Read Nyishi BETINAM PVVB 20 Bible Online

BETINAM PVVB 20 - Nyishi bible

BETINAM PVVB 20

¹“Hwdlo noqg ceebiongam no nyob patab wikam, hoo svpur tulungam hoo ceriot tulungam hoo noqg sipaiyam mvqlw yaadwb kaapa yin, bulam no bos maabv, hoggab nam Ijipt gvda hoqgv lvvgwb boolin kunbo, noqg Pwnbo At Sw noqg lvgab dooba dvn.

²‍Hoo hwdlo nulv nyob pakwb ogumb hvvnwq yin, nyubv ogumb hvvnwql nyiilungam agam gootayin

³‍hoo bulam betayin, ‘Tato, Israela, soolo nulug ceebio tulug ogumb nulv nyob patab wdu dvn: nulug hangv mwwcu-saqya maabv. Nulv bosil ho mwwdwq maabv ho bulam biig sumabv,

⁴‍hoggab noqg Pwnbo At Sw nulug lvgab wbal nulug ceebiongam ceekol nyob patayin, ho mviyanam mam nulam jitayin.’

⁵‍Ho saab tulungv nyiilungam agam gool hvl betayin, ‘Nulug pengko ho hvk nyiv dood yv hiyv nam nit mvtwl ham sija godab darxaq maata bov? Hvk nyiv dood nyiloqkam mwam mwwg nammwb wkur mvto, hvb mabaloqkam mwv nyob pak alo sita yi hoo nyi asaqkv mwwg nam mam darxaq tayin.

⁶‍Hoo nulug pengko ho hvk nyiv dood yv hiyv roo boolungam liitwl hoqg aaxiam sija godab dvka maata bov? Hvk nyiv dood nyiloqkam mwam mwwg nammwb wkur mvto, hvb mabaloqkam mwv nyob pak alo sita yi hoo nyi asaqkv boolug aaxiam dvmin tayi.

⁷‍Hoo nulug pengko ho hvk nyiv dood yv hiyv nyem mam begaq tvl hoo mwnwn naama tanbov? Hvk nyiv dood nyiloqkam mwam mwwg nammwb wkur mvto, hvb mabaloqkam mwv nyob pak alo sita yi hoo nyi asaqkv mwnwn naata yi.

⁸‍Hoo saab tulungv nyiilungam ak ta hvraqb agam goonv hoo begamv, ‘Nulug pengko ho bos bo la hang mwwcu-mwwya bo dood yv? Hvk nyiv dood nyiloqkam mwam mwwg nammwb wkur mvto, hvb mabaloqkam mwwg hang honam hvb mwv mwwg ajin tulungam hang hopaq mvta yi.

⁹‍Hoo hwdlo saab tulungv nyiilungam agam gooyum kalam, nyiilungam nyig-wgbo tulungam xuqbwq xuqlin tayin.

¹⁰“Hwdlo no bopam ak golo nyob patab hoq ogumb hvvnwq yin, ham swrsob ludum tvk hvl beka to.

¹¹‍Hoo hoqhv nam swrsob svgagvrwql ludum baloqkam, hoqho doonbo nyiilu mwlwngv noqg gab bon nyinw maajaqkam bon nyidwb nyitayin hoo nam nyera-paqn gob swwj tayin.

¹²‍Hvbmabde hoqhv noqg lvgab swrsob ludum maab, nam ceekol nyob paba loqkam, ho no ham naareq tayin.

¹³‍Hoo hwdlo noqg Pwnbo At Sw noqg alaqho ham gvqlwq jiyin, no hoqg nyega tulu gab lyoqr orioq lvgab mengtayin,

¹⁴‍hvbmabde nyem tulungam hoo ko anyo tulungam, tuun-mee tulungam hoo bopam uraho hog mwlw nyob pal naareqnam mam no noqg gab naal wgtayin. Hoo noqg ceebio tulungam nyob pal naareq kunam mam, noqg Pwnbo At Sw nam hwnyir-hvmarl doog mvdkub nam jipa kun.

¹⁵‍Hoqgab hogloq hv soq nyob tulu soqg bopam maapan, ho noqg hoqgv aado bo bopam mwlwngam no hoqhvb mvtayin.

¹⁶‍Hvbmabde noqg Pwnbo At Sw nam gumn naam dvb jinam nyiilug bopam tulu ham, no akjijaqkam saql doodwb jimabv,

¹⁷‍hvbmabde Hittait nyi tulungam hoo Amor nyi tulungam, Kanaan nyi tulungam hoo Perijj nyi tulungam, Hibitait nyi tulungam hoo Jebus nyi tulungam noqg Pwnbo At Swg gaml jik jaqb, no bulam twrkiq twrmal twryum tayin,

¹⁸‍ho bulv nam bulug pwnbo tulungam bulum-kac dvb nyinam tulu ham tomswr nyoram, hoo noqg Pwnbo At Swn no ceekol nyic nyidwb nyikram.

¹⁹“Hwdlo no bopam mam nyob pal naareq dvb oyu mood gob nyil doos jaqkam, no aaxy xeenbo svvn tulungam vxy lvgab kwrtab maabv. No hoq hoqgv aaxy dvdwb nyikam yinpv, hvbmabde no hoq tulu ham kwrtab maabv. Rongog svvn tuluhv nyia ko ngvi yv, no hoq tulu ham mengta gvdwn?

²⁰‍Dvnam gob nyima bo noqg cengnam svvn tulungam arro ham no kwrtabl hoo twryum xaato, hoqhv yuupaq maady deedib, hiyv noqg lvgab nyob pal naareq kunam svvda hoqgv bopam mam sulu nwqtum nvtayin.