Read Nyishi LUK 9 Bible Online

LUK 9 - Nyishi bible

LUK 9

¹Kokw so Jisu buu wyw leq vnyiam goqkum goqpa banv ig oram mwlwngam ruqxa mvdwb hoo vc apy bo mwlwngam mwp mvdwb huqlw ngamla gvmr agam mam jinum.

²Ho bulam Pwnbog lvpwngam betam tamkar mvdwb la nyoiyam mwp mvdwb kanamnum.

³Mwv bulam benum. “Nyoyw wikam nulug lvgab hog gokam bvvmab, beqnyia gokam, cuk gokam, dvs gokam, twngk gokam, hoo lvlwq rumnyi gokam baql wg maabv.

⁴Hoglo jaqkam nulam haatwk hvl bek nam namkinho nulv wleq maad deedib doota.

⁵Hoglo jaqkam nyi tulungv nulam alwb haatwk hvl bemako bopam mam bulam sigv hvl kaacin dvb nulug lvpiag diimwram dudin peel wleqta.”

⁶Kokw so buu tulungv nampam pvmxib wknv Tugu Puiyam betam tamkar kunv nyook mwlwho vc cinbo nyi mwlwngam mwp jiknum.

⁷Hoq apo ho Galili gvdag Jisug nyinam mwlwngam Herod lvpw at tapanum, nyi tuugin betamnam mam mwv sam mwwbwq nyomanum. “Jon Baptist turkur paku.”

⁸Ilija haapa kunwk hvl nyi tuugin benum, nyi tuugin kol kolwg nyiqry benbo tulug akgon turkur paknvk hvl benum.

⁹Herod benum, “Ngo Jonwg dumpongam pvriqnum, hvbmabde ngo soq pui tanam nyi ak si hiyv yu?” Hoo mwv Jisun kaaky tvnam gob mwwnum.

¹⁰Hvvky tulungv hookur kunv bulug nyinam mvnam mwlwngam Jisun bekinnum. Mwv bulam mwwg lvgab wgnum, hoqgv bulv vpwb Betsaida nampam mvk hvl benam hoqb wnum,

¹¹Nyi tulungv sam tapa tvl bulv mwam wmin gvnum. Mwv bulam alwb haatwk hvl benv, Pwnbo lvpwg pagoqkam bekinnum, hoqgv mwp tvbsv mwwnbo nyoi tulungam mwp jinum.

¹²Doonyiv haasv twqb nyirab yukam buu wyw leq vnyiv mwwg dookub haabnv benum, “Soq diis-paapso doonbo nampam bvla rongo rwqtaqb wl bulam yubk kark meel dvnam twwnam kol dvm-twwm dvb nyi tulungam wm dvb kanamto.”

¹³Hvbmabde Jisu bulam benum, “Nulv atv bulam hog dvs lo ak dvm dvb jito.” Bulv birwqnum. “Ngul mwlwg doognamv wtw taqang gola ngui cinyi gotwq. Soq nyi hwd mwlwsam dvm dvb no ngulam wgdvl dvs-twws lo rvta sv hvl mwwdwn i?”

¹⁴(Hoqho nyiv lwwyw ang gob doonum) Jisu mwwg buu tulungam benum, “Nyi tulungam camng camng gogaqb mvgdvl hib-hibib doomto.”

¹⁵Ho buu tulungv hoqhvb nyinya banv bulam doomnum.

¹⁶Jisu wtw taqangam la ngui cinyiam naanv ao gvdab koodu banv bulug gabnvl Pwnboam paqnv pindub banv nyi tulungam hor twk hvl buu tulungam jinum.

¹⁷Ho bul mwlwjaqkv dvtar namgob dvknum, hoqgv nyi tulug dvleq apaqnam mam buu tulungv dorkum kunamv huc cwyw leq cinyi gob nyiknum.

¹⁸Aal golo Jisu vp-cwkwb xumdu yikho buu tulungv mwwg dookub haanum, mwv bulam toxnum, “Ngam hiyv jaq hvl nyi tulungv bedwn?”

¹⁹Tuugin begamv, “No Jon Baptist hvl,” Bulv birwqnum. Tuugin begamv, “No Ilija hvl, tuugin begamv kolwg nyiqry benbo tulug akgon turkur pakun hvl bedwn.”

²⁰Mwv bulam toxnum, “Hvbmabde ngam nulv hiyv jaq hvl bedwn? Pitor birwqnum, “No Pwnbog Ywwn bo Akv!”

²¹Kokw so Jisu soq sam hiyv nvkam bekin maabwk hvl mwwg buu tulungam yvtw panum.

