Read Nyishi BETINAM PVVB 1 Bible Online

BETINAM PVVB 1 - Nyishi bible

BETINAM PVVB 1

¹Jordonam rableq laikul deexa-raraho, Sup gvdag taqcgon Arabaho, Paran gvla Topel, Laban, Hajerot, hoo Dijahab pengko ho, Mojes soq gomcwr tulu sam Israel nyi mwlwngam agam goonum.

²‍Horeb hoqgv Seir Puutub wlayil Kades-barneaho hvvc dvb aal camleq lookin go nyiody boonum.

³‍Vnyw campig pool bvryw leq barkinwg otuq aalho At Swg pvvb jikjaqb hoq tulu ham Mojes Israel nyiilungam bulam bekin kunum,

⁴‍hwdlo mwv Amor nyi tulug lvpw at Hesbon ho doonbo Sihonnvn, hoo Basanwg lvpw at Astarot hoola Edrei ho doonbo Ognvn nyob paiya kokw so benum.

⁵‍Moab gvdag Jordonam rabla yukul, Mojes pvvb sam hingky jaqb betam dvb berab kunv begamv,

⁶“Ngulug Pwnbo At Sw ngulam Horeb ho benum, ‘Nulv oyu mood go soq puutu so doodu paku.

⁷‍Soqgv wrab gvdkul Amor nyi tulu gvla bulug door-doopw Araba diisw nyook bvla Negeb lywpab, hoo Kanaan nyi tulu sa-svlog soiyoqb hoo Lebanon puutub, ho pobu hotbo Iupratas pobu namgub, nulug nyiodam boorab tuku.

⁸‍Kaato, nulug otuqb ngo gvdangam mwx-mvaql ap jipa kun. At Sw nulug ab tulungam, Abrahamnvn, Aisaknvn, hoo Jakubnvn la bulug ko hosiqkam gvda jidwb dingr kunam gvdab nulv wg dukul ham gumn naato.’

⁹“Hoq moodho ngo nulam benum, ‘Ngo atv jaq nulam nyila gvdy kuma.

¹⁰‍Nulug Pwnbo At Sw nulam dumtwq miilyw mvpa kun, hoo kaato, soolo nulv doag takar tulu tvb nyidku.

¹¹‍Nulug ab tulug Pwnbo, At Sw mwv nulam dingr kunam hvb, nulam koi-koi yaab nyiitw mvqlw mvdwb lvqc cignvka!

¹²‍Hoggub yu ngo aro nulug vi-vbwq hoo jwwnam-panam sam cwqla taikun yu?

¹³‍Nulug nyob hoqgv pumb rwnam nyi loq, cenglaq booloq, hog mwlwngam cingxwqbo nyi loq daalin to, hoo ngo bulam nulug peelo bo gob xuqbwq tayin.’

¹⁴‍Hoo nulv ngam birwqto, ‘Noqg ngul pagoq gab benam si aljaqdo.’

¹⁵‍Ho ngo nulug nyob tulug peelo bo tulungam, pumb rwnam mam hoo cingxwqbo nyi tulungam nulug aoho peelo bo gob mvp pakun, lwwyw aoho peelo bo ak, lwwg aoho peelo bo ak, camng aoho peelo bo ak, wyw aoho peelo bo ak, hoo saab asaq-asaqkam nulug nyob tulug aoho mvp pakun.

¹⁶‍Hoo nulam hoq moodam ngo nulug nyegam tulungam tomswr tayin, ‘Nulug vbw-bor tulug pengko hoqg bvrwqkam tam tayin, hoo nyi akwg mwwg vbw-bor pengko hoola nyoodo nyi tulug pengko ho jvqtw pw-ngam hwwm dvb jitayin.

¹⁷‍Nulv pw-hwwikam mwwswl pw-hwwnyiram. Bvrwqkv anyo jaqkam hoo koi jaqkam nulv ham homyin lvkin dvb tatayin. Nulv hiyamkam bos maabv, hoggab pw-hwwnamv Pwnbo gv. Hoo nulgab nyel bela maanam ham nulv ngoqg dookub haamto, hoo ngo ham tatayin.’

¹⁸‍Hoo hoq moodho ngo nulam hog mwlw nyidy sanam mam gaml jitkun.

¹⁹“Ho ngulug Pwnbo At Swg ngulam gaml bekjaqb ngulv Horeb hoqgv lengk nv nulug bos jaqk dvb kaapa kunum deexa-rarangam, ho Amor nyi tulug diisw gvdab wpeql wknum. Hoo ngulv Kades-barneaho haaknum.

²⁰‍Hoo ngo nulam benum, ‘Ngulug Pwnbo At Swg Amor diisw gvdangam ngulam jinam gvdab nulv haapa kun.

²¹‍Kaato, nulug Pwnbo At Sw nulug agaho gvdangam mwx-mvaql ap jipa kun. Gorabl wto, nulug ab tulungam Pwnbo, At Sw jita nvk hvnam gvda ham gumn naat ku. Vcwr gokam bos haaiyil ho mwwram maabv.’

²²‍Ho nul mwlwngv ngoqg ogumb haabnv hvl benum, ‘Kuj ngulv nyi loq ngulug otuqb kanam tvl gvdangam mvqky-maqlam mvl hoo hogloq lamtab, hoo hogloq bopamb ngulv haaiyin dvn ham kaapa peel ngulam betam kutjuk hvl benum.’

