab nyi akv mwwg nammam xuqx aoho mvnbo jaq hvb nyidwn diidwr issiv tobnv nammam todaq yukam vnwq alwb tabdwn. Hoq namhv vcjaqb yal dul tabto kunum!”