Read Nyishi BETINAM PVVB 12 Bible Online

BETINAM PVVB 12 - Nyishi bible

BETINAM PVVB 12

¹“Swcw nvg aoso nulv doody deedib, noqg ab tulug Pwnbov nulam gumn naam dvb At Swg gvda jiknam ho nulv soq gaml sam la pvvb tulu sam hengab jaqb nyil swwn tayin.

²‍Puutu hoola yorn tulug aoho hoo svvn niikum mwlwho nyob tulug bulug pwnboam xumk nyook tulungam nulv hoggub nyijaqkam twryuml twrpaq dvb nyitayin.

³‍Nulv bulug yugw tulungam hoo bulug murty swwrw tulungam vmwq gob mvtayin hoo bulug Aserim mam wm lvgab partayin. Nulv bulug pwnbo tulug guss tulungam pageq lotayin hoo bulug eminam nyook soqgv twryuml twrpaq tayin.

⁴‍Noqg Pwnbo At Swn nulv hoq xumnam hvb xumny ram.

⁵‍Hvbmabde noqg Pwnbo At Swn nulug nyob tulug gvda hoqgv mwwg eminam la mwwg doogw koob xuqlin mvdwb nulv kotayin. Hoqho nulv wtayin,

⁶‍hoo hoqho nulug boyuqnam akiam hoo pwr jinam akiam, noqg jibwqnam akiam hoo noqg aky jidynam mam, noqg jidwb dingrnam akiam, noqg jidwb mwwbwqnam akiam, hoo noqg svv hvvtw hoqgv la sviya pvtw hoqgv otuqcob ko bwwconam akiam nulv bwa jitayin.

⁷‍Hoo noqg Pwnbo At Swg agaho nulv dvtayin, hoo noqg Pwnbo At Sw nulam lvqc ciknam mam, nulv la nulug imiq dvparv nulv hwnyir-hvmar tayin.

⁸“Nyiicwr cwrxiv mwwg vnyiq ho hoggv kvvlwq dvn ham ngulv soolo nyidul doodwn, hoqgab hoqhvb nyinam ham nulv nyikmabv,

⁹‍hoggab noqg Pwnbo At Sw nulam jitanam gvdangam nulv sija hvvcil otu nvvsiql doonu maata.

¹⁰‍Hvbmabde hwdlo nulv Jordonam rablayil noqg Pwnbo At Sw nulam otu nvvsiq mvdwb gvda jinam ho dooikam, hoo nulug ceebio tulungam mvtur tvl mwv nulam swrso cumciqb doonu mvdwb mwv nulam jitayin,

¹¹‍ho noqg Pwnbo At Sw mwwg eminam doogw ko nyookam daalin tayin, hoqho nulv ngoqg gaml jinam hog mwlwngam bwa tayin: nulug boyuqnam aky tulungam hoo nulug pwr jinam aky tulungam, nulug jibwqnam akiam hoo noqg jidynam akiam, hoo noqg At Swn dingrwl aky jidy sanam albo dingrnam akiam bwa jitayin.

¹²‍Hoo nulv la nulug ko tuupv la nyem kov, nulug nyerangv la nulug paqn tulungv, hoo nulug pamda uraho doonbo Lebi nyiilungv nulug Pwnbo At Sw agaho hwnyir-hvmar tayin, hoggab mwv nulug lvgab otu gokam ho gumn gokam nvvsiq maanum.

¹³‍Hoqgab hengab to, no nyook gotwq bolo noqg boyuqnam akiam jimabv,

¹⁴‍hvbmabde noqg nyob pengko ho At Sw nyook ak daalin tayin, hoqho no noqg boyuqnam aky tulungam jitayin, hoo hoqho ngo nam gaml jiknam hog mwlwngam no nyitayin.

¹⁵“Hvbsujaqkam, no hog hwdwg vdin dwnw dvn ham noqg pamda uraho patabl dvto, noqg Pwnbo At Swg nam lvqc cil jiknam hvbjaq dvto. Swcwr ram la sudum vdinam nyi dvrwqbo ngvla dvrwq maanv ham dvto.

¹⁶‍Nulv uiyam rooxo dvmabv; nulv ham iss toonam hvb kedho toopaq to.