²³‍Ho ham ngo tvlwqnv al mwwpanum, hoo ngo nyi camleq vnyi go nulug nyob dvpar hoqgv ak-akwb naanum.

²⁴‍Hoo bulv wrab kunv diisw nyookub caalayil hoo Eskol lywpab haaknv gvdangam mvqky-maqlam mvnum.

²⁵‍Hoo bulug alaqho bulv gvda hoqg aaxy meeg pulayil ham ngulug dookub baqa kunv ngulam agam lokta gootamnum, ‘Ngulug Pwnbo At Sw ngulam gvda jitanamv aljaq deen hvnum.’

²⁶“Hvbsujaqkam nulv caama taasu, hvbmabde nulug Pwnbo At Swg gaml jinam mam ceekol taleq paku.

²⁷‍Hoo nulug tombu uraho nulv haql-pal budum-bvram bel begamv, ‘At Sw ngulam ceebio baqgam gab mwv ngulam Ijipt hoqgv boolin layil Amor nyi tulug alaqho jilwqtvl ngulam twryum mvta do.

²⁸‍Hogloqb ngulv caata dvn yu? Ngulug vbw-bor tulungv ngulam hangam hoxa dvb mvl begamv, “Nyiilungv ngulam ator yaado hoo ao yaado. Bopam tulungv koi jaqdo hoo doa ao namgub gurum nwqtum paku. Hoo lvg-lvgab ngulv Anakamwg ko tuup tulungam tolo kaapa peekun.” ’

²⁹‍Ho ngo nulam benum, ‘Mwwdwq kamabv ho bulam bos yo hvnum.

³⁰‍Nulug vnyiq kaadwb Ijiptwb mwv nulgab nyinam hvb, nulug Pwnbo At Sw nulug otuqb wl mwv atv nulgab nyob patayin,

³¹‍hoo nyia kov mwwg ko tulungam hoggub bool wgnam hvb nulug Pwnbo At Sw nulam deexa-raraho nulam bool wgnam mam nulv kaaknum, ho nulam lamta mwlwho wg laikul nulam soq nyook namgub hvvc gvpa kun.’

³²‍Hvbmabde soq gomcwr tulu sam nulam bes jaqkam nulug Pwnbo At Swn nulv mwwjw maanum,

³³‍aiyam wwm hutob hoo aalam doomwq doonyiumb, nulug otuqb wnv nulug tombu mwgwko nyookam meegaq jidwn, ho hogloq lamtab nulv wyin dvn ham kaakin jidwn.

³⁴“Hoo At Sw nulug gomcwr tulungam tapanum hoo mwv hang lengl dingr kunum,

³⁵‘Soq almanbo nyi tulu hotam soqgv akjijaqkam nulug ab tulungam ngoqg dingrwl jitanam albo gvdangam kaapa ram,

³⁶‍Jepunneg ko tuup Kaleb aro kaapa tayin. Mwv ham kaapa tayin, hoo mwam la mwwg ko tulungam ngo mwwg gvda mvqky-maqlam mvknam mam jitayin, hoggab mwv At Swg bekjaqb nyil wmin gvpa ku!’

³⁷‍Nulug pagoq gab At Sw ngam haaxaq kunv benum, ‘No kam hoq gvdaho haakram hvl benum.

³⁸‍Nulug agaho daqnbo Nunwg ko tuup Josua, mwv haatayin. Mwam haakam dvb mvto, hoggab mwv Israelam hoqham otu naagtayin.

³⁹‍Hoo ngulug ko tulungam ceebiongv mengming puqmin tai hvl benam, nulug ko anyo tuluhv, ho soolo al-koram cengma bo tuluhv gvda urab haatayin. Hoo ngo bulam ham jitayin, hoo bulv ham gumn naatayin.

⁴⁰‍Hvbmabde nulv tobkur gvdwl Swlw-Sa-svlog deexa-rara daiyab nyiody bool wto.’

⁴¹“Ho nulv ngam birwqnum, ‘Ngulv At Swn nyic nyipa ku. Ngulug Pwnbo At Swg gaml jinam hvb ngulv atv wgdvl nyobam patayin.’ Hoo nulv nyiicwr-cwrxiv diisw gvdab caal nyob padwb mwwp alwb mwwnum.

⁴²‍Hoo At Sw ngam benum, ‘Bulam beto, nyob patab caamabv, hoggab ngo nulug pengko ho doomin gvma, hvb nyima baloqkam nulam nulug ceebiongv mviya tayin.’

⁴³‍Ho ngo nulam betkun, hoo nulv ham tagab ma; hvbmabde nulv At Swg gaml jinam mam ceekol taleqnum hoo diisw gvda yaab nyob patab caanum.

⁴⁴‍Ho diisw gvdaho doonbo Amor nyi tulungv nulam ceekol nyob panv tong-taga ruqnam hvb nulam jwwk-paknv Seir gvda hoqgv Horma namgub ruql kunum.

⁴⁵‍Hoo nulv At Sw agab hookur kunv xabnum, hvbmabde At Sw nulug yalam tamanum, ho nulug benam mam ruucw-kwrgab maanum.

⁴⁶‍Ho nulv Kades ho naleq mood aal go doodu paku, nulv hoqho hog hwd aal gob doota yukun.