²²Ho hvraqb benum, “Nyia Ko Tuupv hentwr kaanyi hemanam mam hengky dvb nyitayin hoqgv nyiilo tulungv, nyub but tulungv la nyijwq-nyegam tomswrbo nyi tulungv ngam haqxia tayin ngam bulv meng tayin ho loum deenam turkur turab dvb nyitayin.”

²³Hoo mwv mwlwngam benum, “Hiyv lajaqkam ngoqg lvgab wmin gvtwb mwwnbov mwv atam mwwpa maab nyil, aal looxiam mwwg daapongam jool ngoqg kokw kokwb wmin gvdwb nyitayin.

²⁴Hoggab hiyv lajaqkam mwwg atwg swwgam niim dvb mwwnbov ham ywwt ywwtayin.

²⁵Hoggab hiyv lajaqkam swcw nyodo bumpwngam doog dvb naatvl, atam atv niim subnyiloqkam mwwg hognvk niqtuqkv dootayin?

²⁶Hoggab hiyv lajaqkam ngam la ngoqg tomswrnam mam hvnyw boam, mwv mwwg yuunamho hoo Abwg yuunamho hoo dvrwqbo gumtw tulug lvgab haaikukam, Nyia Ko Tuupv mwam hvnyw kalam tayin.

²⁷Samnvn mwwgabto! Ngo nulam jvqtw jaqb bekin dvn, Pwnbov lvpwngam kaapa maady deedib sidmab nyi ata gon soq doonbo nyi tulug pengko si doodwn.”

²⁸Soq sam bexo tukul aal piin deen kokw so xumtab Jisu mwwg lvgab Pitor, Jon hoo Jemsnvn bool wgnum.

²⁹Mwv xumdul dooikam mwwg nyuqtuq-moorv oksub nyinum, hoqgv mwwg vj tulungv kwlwq-kvlaq gob huuda kvlanum.

³⁰Haqmapaq golo Mojes la Ilija bunyiv hoqho mwwg lvgab goobal doonum.

³¹Bulv ao gvdag yuunam mam kaakin banv mwv Jerusalem alo sila yukul hog bvxeq vnwqb Pwnbog pagoqkam niqtuq nyilin tayin ham Jisug lvgab goomin sunum.

³²Pitor la mwwg ajin tulungv yubngaq yubl doonum, hvbmabde bulv huurab laikul Jisug yuunam mam la mwwg lvgab nyi vnyi go doodu dvb kaapanum.

³³Nyi tulungv Jisun wleq ko-gab, Pitor mwam benum, “Bir atv soq so ngulug doonam si hog hwdgo alpa! Kuj ngulv soq so tombulo oum go mvtuj, akwn noqgab, akwn Mojes gab hoo akwn Ilija gab.” (Mwv hognvkam goodul doos kunum ham mwv cengmanum.)

³⁴Mwv hvraqb goodul doodwb doomwq ak hwrabanv bulam hwrlub banv doonyium nyumlupnum, hoqgv buu tulungv bulam doomwqkv hwrlub yukam bosnum.

³⁵Doomwq hoqgv agam gamg benum, “Soq si ngoqg Xuqnam Kov, mwam tato.”

³⁶Agamv benya kalam Jisun vp-cwkwb doodwb kaapanum. Buu tulungv ocukab doonum hoqgv hoq mood hoqgv bulv hognvkv kaanum ham bulv hiyv nvkam vcwr gokam bekin maanum.

³⁷Aal loogwn so bulv yorn hoqgv ipoq yukam, nyi pvtw twwt albo twwg Jisun kaapanum,

³⁸Nyi pvtw hoqgv nyi akv sogoql benum, “Tomswr bov! Ngo nam mvnyi-moiyu dvn, ngoqg ko tuup ak sam meeg kaat bvk hvl ngo nam bedwn, mwv twq ngoqg nyega gootum ko akinv!

³⁹Yal ak nvl haqmapaq golo mwam sogoq kiir dvb nootu banv lwxiam sitab-simiq dvb mvgam gab mwwg agamlo xupiq xulin dvn, mwam hentwr-kaas algob mvtwl mwam wwmnum!

⁴⁰Ngo sam ruqxa mvdwb noqg buu tulungam mvnyi-moiyul benum, hvbmabde bulv nyiny maanum.”

⁴¹Jisu birwqnum, “Mwwjw maanbo la nyixiaqbo hotam no, hog hwdgo ngo nulug lvgab doobal hoo nulug lvgab cwqtayin? Ho mwv nyi akam benum, “Noqg ko tuup akam soqb boonwqto.”