¹⁷‍Noqg jibwqnam dvs ham ho noqg twwsam ho kuty ham, ho svv hvvtw gvla sviya pvtwg otuqcob ko bwwnam mam aky jinam ham, ho noqg dingrwl aky jidwb aky jinam ham ho noqg jidynam aky jinam ham noqg pamda uraho no dvmabv,

¹⁸‍hvbmabde noqg Pwnbo At Sw daalin kunam nyook ho noqg Pwnbo At Swg agaho no la noqg ko tuupv la noqg nyem kov, noqg nyerangv la noqg paqnv, hoo noqg pamda uraho doonbo Lebi nyiilungv hoqg aky jinam tulu ham dvtayin. Hoo noqg nyitaq mwlwho noqg Pwnbo At Sw agaho no hwnyir-hvmar tayin.

¹⁹‍Noqg gvdaho no doody deedib no Lebi nyiilungam hoocuml doogto, bulam haqpaq maabv.

²⁰“Mwwg nam dingr kunam hvb, hwdlo noqg Pwnbo At Sw noqg dwrbu-dwryangam koi dvb mvikun, hoo no betayin, ‘Ngo vdin dvtayin,’ hoggab no vdin dwnw do, hwdlo jaqkam no vdin dwnw yin vdinam dvto.

²¹‍Noqg Pwnbo At Sw mwwg eminam doom dvb daalinam nyookv noqg gab aado baloqkam, At Swg nam jiknam noqg svv hvvtw hoggv maalo sviya pvtw hoqgv patab gvdwl ngo nam gaml jik jaqb dvto, hoo hwdlo jaqkam no dwnw yin noqg pamda uraho vdinam dvto.

²²‍Swcwr ram la sudum vdinam dvnam hvb no ham dvto. Ham dvrwq maan bov la dvrwq bov lvkin gob dvto.

²³‍No uiyam arro dvma dvb hengab to, hoggab uiho swwgv doodwn, hoo no swwgam vdin lvgab dvtaq maabv.

²⁴‍No uiyam dvmabv; no ham ked aoho iss toonam hvb toopaq to.

²⁵‍Ham no dvmabv, hwdlo no hoggv aldvn At Swg vnyiq kaagaho no nyil dooba loqkam, ho noqg swwdy moodam hog mwlwngv altayin hoo noqg ko tulu ngvkam noqg kokwb alwb swwl dootayin.

²⁶‍Hvbmabde dvrwqbo pagoqkam noqg galoqkv naadwb nyidwn, hoo noqg dingrnam aky tulungam, no naalayil no At Swg daalin kunam nyook ho wl aky jidwb nyitayin,

²⁷‍hoo noqg boyuqnam aky tulungam, vdinam la uiyam noqg Pwnbo At Swg yugw ho jitayin. Noqg Pwnbo At Swg yugw ho noqg pwr jinam uiyam tooiyaq jitayin, hvbmabde vdinam no dvlatayin.

²⁸‍Ngoqg gaml jinam gomcwr mwlwngam hengab jaqb tvjwl swwto, ho hwdlo no hoggv aldvn noqg Pwnbo At Swg vnyiq kaagaho no nyil dooba loqkam, ho hoqhv noqg swwdy aalam hog mwlwngv altayin hoo noqg ko tulu ngvkam noqg kokwb nwrba xaqb alwb swwl dootayin.

²⁹“Hwdlo noqg Pwnbo At Sw noqg kaagaho nyob tulungam mvpaqyin, no ham wgdvl ruqpaqto, hoo no bulam ruqpaq tvl bulug gvdangam naal dootayin,

³⁰‍noqg kaagaho bulam twryum kokwngam, no hengab to, bulug lvgab wmin gvmabv, hoo no bulug pwnbo pagoqkam hwwkarl hvl bemabv, ‘Hoggub yu soq nyob tulu si bulug pwnboam xuml-paql doonum? —hoq hvbkalam ngo kam nyitwq to.’

³¹‍Noqg Pwnbo At Swn no bulug xumnam hvb xumabv, hoggab bulug pwnboam oyum dvb nyinam pagoq goqxiam At Sw bulum-kac dvn, hoggab bulug ko tuupam la bulug nyem koam bulug pwnbo gab wm pardwn.

³²“Ngoqg nam hog mwlw gaml jinam sam no hengab jaqb nyil swwn tayin. No ham vbw kamabv ho hoqgv naapaq kamabv.