Read Nyishi LUK 8 Bible Online

LUK 8 - Nyishi bible

LUK 8

¹Ho meeg apo go kokw so Jisu nampam gon hoqgv nampam gonwb wnv Pwnbog lvpwg Tugu Puiyam betam tamkarnum. Buu wyw leq vnyiv mwwg lvgab wmin gvnum.

²Hoqgv gwr-sony alaq lo vc apy hoqgv mwpnam nyem acam gokam mwam wmin gvnum. Soq nyem benyanam acam soqg akwnho uiyv kvn paqta go ruqxa jinam Magdalin hvl benam Meeri;

³hoqgv Herod lvpwg yolu bikuml nyel namlo ho doonbo Cujag nywxw Joana, la Susanna la ho nyem asaq mwlwngv mwwg lvgab yvbanum. Soq nyem acam si bulug at swwnam-geenam hoqgv Jisu nvla mwwg buu tulungam hindjaqb cinam honam mam nyinum.

⁴Nampam pvmci-pamt hoqgv doolwg nyiv haabnv mwwg dookho hwwt yukam Jisu soq sam doocil benum.

⁵“Nyi ak mwwg ammam liitab wnum. Mwv ammamnvn rongo ho paqnum. Hoqgv am tuugin lamta wga ho hopyin atv caajabnum, hoo pvtangv ham pal dvnum.

⁶Tuugin wlw aolo hop kunum hoqgv kokw so swwrab yukam kediv bampam maagam gab bulv huutwr kunv sengknv sinum.

⁷Am tuugin taa-haageqho hopnum hoo nwmw nwsinv bulug lvgab swwrab ming kunv bulam swwceq tukul siknum.

⁸Hoqgv am tuugin ked alko golo hopnum hoo hv svvnwb swwrab kunv lwwg lwwg goqb vmlyw ywwci ywtv vmcwr baqknum. Hoqgv Jisu benum, “Hvnyiloqkam nulv nyuru baqd nyiloqkam sam hindib tagabto.”

⁹Jisun mwwg buu tulungv soq doocil benam pagoqkam toxnum.

¹⁰Jisu birwqnum, “Pwnbog lvpwg mwwnam puucw jaqkam nulam cengm dvb jigyin, hvbmabde nyi tuuginv kaatlakam kaacin maab tatlakam tacin maab nyikam twqto mwwnv bulug aoho soq sib doocil bekin gvdwn.

¹¹Hoqgab soq doocil benam si hoq hvblak pagoqkv doodwn. Am vmcirv Pwnbog agamv.

¹²Lamta agaho hopbo am tulu si soq sam tanbo nyi tulug nyinam hvbjaq nyidwn, hvbmabde bulam mwwjw jwwl ywwlinam mam naamram mwwbnv uiyv haabnv bulug hang ura hoqg agam mam naareql wg dukun.

¹³Lwwtaq aoho hopbo am tuluhv soq sam tatwl hemp pol agam mam naanbo nyi tulug hvbjaq nyidwn. Hvbmabde bulug mvvmiangv guugab nan dooma ko-gab, bulv apo gob mwwjw kokw so pooka-yirka moodv haada yukam bulv bwdw hod kun.

¹⁴Taa-haageqho hopbo am tulungv soq sam tanbo nyi tulug hvbjaq nyidwn, hvbmabde bulv swwca yukam nyet nyeram bvla hemp-hengam kvdab nyil swwgam gab bulug vmlywngv niqtuq lengma dvn.

¹⁵Ked alko ho hopbo am tulungv agam mam tatwl alwb nyil swwnbo nyi tulug hvbjaq nyidwn.

¹⁶“Hiyvkam muram rwgab tvl pwcw uralo kulubl ap maadwn hoo kartaqnan niikum hookam tvp kama dvn. Hvbmabde urab haanbo nyi tulungam hutongam kaapa mvdwb mwwnv mwv muram mur tvpkolo tvpdvn.

¹⁷Hoqgab hutob naalin deemanam dvrab haag jijaqkam kvsil dooma dvn, hoq ao hoqgv cengd maanam bvla bepor maadynam dvrab haag jijaqkam dooma dvn.

