Read Nyishi BETINAM PVVB 13 Bible Online

BETINAM PVVB 13 - Nyishi bible

BETINAM PVVB 13

¹“Nulug pengko hoqgv nyiqry kaal benbo maalo yuma maal swrdorxeqkam betam bov swwlin layil hoo nulam kama-tamanam mam la swrdorxeqkam jiyi nyiloqkam,

²‍hoo kama-tamanam mam la swrdorxeq mwwg nam betamnamv niqtuq lengma gab mwv nam, ‘Kuj ngulv asaq pwnbo kokwb wmin gvtuj, ‘hiyam noqg cengmanam pwnboam hoo bulam ngulv bon nyij tuj,’ hvl bebaloqkam,

³‍no nyiqry kaal benbo maalo yuma maal benbo gomcwr tulungam tamabv. Hoggab nulug Pwnbo At Sw nulug hvvjw lvgab hoo nulug yvj lvgab nulv mwam abynam mam, nulug Pwnbo At Sw nulam pooka do.

⁴‍Noqg Pwnbo At Swg kokwb no wmin gvtayin hoo mwam bos tayin hoo mwwg gaml tulungam pvvtayin hoo mwwg yalam tvjw tayin, hoo nulv mwam bon nyij tayin hoo mwam bugil swwtayin.

⁵‍Hvbmabde nyiqry kaal benboam la yuma maal benboam sim tayin, hoggab hiyv nulam Ijipt gvda hoqgv hoo nulam nyera raasurb swwl dook namlo hoqgv pvlywl boolin bo noqg Pwnbo At Swn taleq mvdwb mwv tomswr paku, ho noqg Pwnbo At Swg nam nyil swwm dvb gaml jinam hoqgv nam booxar paku. Ho noqg pengko hoqgv almanboam no mvpaq tayin.

⁶“Noqg vbw-borv, noqg annwg ko tuupv, ho noqg ko tuupv ho noqg nyem kov ho noqg abynam nywxwngv ho noqg yvj lvgab mwwjwnam tumanam ajinv nam kvsil jinyioql betayin, ‘hiyam no la noqg ab tulungv nywywngam cengka maanam mam, kuj ngulv asaq pwnbo tulug kokwb wgdvl mwam bon nyij tuj,

⁷‍noqg dis-paap nyiilug pwnboam, noqg ogum ho doonbo jaqkam ho noqg aado ho doonbo jaqkam, ho swcw nvg taqcgon ywwtwr hoqgv taqcgonwb nam xum dvb jijaqkam,

⁸‍no mwam loorwq maabv ho mwam tvjw maabv, ho noq vnyiqkv mwam aya kaapa maabv, hoo no mwam pvvl ap maabv, ho no mwam kvsil ap maabv.

⁹‍Hvbmabde mwam meng tayin. Noqg alaqkv otuqcob mwam mengdwb laqdaq cooto, hoo nyiilungam kokwb mvmin gvm to.

¹⁰‍No mwam wlw lvgab sidwb mvtayin, hoggab hiyv nam Ijipt gvda hoqgv la nyera raasurb swwl dook namlo hoqgv boolin boam, mwv nam noqg Pwnbo At Sw hoqgv aadob boogin dvb pagoq meegaqnum.

¹¹‍Hoo Israel nyi mwlwngv tapa tayin hoo bos tayin hoo nywywngam hoqhvb lokta nulug pengko ho nyic-nyia nyikram.

¹²“Noqg Pwnbo At Sw nam doogw mvdwb jidynam alo, noqg bopam ak pengko hoqgv no soq sam tapayin,

¹³‍nulug pengko hoqgv ximanam nyiingv wlin layil bopam hoqg doonbo nyiilungam bik-beya nv begamv, ‘Kuj ngulv asaq pwnbo kokwb wgdvl mwam bon nyij tuj,’ hiyam no nywywngam cengk maan ham,

¹⁴‍ho no ham hingky jaqb heqka tayin hoo hingky jaqb hwwgdvl anya jaqb tvi-tamil tox to. Hoo kaato, hoqhvb bulum-kac dvb nyinamv nulug pengko ho jvqtwl hoo lootw kuba loqkam,

¹⁵‍no hoggub nyijaqkam hoq bopam ho doonbo nyiilungam, hoo tuun-mee tulungam lyoqr orioq lvgab twrkub mengpaq tayin.

¹⁶‍No hoqg nyob pal naareqnam mwlwngam rooto ko ho jookum tayin hoo bopam mam hoqg nyob pal naareqnam mam wm parpaq tayin, hoqhv noqg Pwnbo At Swn boyuqnam aky hvb nyitayin. Hoqhv nwrba xaqb hwwpum paal apnam hvb nyitayin. Hoqham lokta mvdar kuram.

¹⁷‍Mvpaq sanam tulu ham noqg alaqho hog akkam kaqgab mvmabv, ho At Sw lokam mwwg hang lingtwrnam hoqgv nam ayangam kaakin tayin hoo mwv noqg ab tulungam dingr kunam hvb, nam hangv sib tayin hoo nam dumtwq-miilyw mvtayin,

¹⁸‍noqg Pwnbo At Swg yalam tvjwl, ho ngoqg soolo nam gaml jinam mwwg gaml tulu sam pvvba loqkam, hoo noqg Pwnbo At Swg vnyiq kaagaho hoggv jvqtw dvn ham nyiba loqkam.