Read Nyishi BETINAM PVVB 16 Bible Online

BETINAM PVVB 16 - Nyishi bible

BETINAM PVVB 16

¹“Abib poolwg nyicwngam nyil dooto hoo noqg Pwnbo At Swg Dvtv Durum dvnam mam nyil dooky to, hoggab Abib pool ho noqg Pwnbo At Sw nam Ijipt gvda hoqgv ai boolinum.

²‍Hoo mwwg eminam doom dvb At Swg daalin kunam nyook ho, noqg Pwnbo At Swn noqg tuun-mee hoqgv Dvtv Durum dvnam pwram no jitayin.

³‍Hoq lvgab no opap kiilwqnam mam dvmabv. Hentwr hen yikho wtw dvnam hvb, no aal kvn go opap kiilwq maanam mam dvtayin—hoggab no Ijipt gvda hoqgv nyebia jaqb lengknum—ho noqg swwnam bumpw ho no hoggub Ijipt gvda hoqgv lengknum ham mwwpa tayin.

⁴‍Aal kvn go noqg dwrbu-dwrya ho opap kiilwqnam wtwngam kaapa mvmabv, ho otuq aalwg ariyumg pwr jinam vdinam ar godab doolin mvmabv.

⁵‍Noqg Pwnbo At Swg nam jinam gvdag pamda tulug uraho no Dvtv Durum dvnam pwram jimabv,

⁶‍hvbmabde mwwg eminam doom dvb noqg Pwnbo At Swg daalin kunam nyook ho meng tayin, no Ijipt hoqgv lingd mood ariyum doonyiv haaro yukam, no Dvtv Durum dvnam pwram jitayin.

⁷‍Hoo noqg Pwnbo At Sw daalin kunam nyook ho no ham xwwnul dvtayin. Hoo noqg aram tombub no wkur taikun.

⁸‍Hoggab aal loox go no opap kiilwq maanam wtwngam dvtayin, hoo kvn deen aalam noqg Pwnbo At Swn piwr jwr-jwr dvb xumdwb dookum tayin. Hoq aalam no bonam nyimabv.

⁹“No hapta kvn go xitayin. Ham otuqjaqb am mam peerab hoqgv hapta kvnnam xirab tayin.

¹⁰‍Ho noqg alaq hoqgv noqg Pwnbo At Sw lvgab jidwb mwwbwqnam akiam jitayin, ho hapta hoqg sookuml dvnam mam no pvvtayin, mwwg nam lvqc ciknam mam, noqg Pwnbo At Swn no jitayin.

¹¹‍Hoo no la noqg ko tuupv la noqg nyem kov, noqg nyerangv la noqg paqnv, noqg pamda uraho doonbo Lebi nyi tulungv, nyoodo nyi tulungv, ab dooma bo tulungv, hoo noqg pengko ho xwwmy tulungv, mwwg eminam doom dvb noqg Pwnbo At Swg daalin kunam nyook ho, noqg Pwnbo At Swg agaho no hwnyir-hvmar tayin.

¹²‍Noqg Ijipt ho nyera raasurb swwnam ham no mwwpa tayin; hoo no soq gaml tulu sam hengab jaqb nyil swwtayin.

¹³“Hwdlo noqg jurpiq hoqgv hoo ala twwsam heexor ko hoqgv no nookum yukun, no aal kvn go Doogw Durum mam nyil dootayin.

¹⁴‍No la noqg ko tuupv la noqg nyem kov, noqg nyerangv la noqg paqnv, Lebi nyi tulungv, nyoodo nyi tulungv, ab dooma bo tulungv, hoo noqg pamda uraho doonbo xwwmy tulu lvgab noqg sookuml dvnam mam no nyil dool hwnyir-hvmar tayin.

¹⁵‍Hoggab At Swg daalin kunam nyook ho noqg Pwnbo At Swn no aal kvn go sookuml dvnam mam nyil dootayin, hoggab noqg Pwnbo At Sw noqg hog mwlw nyinam mam niqtuq nyilin mvdwb lvqc citayin hoo noqg alaqg bon nyinam mwlwngam no hemp jaqb lvkin gob nookum tayin.

¹⁶“Mwv daalin tanam nyook ho noqg nyega ko tulungam noqg Pwnbo At Swg agaho vnywngam luum go haadwb nyitayin: Sookuml Opap Kiilwq maab dwd moodam, Jurpiq Durum dwd moodam, hoo Doogw Durum dwd moodam haadwb nyidwn. Bulv At Swg agaho alaq asarb haanyiram.

¹⁷‍Noqg Pwnbo At Sw mwv nam lvqc ciknam hvbjaq, nyiicwr-cwrxiv mwwg jilanam mam jitayin.

¹⁸“Noqg Pwnbo At Sw nam jidunam pamda mwlwho no nyegam tulungam la saab tulungam xuqbwq tayin, noqg nyob hoolu hoqgv, hoo bulv nyegam gob nyil nyiilungam jvqtw pwwngam hwwtayin.

¹⁹‍No jvqtwngam nyik-nyiya maabv. No mwwswnam mam kaakin maabv, hoo no kam jinam mam loorwq maabv, hoggab kamv mwwlaqg vnyiqkam nyiqca mvdwn hoo jvqtwb pvvb mvm mvma dvn.

²⁰‍Jvqtw, hoo jvqtw arongam no nyil wto, ho no swwtayin hoo noqg Pwnbo At Swg nam jitanam gvda ham otu nvvsiq tayin.

²¹“Hwdlo noqg Pwnbo At Swg yugwngam no mvi kam Asera bviywrho svvn liinam hvb no svvn akkam liimabv.

²²‍Hoo noqg Pwnbo At Swg oyumnam, xumgw ko wlw swwrwngam no diimabv.