Read Nyishi BETINAM PVVB 17 Bible Online

BETINAM PVVB 17 - Nyishi bible

BETINAM PVVB 17

¹“Noqg Pwnbo At Sw gab no un-tar gvnbo ho almanbo svv hvvbam ho sviyangam pwr jimabv, hoggab hoqham noqg Pwnbo At Sw bulum-kac dvn.

²“Noqg Pwnbo At Sw nam jiknam pamda tulug uraho nyega maalo nyemv hiyv noqg Pwnbo At Swg vnyiq kaagaho mwwg birnam pvvbam juqbol almab nyinam mam noqg pengko ho kaapa baloqkam,

³‍hoo doonyiam ho poolam ho doa tolo doon boam, hogloq ham ngo nyima bvk hvl birnam yaab wxar kunv hoo asaq pwnbo tulungam bon nyijil hoo bulam xumk balo,

⁴‍hoo hoqham nam betam yin hoo no ham tapa dvn, ho no ham hingky jaqb hwwka tayin, hoo hoqhvb Israel uraho bulum-kac dvb nyinamv jvqtw nyipa ku hvl pwbw baloqkam,

⁵‍ho noqg toggoq tuluho hoqhvb hiyv almab nyinbo ham no lvvgwb boolin tayin, hoo no wlw lvgab hoq hvk nyegangam la nyem mam wlw hurx tayin.

⁶‍Sim tanam nyiig nyimur kunam mam nyi vnyi-oum go hvvky dook baloqkam mwam sim tayin; nyi akin go nyiig hoqg nyimur gab hvvky dootwq baloqkam nyi ham mengmabv.

⁷‍Hvvkig alaqkv otuqcob mwam hurx dvb wlw hurco tayin, hoo kokwb nyiilu mwlwngv hurtayin. Ho soq sib nyil noqg pengko hoqgv no almanam mvpaq tayin.

⁸“Akwn-akwn mengmin sunamv dooikam, akwn-akwn gumn otungam ceqmin sunamv dooikam, ho akwn-akwn mviyaq minsnamv dooikam, no pvvb mwbwq dvb nyiyi nyiloqkam, ho noqg pamda uraho vcjaqb pvvb mvla maanamv dooiyi nyiloqkam no gorab gvdwl noqg Pwnbo At Swg daalin kunam nyookub wgto.

⁹‍Hoo no Lebi nyub tulug la hvvky saab tulug dookub haag tayin, hoo no bulam tvi-tamil tox tayin, hoo bulv nam pvvbam bibwq jitayin.

¹⁰‍Ho At Swg daalin kunam nyook hoqgv bulv nam hoggv bibwq tayin ham no nyitayin. Hoo bulv nam hoggv nyim dvb beknum, hvbjaq ham no hengabl nyitayin.

¹¹‍Bulv nam hoggv nyim dvb tomswr kunam hvbjaq, hoo bulv nam hoggub pvvb mwjkunam hvbjaq no nyitayin. Bulv nam hognvk pvvbam bibwq jiknum ham no nyik-nyiya dvb nyiram, ho lvqbwq-laqc bvkam nyik-nyiya dvb nyiram.

¹²‍Ho hiyv nyi akv noqg Pwnbo At Swg agaho bon nyinbo nyub gvla hvvky tulug benam mam tamab nyinin bo nyiingam sim tayin. Soq sib no nyil Israel hoqgv alman boam mvpaq tayin.

¹³‍Hoo nyiilu mwlwngv sam tapal hoo bos tayin hoo lokta hvb nyitin dvb haakam kuram.

¹⁴“Hwdlo noqg Pwnbo At Swg jitanam gvdangam haal no ham gumn naal hoo hoqho doogw tvl hoo hvl beta yukun, ‘Ngoqg taqg-loosaqb nyob tulug doognam hvb, ngoqg aoso ngo lvpw at lo ak mvptayin,’

¹⁵‍jvqtw jaqb noqg Pwnbo At Sw noqg aoho lvpw at ak mwjtayin. Noqg vbw-bor ak gon noqg aoho lvpw at gob mvtayin. Noqg vbw-bor maanbo nyoodo nyiingam noqg aoho no lvpw at gob mvp maabv.

¹⁶‍Mwv mwwg atgab svpur aro lo naleqgo doog maabv ho maalo nyiilungam svpur naam dvb Ijipt wkur mvmabv, hoggab soq sam At Sw mwv nam bepa kun, ‘Nulv nywywngam lokta hoq lamtab wkur kumabv.’

¹⁷‍Hoo mwwgab mwv atv nywxw vigo naas maabv, hvb nyiba loqkam mwwg hangv luusaq tayin, ho maalo mwv mwwg atgab rupam la hunam naleqgo nookum maabv.

¹⁸“Hoo hwdlo mwwg lvpw pwqlw ho mwv dooikam, mwv soq pvvb kitap soqgv mwwg atgab xiqsil xeqp tayin, ho Lebi nyub tulungv ham loomin gvl tvqlwqnum.

¹⁹‍Hoo hoqham mwv doog tayin, hoo ham mwwg swwnam bumpw ho poory tayin, ho soqg pvvb gomcwr sam la gaml tulu sam tvjw, hoo hoq tulu ham nyil swwb nyiloqkam, mwwg Pwnbo At Swn mwv hoq hoqgv bos dvb cengtayin,

²⁰‍ho mwwg hangv mwwg vbw-bor tulungam koi yaanbo gob mwwram, hoo mwv gaml jinam soqgv vcwr gokam nyixiaqram, mwv lvqbwq-laqc hookam nyikaram, hoqgab mwv mwwg lvpw-hatiam, mwv la mwwg ko hury tulungam Israel uraho mwungul dooky tayin.