¹⁸Hvnyiloqkam nulv hog bvxeq tatwn, ham hvvminto, hoggab hiyv lajaqkam hog ak doogbo nyi ak ham vijaqg jiky dvb nyidwn, hvbmabde hiyv lajaqkam hog akam doogmab nyi ak hoqgv mwwg hog meceqgo doog dvb mwwnam hamkam naareq keedwb nyitayin.”

¹⁹Jisu mwwg annv la mwwg bor tulungv mwwg dookub haanum, hvbmabde nyiv dumtwq-miilyw ko-gab bulv mwam kaapa mins lamanum.

²⁰Nyi akgon Jisu benum, “Noqg ann la bor tulungv nam kaatab aga vv doodu do.”

²¹Jisu bulam benum, “Pwnbog agam mam tal bugil swwnbo nyi tulungv ngoqg ann bvla borwb nyidwn.”

²²Aal golo Jisu mwwg buu tulug lvgab swp golo caobanv benum, “Kuj ngulv swnyiq kvtin gonwb wnya nuj.” Hoqgab bulv wrab nyanum.

²³Bulv swp gol wdul dooikam Jisu yubdunum. Hoo pwd dooi poot al poog swnyiq aoho nwwkub-nwwxeql swp koolam issiv bwwrdvb nyirab banv bulam mwlwngam sig tanum.

²⁴Nyi tulungv Jisug dookub haabnv mwam muu nv benum, “Bir atv, bir atv! Ngulv sisv twqb nyidul doodkun!” Jisu huurab banv cooikab dootwk hvl dooiyam la issam gaml jinum, hoo swrsomalo kunum.

²⁵Kokw so mwv buu tulungam benum, “Hogloqho nulug mwwjwngv?” Hvbmabde bulv loml hoo bosnum, hoo akwn akwn bemin sunum. “Soq nyi ak si hiyv yu? Mwv gaml jida kalam dooi-issiv kam mwam tado!”

²⁶Bulv Galili haabo tingtw jaqho doonbo Gerasen nyi tulug gvdaho wc kunum.

²⁷Mwv swnyiq deetamb cao twqx kalam rugaqbo nyi ak Jisun nampam hoqgv juqrwqnum. Mwv otuqjaq hoqgv vj koomanum, hoo nam lookam doomab nyinum hvbmabde mwv nyubu buutaqlo doonum.

²⁸Hwdlo mwv Jisun kaapa yin, mwv vc alwb sogoq goqnv mwwg agaho geqp banv benum. “Mwlwngam koi yaanbo Pwnbog Ko Tuup Jisu! Noqg lvgab ngo hog nvk bon nyisv doodwn? Ngo nam mvnyi-moiyul bedwn ngam anya kaasar gob mvmabv!”

²⁹Jisu mwwg gv hoqgv ui almabam ruqxa jiyikam mwv soq sam benum, otuqjaq hoqgv soq si mwam nootu keenum, hoo mwam lyoqdwr gai lvgab mwam lees bakam mwv lyoqdwr gai tulungam duqpwqnum. Hoqgv mwam uiyv diixa-rara cumciqb seel wgnum.

³⁰Jisu mwam toxnum, “Noqg eminv hoggv?” “Ngoqg eminv Mvqlw Acamv,” hvl mwv birwqnum. Hoggab uiyv vijaqg mwwg gv urab haanum.

³¹Mwv bulam kaalv jema bo bwdwb innwk hvl kanam maabwk hvl bulv Jisun mvnyi-moiyul benum.

³²Hoq diitaq yorn aoho iriq pvtw twwt al twwg ww dudul daqnum. Bulam hoq iriq riqcamg gv urab haam dvb jit bvk hvl ui tulungv Jisun mvnyi-moiyul benum, hoo mwv bulam wwm dvb jinum.

³³Hoq gabnvl ui tulungv nyi ak hoqgv leng layil iriq tulug urab haaknum. Iriq riqtwngv swnyiq deetam hoqgv wlw lwwtaqb ngurl laikul swnyiq uraho holwql sinum.

³⁴Hoq hvb nyinam mam kaapel iriq kaaya bo nyi tulungv keknv nampam hoola gvdaho puiyam bekinnum.

³⁵Hog bvxeq nyinum ham kaatab nyi tulungv wnum. Bulv Jisug dookub hvvnwq banv ui tulug wleqnam nyi akam vj kootwl Jisug lvpia lwkw ho doodwb kaapa nyatwl bosnum.

