Read Nyishi BETINAM PVVB 10 Bible Online

BETINAM PVVB 10 - Nyishi bible

BETINAM PVVB 10

¹“Hoq moodho At Sw ngam benum, ‘Otuqg hvb no wlw loq tvqnyi go taqlin to, hoo ngoqg dookub puutu aob caato hoo ham joon dvb svvda lvgab uddum loq ak mvto.

²‍Hoo noqg otuqho joodub kunam lwpia ho gomcwr xiqlwqnam mam ngo lwpia aoho xiqlwq tayin, hoo hoq tulu ham no svvda uddum ho vlwq tayin.’

³‍Hoqgab ngo akasiya svvda hoqgv uddum ak mvnum, hoo otuqg hvb wlw lwpia tvqnyi go taqlin kunum, hoo lwpia tvqnyiam ngoqg alaqho joolayil puutu aob caaknum.

⁴‍Hoo mwv lwpia aoho otuqg xeqnam hvb jaqb xeqnum, puutu aoho dookum yuk ho wm pengko hoqgv agam gooknam, Pvvb Wywngam xiqlwq kunum. Hoo At Sw hoq tulu ham ngam jiknum.

⁵‍Ho ngoqg uddum mvnam ho lwpiangam vlwq tvl hoo ngo puutu hoqgv wkur kunv ipoq kunum. Hoo At Sw ngam gaml jik jaqb hoqho Pvvbam vlwq tvl doom kunum.”

⁶(Israel nyiilungv Beerot Bene-jaakan hoqgv Moserab nyiody booknum. Hoqho Aaron siknum, hoo mwam hoqho svma liiknum. Hoo mwwg ko tuup Eleajar mwwg kwlib nyubwb nyiknum.

⁷‍Hoqgv bulv Gudgodab nyiody booknum, hoo Gudgoda hoqgv iss kucw dook gvda Jotbatab wknum.

⁸‍Hoq moodho At Sw Lebi nyob dvparam At Swg pvvb uddum mam joom dvb xuqbwq kunum hoo At Swg agaho daqtwl mwwg gab bon nyim dvb hoo soolo namgub mwwg eminho lvqc cim dvb jiknum.

⁹‍Hoqgab Lebi nyob dvparv mwwg vbw-bor tulu lvgab gumn otu nvvsiq maanum. Noqg Pwnbo At Sw mwam benam hvb, At Sw mwwg gumn otungv.)

¹⁰“Otuqho doonam hvb ngo puutu aoho aal campy ai campy go doonum, hoo At Sw hoq mood hookam ngoqg benam mam tanum. At Sw nam mengdwb mwwmanum.

¹¹‍Hoo At Sw ngam benum, ‘Gorabto, no nyiilug otuqb nyiody boocoto, ho bulug ab tulungam jidwb dingr kunam gvdangam bulv gvdab wlayil gumnwb naakam yinpv.’

¹²“Hoo Israela, sija noqg Pwnbo At Sw hoggv nam nyim dvb mwwdwn, hvbmabde noqg Pwnbo At Swn bosto, mwwg lamtab lwxiam wto, mwam aby to, noqg Pwnbo At Swn noqg hvvjw hoqgv la noqg yvj hoqgv mwam bon nyij to,

¹³‍At Swg gaml tulu sam la pvvb tulu sam pvvto hoo soolo nam gaml jinam si nulug algab?

¹⁴‍Kaato, doa tv hoo hoq aoho doonbo hog mwlw tv, hoo swcwngv hoo hoq aoho doonbo hog mwlwngv, noqg Pwnbo At Swngv.

¹⁵‍Hvbsujaqkam At Sw mwwg hang abynam mam noqg ab tulug aoho doonum hoo bulug ko tulungam bulug kokw ho daalinum, hoqgab nulv soolo nyiilu mwlwg pengko ho xuqnam nyi gob nyidkun.

¹⁶‍Hoqgab nulug hvvjw niqtuqkam pepaql-mux mvtku, hoo tamy bo ak hvb swwl dook maabv.

¹⁷‍Hoggab noqg Pwnbo At Sw, Pwnbo mwlwg pwnbov hoo At Sw mwlw hoqgv At Swv, mwv koi dvn, hoo ator dvn, hoo Swrdorxeqbo Pwnbov, mwv mwwsw maadwn hoo kam naama dvn.

¹⁸‍Mwv ab dooma boam la xwwmy tulungam jvqtwngam nyij dvn, hoo mwv dvs-twwsam la vj koosam nyoodo nyiingam jidwn.

¹⁹‍Nyoodo nyiingam aby to, hoggab nulv Ijipt gvdaho lok nyoodo nyi hvb nyil doonum.

²⁰‍Noqg Pwnbo At Swn no bos tayin. No mwam bon nyij tayin hoo mwam bugil swwtayin, hoo mwwg eminam no naal swwtayin.

²¹‍Mwv noqg paqnam gob nyitayin. Mwv noqg Pwnbov, hiyv noqg vnyiq kaagaho noqg gab soq koi bvla bos looda dvb bon tulu sam nyij pakun.

²²‍Ijipt ho noqg ab tulungv nyi cam kvn go itwqnum, hoo sija noqg Pwnbo At Sw doa aog takar tvvb nam dumtwq-miilyw dvb mvpa kun.