Read Nyishi LUK 7 Bible Online

LUK 7 - Nyishi bible

LUK 7

¹Jisu soq benam mwlwngam nyi tulug lvgab goolin peekul Kaparnahum wknum.

²Hoq gvdaho Roman saab akwg tula maanam nyerangv ter gil sisv twqb nyil doonum.

³Saab akv Jisug puiyam tapa tvl haagdvl mwwg nyerangam mwp tvbwk hvl mwam goqta hvl mwv Juhudi nyiilo nyi ata gon kanamnum.

⁴Bulv Jisug dookub haabnv mwam ceceq jaqb mvnyi-moiyul benum. “Soq nyi aksi noqg svkangam meegaqdo.

⁵Mwv ngulug nyi tulungam abydvn hoo mwv atv ngul gab Sinagog nammam mwjnum.”

⁶Hoqgab Jisu bulug lvgab wbanum mwam bekin mvdwb saab akv ajin tulungam kanambo mwv nam hoqgv aado kumanum. “Tomswr bov no atv hentwr kaanyib nyimabv, hoggab ngoqg nam urab nam ngo svgagvrwql haam dvb ngo hvkwg nyi maasu,

⁷hoqgab no haama jaqkam alv. Hvbmabde gomcwr lo bilwqto, hoo ngoqg nyerangv al yinpv.

⁸Hoggab ngokam saab koibo tulungam bugil swwnbo nyiingv, hoqgv ngoqg alaqb ngo sipai tulungam doog gvdwn ngo soq akam ‘Wn!’ hvl gaml jiyikam mwv wdwn, ngo hoq akam ‘Haato!’ hvl gaml jiyikam, hoqgv mwv haadwn hoo ngoqg nyerangam sam nyito hvl gaml jiyikam, hoo mwv ham nyidwn.”

⁹Jisu mwv sam tatwl lomnum, mwv nywkur banv nyi tulungam benum, “Ngo nywywngam soq svk mwwjwbo cengtkuma ngo nulam bekin dvn, Israel nyob tulug pengko hookam doomanum.”

¹⁰Daaxar xarnbo tulungv saab nammwb hookur laikul mwwg nyerangam al dukub kaapanum.

¹¹Oyu maadab Jisu Nayin nampam ngvk hvl benam nampamb wnum, mwwg buu tulungv la nyi pvtw twwg mwwg lvgab wmin gvnum.

¹²Mwv nampamg lvmbwqngam wc twqda kalam svma jootwl nyi ata go svma liitab lingrwqnum. Hoq sinbo nyi akv xwwmy akwg ko tuup akin ciqnyingv hoo nampam hoqgv nyi pvtw twwt al twwg mwnwg lvgab soomin gvnum.

¹³At Sw hoq nyem akam kaapa twqda kalam mwwg hangv mwn gab ceceq jaqb biinv mwv mwnwn benum, “Xamab.”

¹⁴Kokw so mwv ogumb wnwqnv hulungam idaqnum, hoo svma joonbo nyi tulungv romol doonum. Jisu benum. “Yaapa! Ngo nam bedwn, Gorabtuk.”

¹⁵Sikbo nyi akv gorab kunv agam goorabnum hoo Jisu mwam mwwg annam jikur kunum.

¹⁶Vcw atv ceceq jaqb bos sonyia banv Pwnboam paqnum! “Koi albo nyiqry kaanbo nyi ak ngulug pengko si haapa ku!” Ho Pwnbov mwwg atwg nyi tulungam ywwt ywwtab haapa ku!”

¹⁷Jisug soq pui si Judiya gvda bvla ogumho doonbo gvda vxib wknum.

¹⁸Jonwg buu tulungv mwam soq pui mwlwngam bekinnum Jon bulug vnyi gon mwwg dookub goqa banv

¹⁹At Swnvn tox mvdwb bulam kanamnum, “Haady bo nyi akv no yv, hvb manyiloqkam ngulv nyi asaq gon hvraqb kaaya yaadwb nyitayin yv?”

²⁰Bulv Jisug dookub haabnv benum, “Jon Baptist ngulam taka taak hvl kanam pan. Haady bo nyi akv no yv mwam toxnum. Hvb manyiloqkam ngulv nyi asaq gon hvraqb kaaya yaadwb nyid nvi yv?”

²¹Hoq moodho Jisu vc-apybo, ig oram hoqgv nyiam vijaqg mwp jinum, hoqgv nyiqca bo tulungv nyiqbiol kaapa dvb mwpnum.

²²Mwv Jonwg buu tulungam birwqnum, “Hognvkam nulv kaanam hoo tanum ham wkur gvdkul Jonnvn bekinta nyiqca boam nyiqbio dukub, ruutar boam tapa dukub, lvca boam wdkub, tviyiq boam dvrwq dukub ho sik boam turdkub mwp duku, hoqgv Tugu Puiyam jwwgw nyi tulungam betam gvnkun.

²³Ngam mwum maanbo nyi akv jaqmolo hemp ponam jaqkv!”

²⁴Jonwg daaxar xarnbo tulungam wxo mvtkul kokw so Jisu nyi tulungam Jonwg pagoqkam bekinnum, “Hwdlo nulv Jonwg lvgab deexa-rarab wnya dvkho, nulv hognvkam kaadwb mwwnum? Dooi yidinam nwmw tulungam i?

²⁵Nulv hognvkam kaatab wnum? Vj nyinyiaq bvcaq boam koonbo nyi akgon yv? Kaato, hoq hvb kwlwq-kvlaq boam kootwl hemp-hengamb swwnbo nyi tulungv lvpw atwg nam hoolak kaapa dvn!

