Read Nyishi BETINAM PVVB 11 Bible Online

BETINAM PVVB 11 - Nyishi bible

BETINAM PVVB 11

¹“Hoqgab noqg Pwnbo At Swn no aby to hoo mwwg ator jinam mam, mwwg nyiyi-nyicangam, mwwg pvvb tulungam, hoo mwwg gaml tulungam lwxiam pvvto.

²‍Hoo soolo mwwka to (ngo nulug ko tulu hiyv soq pagoq sam cengma bo hoo kaama boam agam gooma), noqg Pwnbo At Swg gwrnam mam, mwwg koinam mam, mwwg atornam alaqkam, hoo mwwg laqpo atornam mam mwwka to,

³‍Mwwg swrdorxeq kamla nyima takanam bon tulungam Ijipt lvpw at Paro gvla mwwg gvda mwlwho mwv nyil kaakinum,

⁴‍hoo hwdlo bulv nulam ruqmin gviyikho mwv bulug svpur tulungam hoo bulug ceriot tulungam Swlw Sa-svlo lvgab tolup mvnum, hoo At Sw soolo namgub bulam twryum pakun,

⁵‍hoo nulam soq nyook so haanam xaqb, mwv nulgab deexa-raraho hoggv nyiknum ham nulv cengdo,

⁶‍hoo Reubenwg ko tuup Eliyab gv ko tuup Datannvn la Abiramnvn mwv hoggv nyiknum, hoggub kediv gamkoq layil bulug nam tulungam, bulug tombungam, hoo bulug lvgab wmin gvnbo hog mwlwngam Israel nyi tulug pengko hoqgv dvmeqnam mam nulv cengdwn.

⁷‍Hoggab nulug vnyiqkv At Swg koi jaqb bonam nyinam mam kaapa kun.

⁸“Hoqgab ngoqg soolo gaml jinam gaml mwlw sam nulv pvvto, ho nulv ator tayin, hoo nulug wlayil gvdangam gumn naatanam mam nulv gumn naatayin,

⁹‍hoo nulug ab tulungam la bulug hosiqkam At Swg jidwb dingr gvdangv wtw lyuminko la ngola biqminko ho, nulv swwiyul dootayin.

¹⁰‍Hoggab no haalayil gvdangam gumn naatanam hv hogloqkv nulv lengknum, Ijipt gvda hvb nyima dvn, hogloq ho no oo boolu mvnam hvb mvm mam liilwq tvl hoo hoqham silam boolwql iss jinum.

¹¹‍Hvbmabde nulv wlayil gvdangam gumn naatanam hv puutu bvla lywpa gvdab nyidwn, hoqhv doa hoqgv nyodongam iss twwdwn,

¹²‍hoq gvda ham noqg Pwnbo At Sw hingky jaqb kvvyw-tada dvn. Noqg Pwnbo At Sw vnyw wrab hoqgv wnya namgub, mwwg vnyiqkv ham lwxiam kaal doogdvn.

¹³“Hoo ngoqg soolo nulam gaml jinam gaml mwlw sam nulv tabnyiloqkam, ho nulug Pwnbo At Swn aby to, hoo nulug hang lvgab hoo yvj lvgab mwam bon nyij to,

¹⁴‍ho mwv nulug gvda gab, hocbo nyodongam hoo honyiu bo nyodongam, nyodo hod moodam hom tayin, ho noqg am naanam mam la hoo noqg roo alangam la kutiam nookum tayin.

¹⁵‍Hoo mwv noqg tuun-mee tulu gab nwmwngam jitayin, hoo no dvtayin hoo bwwr tayin.

¹⁶‍Hengab to hvb nyima baloqkam noqg hangv nam xaalyo gvtayi, hoo no asaq pwnbo tulug dookub wtayi hoo asaq pwnboam bon nyijil hoo bulam xumtayi;

¹⁷‍hvb nyigam gab At Swg ceekol haaxaqnamv noqg aoho haatayin, hoo mwv doangam mutum tayin, hoqgab nyodongv horam, hoo gvdangv vly axeq lengk ram, hoo At Swg albo gvda jinam mam no nyebia jaqb niipaq mvtayin.

