Read Nyishi BETINAM PVVB 2 Bible Online

BETINAM PVVB 2 - Nyishi bible

BETINAM PVVB 2

¹“Ho At Sw ngam betam koob, ngulv deexa-rara urab haal Swlw Sa-svlo daiyab nyiody booknum. Hoo ngulv naleq aal go Seir Puutuho wky-wiywl wdunum.

²‍Ho At Sw ngam benum,

³‘Nulv soq gvda puutu so naleqgo wl yvpa ku. Nyoodum daiyab wto

⁴‍hoo nyiilungam gaml jito, “Nulv oyu maadwb nulug vbw Esu nyiilug dook Sier dwr-dwrya wpeql wtayin; hoo bulv nulam bos tayin. Ho nulv hengab jinjinl wla ka.

⁵‍Bulug lvgab nyob padwb mwwma bvka, hoggab nulam ngo bulug gvdangam lvc sampnam hwd gokam jiram, hoggab ngo Esunvn Sier Puutungam gumn bwwm dvb jipa kun.

⁶‍Nulv bul galoqkv dvsam la vdinam twngk hoqgv rvl dvtayin, hoo bul galoqkv nulv issam twngk hoqgv rvl twwtayin.

⁷‍Hoggab nulug Pwnbo At Sw nulug alaqg hog mwlw bon nyinam mam lvqc cipa kun. Mwv nulug soq koibo deexa-rara so wl doonam mam cengdwn. Soq vnyw campy so nulug Pwnbo At Sw nulug lvgab doobanum. Nulv hog akkam pwwma-cimab nyimanum.” ’

⁸‍Ho ngulv ngulug vbw Esug nyiilu dook Seir gvdag Araba, Elat hoo Ejion-geberb wnbo lamtangam apaq peel, taqc gob ya wnum. “Hoo ngulv Moabg deexa-rara daiyab tobkurl wknum.

⁹‍Hoo At Sw ngam benum, ‘Moab nyi tulungam hentwr-kaas dvb mvmabv ho bulug lvgab nyob pamabv, hoggab ngo bulug gvdangam nulam gumn naam dvb jiram, hoggab ngo Lotwg nyi tulungam ngo Ar gvdangam gumn bwwm dvb jipa kun.’

¹⁰(Otuqho Emim nyiingv hoqho doonum, ho nyiingv koi bvla mvqlwnum, hoo Anakim nyi tulu hvb aonum.

¹¹‍Anak nyi tulu hvb bulam Repaiyim hvl xitaqnum, hvbmabde Moab nyi tulungv bulam Emim hvl goqnum.

¹²‍Hor nyi tulungv otuqho Seirho doonum, hvbmabde Esug nyiilungv bulam ruqpaql bulug aga hoqgv twryumnum hoo bulv nyookho nvmcw doonum, At Swg bulam gvda jinam ho nyi doon boam, Israelv hoggub bulv ruqpaql twryum tvl otu nvvsiqnam hvb nyiknum.)

¹³‘Sija nulv gorab gvdkul hoo Jered kucwngam rabt ku.’ Ho ngulv Jered kucwngam rabknum.

¹⁴‍Hoo ngulv Kades-barnea hoqgv Jered kucwngam rabnam gob vnyw cammum leq piin gob nyiknum, ho At Swg bulam dingr kunam hvb nyob panbo nyi hotam mwlwngv svmcw hoqgv siyum kunum

¹⁵‍Hoggub hvbnyiloqkam At Swg alaqkv bulam ceekonum, bulv siyum maady deedib bulam svmcw hoqgv twryumnum.

¹⁶“Ho hwdlo nyob panbo nyi tuluhv svmcw hoqgv niiyum kunum hoo sinbo nyiilu hv bulug pengko hoqg nyiv,

¹⁷‍At Sw ngam benum,

¹⁸‘Soolo nulv Moab vrram Ar hoqgv wleq tuku.

¹⁹‍Hoo hwdlo nulv Ammon nyiilug dwrbu-dwryangam wpeq yin, bulam hentwr-kaas dvb mvmabv, ho nyob gokam pamabv, hoggab ngo nulam Ammon nyiilug gvdangam nulam gumn jiram, hoggab hoqham ngo Lotwg ko tuup tulungam gumn naam dukub jipa kun.’

