Read Nyishi BETINAM PVVB 19 Bible Online

BETINAM PVVB 19 - Nyishi bible

BETINAM PVVB 19

¹“Hwdlo noqg Pwnbo At Sw nam jitanam gvda hoqgv noqg Pwnbo At Sw nyob tulungam mvpaqyin, hoo no bulam ruqpaq tvl hoo bulug bopam mam la bulug nam tuluho doogw yin,

²‍noqg Pwnbo At Swg nam gumn jinam gvdaho no bopam oum go xuqbwql xuqlinl ap tayin.

³‍Noqg Pwnbo At Sw nam gumn naam dvb gvda jinam ham xika gvdwl oum gob ham mvpin tayin, ho hoq tuluho haqma paqb nyi mengn bov kilwql kigw tayin.

⁴“Nyi akgon mwwg door-doopwngam mwam ceebio baqmab haqma paqb mengb nyiloqkam, hoq nyi mengn bov soqb kilwq baloq mwwg swwgam ywwtayin—

⁵‍hwdlo mwwg door-doopw lvgab nyorob wsw patab wbam layil, hoo mwwg alaqho lwwl wsw podu nan vxiv poqsuq layil mwwg door-doopwngam patab baloqkam—mwv soq bopam ak gonwb kilwql hoo dootayin,

⁶‍hvb nyima baloqkam nyi mengbo ham lamtangv aado ko-gab, minglwq deen bov mwam ruqtin layil mwam mengpaq tai yi, mwv sidwb nyima sunam, hoggab mwv mwwg door-doopwngam ceebio baql mengmanum.

⁷‍Hoqgab ngo nam gaml jidwn, no bopam oum sam xuqbwql xuqlinl aptayin.

⁸‍Hoo noqg ab tulungam mwv dingr kunam hvb, noqg Pwnbo At Sw noqg dwrbu-dwryangam taqt dvb mvikam, hoo noqg ab tulungam dingr kunam gvda mwlw ham nam jitayin—

⁹‍noqg Pwnbo At Swn aby gvdwl ngoqg soolo nam gaml jinam gaml tulu sam no hengab jaqb nyigdvl pvvto hoo mwwg lamtab wmin gvto—ho no soq bopam oum lvgab bopam loq oum gota vbw tayin,

¹⁰‍noqg Pwnbo At Swg nam gumn nvvsiq mvdwb jinam gvdaho svswqbo nyiam mengb nyiloqkam, hoo noqg aoho hoqg hijum gorgiv haatayin.

¹¹“Hvbmabde ak mwwg door-doopwngam ceebio baql hoo mwam tooiyal jwwgam gab hoq nyi hv sigam gab mwv hoq bopam ak gonwb kilwq baloqkam,

¹²‍ho bopam hoqg nyi nyiixa tulungv mwam hoqgv kanam nomkur tayin, ho mwam minglwq deen bo akwg alaqho gvqlwq jitayin, ho mwv sidwb nyitayin.

¹³‍Noqg vnyiqkv ham aya kaapa maabv, hvbmabde Israel hoqgv svswqbo nyiam mengn boam mengpaq tayin, ho hvb nyiba loqkam no alwb dootayin.

¹⁴“Noqg Pwnbo At Swg nam gumn otu naam dvb jitanam gvdaho, kolwg nyi tulu gvda vrr mvpnam mam noqg door-doopwg gvda vrram, no muk-mviya maabv.

¹⁵“Nyi akin hvvky jinam hoqgv nyi akv nyimur pan hvl ceekol mwam alman gob bela maadwn. Hvbmabde hwdlo nyi vnyi-oumv mwwg nyimurnam mam hvvky jiyikam mwam nyimur boogub bela tayin.

¹⁶‍Hvbmab xaalyob hvvky jil nyi akam nyimur boogub bem nyiloqkam,

¹⁷‍ho yolu doonbo dvpar vnyi-vnyiv At Sw gvla nyub tulu gvla hoo nyegam tulug oppis agaho haal daqdwb nyitayin.

¹⁸‍Nyegam tulungv hwwi-hwwmil hingky jaqb pagoqkam hwwtayin, hoo hvvky hv xaalyo bo hvvkib nyil mwwg vbw-boram xaalyo hvvky jil nyimur boogub bem nyiloqkam,

¹⁹‍ho mwwg vbw-boram mwv hoggv nyitanam, hvb nulv mwam mvtayin. Hoq hvb nyil nulug pengko hoqgv alman boam mvpaq tayin.

²⁰‍Hoo nyi mwlwngv ham tapa tvl hoo bos tayin, hoo nulug pengko hoqgv hiyv kam hoqhvb alman boam lokta nywywngam nyikram.

²¹‍Noqg vnyiqkv aya kaapa maabv. Swwgam swwg kalamb, vnyiqkam vnyiq kalamb, exiam exy kalamb, alaqkam alaq kalamb, lvpiangam lvpia kalamb mwlwqtayin.