³⁶Nyi akam hog bvxeq mwp kunum ham kaanbo nyi tulungv nyi tulungam bekin kunum.

³⁷Kokw so bulv ceceq jaqb bosbanv Gerasen nyi tulu mwlw jaqkv Jisug dookub haabnv hoqgv wn kuk hvl bulv benum. Hoq gabnvl Jisu swp urab caaknv wleqnum.

³⁸Ho ui tulungam ruqxanam nyi ak hv Jisun benum, “Ngam noqg lvgab wdwb jila bv.” Hvbmabde Jisu mwam benum,

³⁹“Nammwb wkur gvdkul Pwnbov hognvkam noqgab nvl nyij pakun ham bekin ta.” Mwwg gabnvl Jisu hognvkam nyij pakun ham nyi akv nampam lvpajaqb wknv bekin kunum.

⁴⁰Jisu swnyiq taqgonwb wkur yukam mwam kaaya yoodul doonbo nyi tulungv mwam alwb haatwk hvl svgagvrwqnum.

⁴¹Kokw so Jairas ngvk hvl benam; Sinagog nam hoqg saab ak haanum. Mwwg nyem ko jwrtum akinv sita ko-gab mwv Jisug lvpia lwkw ho geqp banv mwam mwwg nammwb wtwk hvl mvnyi-moiyul benum,

⁴²nyem ko akv vnyw camleq nywnyi gob nyinum. Jisu wdul dooikam taqg-loosaq hoqgv nyi tulungv mwam hwwlubnum.

⁴³Vnyw camleq nywnyig vrr ui sarl dook bo nyem ak doonum, mwn mwnwg swwnam mwlwngam dvab nyub tulungam hiqxin kunum, hvbmabde hiyvkam mwnwn mwp nyomanum.

⁴⁴Nyem ak hv Jisug langkwb haabnv mwwg vj laqyapam gaqka kalam mwnwg namc ui sarn bov nyiory jaqb svrnyin kunum.

⁴⁵Jisu toxnum, “Hiyv yu ngam gaqka bov?” Vcw atv cengma jijaqk hvl benum, Pitor benum. “Bir at, nyiv mvqlwjaqb noqg taqg-taqsaqb nam hwwiyum palak.”

⁴⁶Hvbmabde Jisu benum, “Nyi akgon ngam gaqkapa, hoggab ngoqg ator lengnam mam ngo cengtba.”

⁴⁷Ngam cengs duk lanyik mwwnv nyem akv tvmdwr dwrbnv Jisug lvpia lwkw ho geqp kunum. Hoq gabnvl mwn gaqkanum hoo hoggub mwn gaqka kalam ho dara al kunum, ham mwn nyi vcw atwg agaho Jisun mwn gaqkanum hvl bekinnum.

⁴⁸Jisu nyem akam benum, “Ngoqg nyem ko, noqg mwwjwngv nam aldvb mwp paku swrsomalob wnku.”

⁴⁹Jisu soq sam bidul doodwkho saab nam hoqgv daaxar xarnbo ak haanum. “Noqg nyem kov sinkun,” mwv Jairasnvn bekinnum, “Tomswr boam bidwq bek jik maab.

⁵⁰Hvbmabde Jisu sam tapa tvl Jairasnvn benum, “Bos maabv; mwwjw twqto, hoo mwn altaikun.”

⁵¹Kokw so nammwb haabnv Pitor, Jon hoo Jems la nyem ko ann ab tulungam bepa maabjaq hiyv nvkam mwwg lvgab urab haamin gvdwb jimanum.

⁵²Nyi mwlwngv nyem ko akgab bulug haabongam cedin cedin banv xabl doonum. Jisu benum, “Xamabv ko akv sima sulak mwn yubngaql doodwn!”

⁵³Bulv nyem akam sinkun hvl ceng gam gab bulv mwam nyirnyi nyiryanum.

⁵⁴Hvbmabde Jisu nyem ko akam alaqkv purab banv benum “Ko, gorabtuk!”

⁵⁵Nyem ko akwg yalv hookur yukam cox alwb gorab kunum hoo Jisu mwam hog dvslo dvm dvb jitwk hvl bulam benum.

⁵⁶Hoqho nyem ko ann abv deedy jaqgok bo hvl mwwnum, hvbmabde hognvkv nyinum ham hiyv nvkam bekin maabwk hvl bulam Jisu benum.