²⁰(Hoqham Repayimg gvdangv hvl xitaqnum. Repayimv otuqho hoqho doonum—hvbmabde Ammon nyiilungv bulam Jamjummim hvl goqnum—

²¹‍nyiilu hv koi bvla mvqlwnum, hoo Anak nyi tulu hvb aonum; hvbmabde At Sw bulam Ammon nyi tulug kaagaho twryumnum, hoo bulv bulam ruqpanum hoo bulug nyookho nvmcw doonum,

²²‍mwv Isu nyiilu gab Seirho doonbo Hor nyi tulungam bulug kaagaho twryumnum, hoo bulam ruqpaq tvl bulug nyookho bulv nvmcw soolo godab doodwn.

²³‍Nampam hoqgv Gaja, hoo Kaptor hoqgv haanbo Kaptorimho doonbo Abbim nyiilungam twryum tvl hoo bulug nyookho nvmcw dooknum.)

²⁴‍Gorabto, nulug nyiodam boorabto hoo Arnon Lywpangam wleq tuku. Kaato, Hesbanwg lvpw at Amor nyi tulug Sihonnvn la mwwg gvdangam, ngo nulug alaqhv gvqlwq jipa kun. Mwam nyob pato hoo mwwg gvdangam gumnwb naato.

²⁵‍Soolo aal soqgv doa nvg niikum so doonbo nyiilu mwlwngam nam bos mvdwb ngo nyirab tayin, ho hiyv noqg puiyam tapa bo mwlwngv tvmdwr tayin hoo noqg eminam naadwb bostayin.’

²⁶“Ho ngo Kedemot deexa-rara hoqgv Hesbonwg Lvpw at Sihonnvn swrso puiyam pui baqn boam bilwql kanaml begamv,

²⁷‘Ngam noqg gvdangam wpeq mvla bv. Ngo lamtab wdinam wtwq tayin; ngo lvqbwq bvkam hoo laqc bvkam wkar-war jiram.

²⁸‍No ngam dvsam puqto, ngo rvl dvtayin, hoo ngam twwsam puqto, ngo rvl twwtayin. Ngam lvpiab wpeq mwtwq tvbv hvnum,

²⁹‍Ngulug Pwnbo At Sw ngulam jinam gvda Jordon urab ngo haanam xaqb, Seirho doonbo Esu ko tuup tulug nyiilungv hoo Arho doonbo Moab nyi tulungv ngam nyinam hvb nyitwq tvb.’

³⁰‍Hvbmabde Hesbonwg lvpw at Sihon ngulam mwwg gvdab wpeq mvmanum, hoggab nulug Pwnbo At Sw mwwg yalam kamtwr mvtayin hoo mwwg hangam wlw hvb nyim tayin, ho soolo soq nyinam sib mwam nulug alaqho mwv jilwq kamyi nvpv.

³¹‍Hoo At Sw ngam benum, ‘Kaato, Sihon nvla mwwg gvdangam nam jirab gvikun. No mwwg gvdangam gumnwb bwwrab tuku.’

³²‍Ho Sihon la mwwg nyiilungv ngulam nyob patab ceekol Jahajho lengrwqnum.

³³‍Hoo ngulug Pwnbo At Sw mwam ngulam jiknum, hoo ngulv mwam la mwwg ko tuup tulungam hoo mwwg nyiilu mwlwngam ngulv mviyanum.

³⁴‍Hoo ngulv hoq moodho mwwg bopam mwlwngam naareq kunum hoo bopam mam, nyega tulungam, nyem tulungam, hoo ko tulungam twrkiq-twrmal twryumnum. Ngulv akjijaqkam swwl doom mvmanum.

³⁵‍Ngulv bopam tulungam naareqnum hoo ngulv tuun-mee arongam ngul atgab naanum.

³⁶‍Arnon Lywpag bviywr hoqgv Aroyer namgub, hoo lywpa hoqg bopam mwlwngam naalayil Gilead namgub naalnum, ngul gab bopamho aobo sulu akkam doomanum. Ngulug Pwnbo At Sw mwlwngam ngulug alaq urab jiknum.

³⁷‍Ammon ko tuup tulug gvdangam aro nulv hvvnwq maanum, hoqhv Jabbok pobu soiyoq kvla diisw gvdag bopam tulungv, hoq tulu ham ngulug Pwnbo At Sw ngulam haam mvmanum.