²⁶Nyiqry kaanbo nyi akgon yv? Vv, ngo nulam bekin dvn nyiqry benbo nyiamnvn koi yab nyinbo nyi akgon nulv kaanum.

²⁷Kaato, soq si ngoqg gumtwngv Pwnbov bedwn ngo mwam noqg otuqyab wl lamtangam mwx-mvaql ngoqgab mvp yatwk hvl kanam tayin.

²⁸Ngo nulam bedwn, Jonnvn dwrbuqnam otuqho nyi mwlwngam koi yaadwn hvbmabde Pwnbog lvpw haty lo mwlwngam anyo yaanbo akv mwam koi yaadwn.”

²⁹Nyi mwlw ngvla gvda nyooga kokar bo nyi tulungv mwam tapanum hoqgab bulv Pwnbog lootwngam cengknv Jon Baptist galo baptijum naaknum.

³⁰Hvbmabde Parisi nyi tulu ngvla nyijwq-nyegam tomswrbo nyi tulungv Pwnbog pagoqkam bulv atv haqxianum.

³¹Hvnyiloqkam sija ngo swnyw-soolog nyi tulungam hognvk lvgab doocil betayin? Bulv hiyvg hvbyu nyidwn?

³²Kwm-kor mvk haty lo doonyia tvl akwn akwn goqmin subnv himy tulu hvbjaq bulv nyinya do, ‘Ngulv nulug gabnvl nyem naayam nyem xabnam mam xabtkun, hvbmabde nulv noso soomanum! Ngulv nyix-riis jaqkam nulv xabmanum!

³³Hoqgab Jon Baptist haabnv vcin-opo dvma twwmab vrr rwl doosbakam nulv mwam bedwn mwv rugaqbo nyiv sulak hvl benum.

³⁴Nyia Ko Tuupv haabnv dvb la twwb nyinum hoo nulv benum, soq nyi aksam kaaka to! Mwv dvlam bvla opo twwnbo nyi go, hoo mwv gvda nyooga kokar bo nyi tulu ngvla nwd xipa maanam nyi tulug ajin go!

³⁵Hvbsujaqkam lootwho nyi tulungam Pwnbog nyijwq-nyegam mam mwwjwbo tulungam kaakin dvb nyitayin.”

³⁶Parisi nyi akv Jisun mwwg lvgab oyum mam dvnam dvmin gvla bvk hvl goqnum. Jisu mwwg nammwb haabnv dvnam dvtab doonum.

³⁷Hoq nampamho nyic nyia nyil swwnbo nyem ak doonum. Hoq nyem akv Jisug Parisi namho dvnam dvl doodu dvk hvl tapanum, hoqgab mwn uppum golo sungam albo alabastar kutiam joolayil

³⁸hoo Jisug lvpia lwkw langk ho daqtwl xabl mwnwg vnyiq nyiqsv Jisug lvpiangam juja bviya dvb diyaqnum. Kokw so nyem akv mwwg lvpiangam mwnwg dum lvgab niiptvl lvpiangam moopupnum, hoo sungam albo kutiam alboam paqnum.

³⁹Jisun goqnbo Parisi akv mwwsnum, “Soq nyi aksi nyiqry kaanbo nyiv jaqnyiloqkam mwam gvbwbo nyem akv hog nyic-nyiangam xeq mwn nyil mvl swwdwn hoq mwlwngam mwv cengs yindo!”

⁴⁰Jisu mwam birwqnum, “Simon ngo nam ngo hog bes ak doodo” “Vv, tomswrbo, beto” mwv benum.

⁴¹“Nyi ak golo twngk narnbo nyi vnyi go doonum” hvl Jisu berabnum, “Nyi akwnv mwwg galo lwwng go ceenum, hoqgv akwn kalam camngo go ceenum.

⁴²Nyi vnyi bwbwngv ak gonkam mwam twngk kvvlwqngam daqnyi kumab nyigam gab mwv vnyi bwbwngam twngk kvvlwqngam nookur kumab axia jiknum. Hoqnyiloqkam hoglo akv mwam ceceq jaqb aby bobin tayin?”

⁴³Simon birwqnum, “Ngo mwwdo” “Vijaqg axia jinam ak hv” Jisu benum, “Noqg birwqnamv kvtaq pa.”

⁴⁴Ho mwv nyem dookub nywkur banv Simonnvn benum, “No soq nyem aksam kaas i? Ngo noqg nammwb haas tvbakam, no ngoqg lvpia gab iss jimanum, hvbmabde soq nyem aksiya ngoqg lvpiangamnvn mwnwg nyiqsv hwrxaqtvl mwnwg dumpo dum lvgab lvpiangam niip jipan.

⁴⁵No ngam moopupl svgagvrwq maanum, hvbmabde ngo haad jaq hoqgv soq nyem aksi ngoqg lvpiangam topaq maab moopup pupdul doonum.

⁴⁶No ngoqg dumpo lo kuty neemanum, hvbmabde mwn ngoqg lvpiangam sungam albo kutiv paqg nukun.

⁴⁷Hoqgab ngo nam bekin dvn, mwnwg hvd jaqg abynamv mwnwg nyic nyia mwlwngam axia jignvk hvl kaakin dvn. Hvbmabde hiyv lajaqkam axia jinam mam vcwr koggo cengtwqbo nyiv vcirko kalam go abynam mam kaakin dvn.

⁴⁸Kokw so Jisu nyem akam benum noqg nyic nyia mwlwngam axia jig yukun.

⁴⁹Mwwg lvgab tebolho dooba bo nyi asaq tulungv bulug pengko ho bemin sunum “soq nyi aksi hiyv yu?”

⁵⁰Hvbmabde Jisu nyem akam benum, “Noqg mwwjwngv nam ywwt ywws gvnkun, swrsomalob wnku.”