⁴²Ko akv hoodul dooyikho sonyiv mwam kedwb twqtab banv vc alwb mwam mvnum. Hvbmabde Jisu almab yalam ruqlin tukul himy akam mwp kunum, hoqgv mwam mwwg abam jikur kunum.

⁴³Nyi mwlwngv Pwnbog ator torma vrram tornam mam lomnum. Jisug nyinam mvnam mwlwngam nyi tulungv hvraqb lomdul doodu duk moodho mwv mwwg buu tulungam benum,

⁴⁴“Hognvkam ngo nulam bekin tagdvn soq sam mwwpa maab nyima bvka! Nyia Ko Tuupam nyi tulug alaqb gvqlwq jitayin.”

⁴⁵Hvbmabde soq si hognvkam benum, bulv ham cengmanum. Sam bulug hoqgv kvsil apko gab bulv sam cengmanum, hoo soq pagoq sam bulv mwam toxdvb bosnum.

⁴⁶Bulug pengko ho hoglo akjaqhv koi yaadwn hoqham bel hwwnam poot jaqb bulug pengko ho hwwmin sunum.

⁴⁷Bulv hognvkam bulug uraho mwwdunum ham Jisu cengnum hoqgab mwv ko ak naabnv mwwg haabo daiya ho mwam doom tvl

⁴⁸bulam benum, “Hiyv lajaqkam soq ko ak sam ngoqg emin gab loorwq baloqkam mwv ngam kam loorwqdvn, hoqgv hiyv lajaqkam ngam loorwq bov mwv ngam kanambo akam kam loorwqdvn. Hoggab nulug mwlwngam pengko ho anyo yaanbo akv mwlwngam koi yaadwn.”

⁴⁹Jon birwqnum, “Bir at ngulv nyi akgon sony tulungam noqg eminlo ruqxa xoodu dvb kaanum, hoo ngulv nyima bvk hvl biturnam, hoggab mwv ngulug dvpar hoqg nyiima.”

⁵⁰Jisu mwam benum, “Hiyv lajaqkam ngulam ceebio baqma bo nyi ak hv ngul gab doodwn, hoqgab nulv mwam bitur mabwk hvl buu asaq tulungam kam benum.”

⁵¹Jisu ao gvdab booca dukub moodv hvvnwq yukam, mwv mwx-mvaq kunv Jerusalemb wrab kunum.

⁵²Mwwg gab hog mwlwngam mwx-mvaql ap mvdwb hvl mwv mwwg otuqyab daaxar xarnbo tulungam Samariya nampam golo kanam namcolwqnum.

⁵³Hvbmabde mwv Jerusalemb wdul doogam gab bulv mwam loomanum.

⁵⁴Jems la Jon soq sam kaatwl bunyiv benum, “At Sw ao gvda toloqgv wm bioqlwl bulam guxia yumtwk hvl ngulam kanam jisv no mwwd nvi yv?

⁵⁵Jisu bulam yolu bebnv benum, “Hognvk yalam nulv baqgdvn, ham nulv cengma dvn hoggab Nyia Ko Tuupv nyi tulug swwgam muiyu taab haamanum, hvbmabde bulam ywwtab haanum!”

⁵⁶Hoqgv Jisu la bulv nampam pamginb wknum.

⁵⁷Bulv lamta ho wdul doodu dvkho, nyi ak Jisun benum, “No hoglo wjaqkam ngo noqg kokw kokwb wmin gvtayin.”

⁵⁸Jisu mwam benum, “Siyal gv ungngv doodwn, pvtangv osupv hvbmabde Nyia Ko Tuupv hoglo lajaqkam dumpongam paadaql dookjaq gokam dooiya maadwn.”

⁵⁹Mwv nyi asaq akgon benum, “Ngam wmin gvto.” Hvbmabde mwv benum, “Koibo otuqcob wl ngoqg abwn svma liico mvdwb ngam jila bv.”

⁶⁰Hvbmabde Jisu mwam birwqnum, “Sinbo nyi tulungam bulam atv atam svmangam liimsudwb jito, hvbmabde no wgdvl Pwnbog lvpwg puiyam bekar yvta.”

⁶¹Nyi asaq gonhv benum, “Koibo, ngo nam wmin gvtayin, hvbmabde otuqcob wl ngam ngoqg nam nyi tulu galo tunam paqnam mam naaco mvdwb jila bv.”

⁶²Jisu mwam benum. “Hiyv lajaqkam haal bennan svvda ho alaq gvbw tvl langkwb kookurbo nyi akv Pwnbog lvpw gab kvtaq maadwn.