¹⁸“Hoqgab nulv ngoqg soq gomcwr tulu sam nulug hang lo la yvj lo mwwgab dvb nyitayin, hoo hoq tulu ham nulug alaqho kooj gvnam hvb gvtayin, hoo hoq tulu ham nulug tuqt talog vnyiq kaagaho baqdwb nyitayin.

¹⁹‍Nulv hoq tulu ham nulug ko tulungam tomswr tayin, hwdlo nulv namho doonul dooikam, hoo hwdlo nulv lamta lo wdul dooikam, hoo hwdlo nulv gel karyi kam, hoo hwdlo nulv gorab yin.

²⁰‍Noqg nammwg viyap yabtam ho hoo noqg toggoq tuluho hoq tulu ham no xeql ap tayin,

²¹‍doa aongv swcw nvg aob dood deedib, noqg ab tulungam At Sw jidwb dingr kunam gvdaho no la noqg ko tulungv aal tulu ngvla aal tulungv vi yaiya tayin.

²²‍Hoggab nulv ngoqg soq gaml jinam gaml tulu sam hingky alwb nyib nyiloqkam, noqg Pwnbo At Swn aby baloqkam, mwwg lamtab wb nyiloqkam, hoo mwam bugil swwb nyiloqkam,

²³‍ho At Sw soq nyob dvpar tulu sam nulug aga hoqgv ruqpaq jitayin, hoo nulam koi yaanbo hoo ator yaanbo nyob dvparam nulv ruqpaq nyotayin.

²⁴‍Hoglo jaqkam nulug lvc samdaqnam gvdangv nul gvku. Deexa-rara Lebanon hoqgv Iupratas pobu namgub ho dou-haaga sa-svlo namgub nulug gvda dwrbu-dwrya gob nyitayin.

²⁵‍Nulug agaho hiyv kam nulam ceekol daqnyi ram. Noqg Pwnbo At Sw mwwg dingr kunam hvb nulug gvda wk mwlwho nyiam nulam bos mvdwb mvtayin.

²⁶“Kaato, ngo soolo nulug agaho lvqcam la beenam mam jig yukun:

²⁷‍ngoqg soolo nulam gaml jinam noqg Pwnbo At Swg gaml tulu sam tvjw baloqkam, nulgab lvqc gob nyitayin,

²⁸‍hoo nulug Pwnbo At Swg gaml tulungam nulv tvjw mabaloqkam, ngoqg soolo nulam gaml jinam sam apaq peel nulv asaqb wbaloqkam, ho nulug cengmanam asaq pwnbo tulu kokwb wmin gvl xum baloqkam soq tulu si nulgab beenam gob nyitayin.

²⁹‍Hoo hwdlo noqg Pwnbo At Sw nam gvdaho boolwq tvl hoo gvdangam gumn gob naam tanam gvdaho, no lvqc cam Gerijim Puutu ho ap tayin hoo beenam mam Ebal Puutu ho doom tayin.

³⁰‍Soq tulu si lamtag dou-haagag Jordonwg kvtin gonho dooma dvn yv, soq si Kanaan nyi tulug dook Araba ho dooma dvn yv, hoqhv Gilgal taqcgonwg Moreg kora svvn ogumg dou-haaga daiya ho dooma dvn yv?

³¹‍Hoggab nulv Jordonam rapeq layil noqg Pwnbo At Swg nulam jitanam gvdangam nulv gumn naatayin. Hoo hwdlo nulv ham gumnwb naaikun hoqho nulv dootayin,

³²‍ngo soolo nulug aga lo betamnam gaml sam la pvvb tulu sam nulv hengab jaqb nyil swwn tayin.