Read Nyishi BETINAM PVVB 18 Bible Online

BETINAM PVVB 18 - Nyishi bible

BETINAM PVVB 18

¹“Lebi nyub tulu ngvla Lebi nyob dvparv Israel nyi tulu lvgab gumn otu naamin gvram. Hoqgab bulv At Swn aky jinam dvs hoqgv bulv gumn otu nvvsiql dvtayin.

²‍Bulug vbw-bor tulug pengko ho bulv gumn otu naamin gvram; mwv bulam dingr kunam hvb At Sw bulug gumn otu gob nyitayin.

³‍Hoo nyub tulungv nyiilug pwr jinam aky hoqgv dvdwb nyitayin, hvvb jaqkam ho sviya jaqkam: bulv nyub tulungam vlw lwwg nvla coqpia vnyiam la vxy-aiyeq kam jitayin.

⁴‍Noqg otuqcob vly-axeq lengn boam, roo alangam la kutiam mvlin coonam mam, hoo otuqcob sviya ko bwwnam mam, no mwam jitayin.

⁵‍Hoggab noqg Pwnbo At Sw mwam la, mwwg ko tuup tulungam, lwxiam At Swg emin ho bon nyim dvb noqg nyob dvpar hoqgv mwam daalin pakun.

⁶“Hoo Israel pengko hoqgv Lebi nyi ak hv mwwg dook hoqgv noqg pamda lvvgwb lengla tayin —hoo mwv hwdlo hvvnw dvn mwv haala tayin —At Swg daalin kunam nyook ho,

⁷‍hoo mwwg Lebi ajinv At Swg agaho daqtwl bon nyinam hvb, mwwg Pwnbo At Swg emin ho bon nyitayin,

⁸‍ho hoggv mwwg ab imiq nyi tulu hoqgv puqnam hoqgv nvvrwqnam lvvgho mwv dvnam luukinam homyinb dvtayin.

⁹“Hwdlo noqg Pwnbo At Sw nam jinam gvda uraho no haaikun, no soq nyob tulug bulum-kac dvb nyinam tulu sam nyimin gvmabv.

¹⁰‍Mwwg ko tuup maalo nyem koam wm parl pwr jinboam, jerbiq tuun boam ho maalo nyiqry ben maalo pwp-pocu cwwl-koql kaanam, ho maalo nyoky ak hiqnam,

¹¹‍ho maalo nyi gwwly bo nyi maalo jiqr wn maalo, ho gwwn-nyiqry maalo ramlo goqca bo mwlwngam, nulug pengko ho akjijaqkam doom mvmabv,

¹²‍hoggab soq tulu sam nyin boam At Sw bulum-kac dvn. Hoo bulv soq bulum-kac sam nyil doogam gab, noqg Pwnbo At Sw bulam noqg kaaga hoqgv ruqlin lingdu do.

¹³‍Noqg Pwnbo At Swg agaho no timb dvb nyima bo nyiib nyil swwtayin,

¹⁴‍hoggab noqg soq ruqpaq tanam nyob tulu si nyiqry benboam la nyoky nyubam tvjwl swwdwn. Hvbmabde noqg Pwnbo At Sw nam hoqhvb nyil swwm dvb jima pakun.

¹⁵“Noqg Pwnbo At Sw noqg pengko hoqgv ngoqg sib nyinbo nyiqry ben boam noqg vbw-bor tulu hoqgv lengm tayin—ho mwam nulv tvjwl swwtayin—

¹⁶‍Hwdlo Horeb ho hookum yuk aalho noqg Pwnbo At Swg goonam mam no tvnw maalayil benum, ‘Ngam lokta ngoqg Pwnbo At Swg yalam tapa mvk maabv ho mwwg koibo wm mam lokta ngam kaapa mvk maabv, hvb nyib nyiloqkam ngo sita yi.’

¹⁷‍Hoo At Sw ngam benum, ‘Bulv hoggv agam goopa kun hv jvqtw do.

¹⁸‍Ngo bulug vbw-bor tulug pengko hoqgv noqg hvb nyiqry ben ak bul gab swwlin mvtayin. Hoo ngoqg gomcwram ngo mwwg agam ho vlwq tayin, hoo bulam ngoqg gamlam bem dvb jiknam hog mwlwngam mwv betayin.

¹⁹‍Hoo mwv ngoqg eminam betayin, ho hiyv lajaqkam ngoqg gomcwram tvjw maan boam, ngo atv jaq mwam pw-hwwtayin.

²⁰‍Hvbmabde mwam bem dvb ngoqg kanam maanam nyiqriam ngoqg eminam agam goob nyiloqkam, ho hiyv asaq pwnbo tulug emin ho agam goob nyiloqkam, hoq nyiqry benbo akam sim tayin.’

²¹‍Hoo noqg hang ho no hvl beb nyiloqkam, ‘Hoggub yu ngulv At Sw agam mam gooma pan hvl cenglaq tai?’—

²²‍hwdlo nyiqry ben bo ak hv At Swg eminam naal beikam, mwwg gomcwr benam tuluhv niqtuq lengma bvla jvqtw maaikam, ho nulv cengto hoqhv At Swg agam gomcwr goon kuma nyi; hvbmabde nyiqry ben bov mwwg mwwlwqb beknamv. Hoqgab no mwam vcwr gokam bos dvb ram.