Read Nyishi BETINAM PVVB 14 Bible Online

BETINAM PVVB 14 - Nyishi bible

BETINAM PVVB 14

¹“Nulv nulug Pwnbo At Swg ko tuup tulungv. Nyi sigam gab nulv nulug atwg dum mam atv reqpaq maabv ho tuqxo mvmabv.

²‍Hoggab no noqg Pwnbo At Sw gab dvrwqbo nyiilungv, hoo swcw nvg ao soqg nyiilug pengko soqgv, At Sw nam mwwg gumn otu nyiilu gob daalin pakun.

³“No bulum-kac dvb nyin boam akkam dvmabv.

⁴‍Soq svdin tulu sam nulv dvlatayin: svv, sviya, sibin,

⁵‍swcwr, sudum, bemb, nyoro sibin, swjwq, siby, hoo nyoro sviya.

⁶‍Lvpy peenyi bo svdin mwlwngam hoo aiyeq hoqgv xuqkur-xuqkurl nyaml dvnbo svdin tulug pengko hoqgv nulv vdin dvdwb nyitayin.

⁷‍Hvbmabde soq svdin tulu si aiyeq hoqgv xuqkur-xuqkurl nyaml dvs jaqkam hoo lvpy peenyi go doos jaqkam soq tulu sam dvmabv: svjin, buut kubu, hoo siky-bukiam, hoggab bulv aiyeq hoqgv xuqkur-xuqkurl nyaml dvs do hvbmabde lvpy peekin go baqdo, ho soq tulu si nulgab dvrwq maadwn.

⁸‍Hoo iriqkv lvpy peenyi go doos dvn hvbmabde aiyeq hoqgv xuqkur-xuqkurl nyaml dvma dvn, hoqgab si nulgab dvrwq maadwn. Bulug vdinam nulv dvmabv, hoo bulug eengam nulv idaq kamabv.

⁹“Iss uraho doonbo hog mwlwngam nulv dvla tayin: alap baqn bo la puswq baqn bongam nulv dvla tayin.

¹⁰‍Hoo hoggv xeq alap la puswq baqma dvn ham nulv dvmabv; hoqhv nulgab dvrwq maadwn.

¹¹“Nulv dvrwqbo pvta mwlwngam dvla tayin.

¹²‍Hvbmabde soq tulu sam nulv dvmabv: xookam, coqyum doonbo dookpulam, kaiya bo dookpulam,

¹³‍xooj, mwiya-tadangam;

¹⁴‍poaq hoolungam;

¹⁵‍mvra-kiigangam, twt-bwram, iss taady-tariam, twt-bwr hoolungam;

¹⁶‍pup-kaan anyo boam hoo nyuru otubo pup-kaanam, noosu pup-kaan

¹⁷‍hoo mwlangam, svma dvnbo dookpul hoo iss pukum,

¹⁸‍pojab, bogoli hoolungam; pvbiam hoo tapinam.

¹⁹‍Hoo alap gvnbo topum-yorup mwlwngv nulgab dvrwq maadwn; hoq tulu ham dvmabv.

²⁰‍Alap gvnbo mwlwngam nulv dvla tayin.

²¹“Nulv danyib sinbo vdinam dvmabv. Nulv ham nulug pengko ho nyoodo nyiilungam dvm dvb jito, ho mwam ham dvm to, ho nulv nyoodo nyiilungam ham puqla tayin. Hoggab no noqg Pwnbo At Swg dvrwqbo nyiilungv. “Nulv sibin ko akam ann gwwi lvgab xwnumabv. Jibwqnam.

²²“Vnyw-vnywngam noqg vly liinam hoqgv lengn boam jibwqnam mam jito.

²³‍Hoo mwwg eminam doom dvb daalin kunam nyook ho, noqg jibwqnam dvsam, ho roo ala twwsam, hoo noqg kutiam, hoo noqg tuun-mee otuqcob ko bwwnam ham, noqg Pwnbo At Swg agaho no dvta-twwtayin, ho noqg Pwnbo At Swwn no lwxiam bos dvb cengtayin.

²⁴‍Hoo lamtangv noqg gab aado baloqkam, ho noqg Pwnbo At Sw nam lvqc ciknam mam, no jibwqnam mam baqla kuma yin, ho noqg Pwnbo At Sw mwwg eminam doom dvb daalinam nyookv noqg gab aado baloqkam,

²⁵‍ho no ham twngkwb puqto hoo twngkam noqg alaqho bwwlayil noqg Pwnbo At Sw daalinl ap ko nyookub wto

²⁶‍hoo twngkam noqg mwwbynam ham rvn to—hvvb ho sviya ho roo ala twws ho poodwq bo, ho hoggv xeq no dwnw-twwnw dvn. Hoo noqg Pwnbo At Sw agaho no dvtayin hoo no la noqg imiq dvparv hwnyir-hvmar tayin.

²⁷‍Hoo noqg pamda uraho doonbo Lebi nyiilungam hoocum maab nyimabv, hoggab mwv noqg lvgab gumn otungam naamin gvmanum.

²⁸“Vnyw nywumv wnya yin hoqg vnyw hoqg noqg hog mwlwngam mvlin layil noqg jibwqnam ham noqg pamda uraho poocuml apto.

²⁹‍Hoo hoqham Lebi nyi tulug dvs gob nyim to, hoggab mwv noqg gumn-otu naak ho naamin gvmanum, hoo hiyv noqg pamda uraho doonbo nyoodo nyiilungv, ab dooma bo tulungv, hoo xwwmy tulungv hookuml ham dvdeq dvb dvtayin, ho noqg Pwnbo At Sw noqg alaq hoqg bonam nyinam mam lvqc citayin.