Read Nyishi BETINAM PVVB 15 Bible Online

BETINAM PVVB 15 - Nyishi bible

BETINAM PVVB 15

¹“Vnyw kvnv lwxiam wiyum yukun no hog mwlwngam topaq tolin dvb nyitayin.

²‍Hoo soq siib nyigdvl tolin dvb nyitayin: ceego bo vx-cwram mwv hoggv ceego pakun mwwg door-doopwngv apaq jidwb nyitayin. Mwwg door-doopwngv, mwwg vbw-borv mwam kokmabv, hoggab At Swg tolinl apaq jinam mam pui bibwq pakun.

³‍Nyoodo nyi tulu hoqgv ceenam mam kokur tuku, hvbmabde noqg vbw-bor tulug ceeknam mam apaq jitayin.

⁴‍Hvbmabde nulug pengko ho jwwgwbo nyi doom maabv; hoggab noqg Pwnbo At Swg nam gumn otu nvvsiq mvdwb jinam gvdangam At Sw lvqc citayin—

⁵‍ngoqg soolo nam gaml jinam gaml tulu sam hingky jaqb nyil swwb nyiloqkam, ho noqg Pwnbo At Swg yalam no kvtaq jaqb tvjwl nyil swwdwb nyitayin.

⁶‍Hoggab noqg Pwnbo At Sw mwv nam dingr kunam hvb nam lvqc citayin, hoo no naleqgo nyob tulungam cwwrwq tayin, hvbmabde no asaq galoqkv ceemabv, hoo no naleqgo nyob asaqkam pvvb bwwl doog tayin, hvbmabde bulv noqg aoho pvvb bwwl doog nyoram.

⁷“Nulug pengko ho, noqg Pwnbo At Sw nam jidynam noqg pamda dook gvdaho, noqg vbw-bor ak gon jwwgw baloqkam, noqg hangv vdw maabv ho noqg alaqkam noqg vbw-bor jwwgwbo gab loqtum tvl doog maabv,

⁸‍hvbmabde noqg alaqkam mwwg gab mvko jito hoo pagoq goqx ho, mwwg pwwma-cima yin mwam laaleq-kaakeq dvb jito.

⁹‍Hengab to, hvb mabaloqkam noqg hang ho no dooxa bo pagoqkam mwwl hoo no hvl beta yi, ‘Kvn vnywngv hvvnwq yuku, hog mwlwngam apaq de vnywngv ogumb hvvnwq yuku,’ hoo noqg vnyiqkv noqg jwwgwbo vbw-boram aya kaapa ram, hoo no mwam hog akkam jiram, hoo mwv nam ceekol At Swn xabkin tayin, hoo no nyicig laqm mam baqdwb nyitayin.

¹⁰‍No mwam danyi jaqb jito, hoo hwdlo no mwam jiyikam noqg hangv vdw maabv, hoggab noqg Pwnbo At Sw noqg bon nyinam mwlw ham hoo noqg hog mwlw nyinam ham lvqc citayin.

¹¹‍Hoggab gvdaho jwwgwbo nywywngam doomab nyiram. Hoqgab ngo nam gaml jidwn, ‘Noqg dook gvdaho noqg vbw-bor gab, dwc-twwpw maanbo gab hoo jwwgwbo gab, noqg alaqkam no mvko tvl dooto.’

¹²“Noqg vbw-bor, Hibru nyega, maalo Hibru nyem gon nam puqb nyiloqkam, mwv nam vnyw nywx go bon nyij tayin, hoo kvn deen vnywngam no mwam tolinl apaq jit ku.

¹³‍Hoo hwdlo no mwam noqg hoqgv tolinl apaq tvl wwm yukun, no mwam alaq asarb wwm mvmabv.

¹⁴‍No mwam noqg tuun-mee hoqgv naamto, noqg noosu hoqgv dvsam naamto, hoo noqg roo ala heexor ko hoqgv twwsam naamto. Noqg Pwnbo At Sw nam lvqc cinam hvb, no mwam jito.

¹⁵‍No Ijipt gvdaho nyera raasurb swwnam mam no mwwpa tayin, hoo noqg Pwnbo At Sw nam pvlyw pakun; hoqgab soolo ngo nam gaml jidwn.

¹⁶‍Hvbmabde mwv nam hvl beba loqkam, ‘Ngo noqg hoqgv lengkram,’ hoggab mwv nam la noqg imiq dvparam aby do, ho mwv noqg lvgab aljaqb swwpa ku,

¹⁷‍ho mwam viyap urab boolwq gvdwl mwwg nyurungam no piiko nanlo naag dvl piiko to, hoo mwv nwrba xaqb noqg nyera raasurb dootayin. Hoo noqg paqn tulungam kam nyinam akinam nyito.

¹⁸‍Hwdlo no mwam noqg hoqgv tolinl apaqyin mwwdwq maabv, hoggab vnyw nywx hoqgv papo go nyijo naanbo ree goqnam hvb mwv nyipa ku. Ho noqg Pwnbo At Sw noqg hog mwlw nyinam mam lvqc citayin.

¹⁹“Noqg svv hvvtw hoqg hoo sviya pvtw hoqg nyega ko bwwconam mwlwngam, noqg Pwnbo At Swn darxaq nvto. Noqg svv ko bwwconam mam no bonam nyin maabv, ho noqg sviya ko bwwconam mam vm reqmabv.

²⁰‍At Swg daalin kunam nyook ho vnyw-vnywngam noqg Pwnbo At Swg agaho no la noqg imiq dvparv ham dvtayin.

²¹‍Hvbmabde hoq tuun-mee tuluhv un-tar gvb nyiloqkam, ho hoqhv lukum-laqca ho nyiqca baloqkam ho vcjaqb un-tar gvb nyiloqkam, noqg Pwnbo At Swn ham pwr jimabv.

²²‍Noqg pamda uraho ham no dvtayin. Sudum mam la swcwr vdinam dvnam hvb dvrwq maanbov la dvrwq bov lvkin gob ham dvtayin.

²³‍No hoqg uiyam arro ham dvmabv; iss toonam hvb ham ked ho toopaq tayin.