Read Nyishi BETINAM PVVB 21 Bible Online

BETINAM PVVB 21 - Nyishi bible

BETINAM PVVB 21

¹“Noqg Pwnbo At Sw nam gumn naam dvb jinam gvdaho nyi mengbo cengmab, mengnam svmangam gvdaho joopaqnam mam kaapa baloqkam,

²‍ho noqg nyi nyiixa ngvla nyegam tulungv lvvgwb lengtayin, hoo bulv hoqg dis-paap bopam tulug aadongam xika tayin.

³‍Hoo svma dook hoqgv mwlwngam ogum yaanbo bopamg nyi nyiixa tulungv svv hvvdo luuk tuka maanam la bonam nyin maanam ak naatayin.

⁴‍Bopamg nyi nyiixa tulungv svv hvvdo ham iss nywywngam xoomab tol dook pobu lywpab bool tayin, hoo lywpa ho bulv svv hoqg lwwpongam piiriq tayin.

⁵‍Ho Lebig ko tuup, nyub tulungv ogumb haatayin, hoggab noqg Pwnbo At Sw bulam daalin pakun mwwg gab bon nyim dvb hoo At Swg emin ho lvqc citayin, hoo hog mwlw yolu-swcin hoo paiyaq-nwqyaq minsnam mam bulv pvvb mvl pvvb patayin.

⁶‍Hoo svma dook hoqgv mwlwngam ogum yaanbo bopamg nyi nyiixa tulungv lywpa ho svv lwwpo piiriq kunam aoho bulug alaqkam losuq tayin,

⁷‍hoo bulv betayin, ‘Ngulug alaqkv soq nyi sam hilw twwma, ho ngulug vnyiqkv hilw twwn boam kaapa ma.

⁸‍At Swa, hiyam no pvlyw kunam, noqg Israel nyiilug nyic kwly gab pwr jinam sam loorwq to, hoo svswqb swwnbo noqg Israel nyiilug pengko lo hilw gorgiam baqm mvmabv, hoqgab gorgy baqma dvb soq nyic kwlib pwr sam jig yukun.’

⁹‍Ho hoggv jvqtw dvn ham no At Swg vnyiq kaagaho no soq sib nyil noqg pengko hoqgv svswqbo nyiam hilw twwnam nyicam mvpaq tayin.

¹⁰“Hwdlo noqg ceebiongam no ceekol nyob patab wikam, noqg Pwnbo At Sw bulam noqg alaqho haam dvb jidwn hoo bulam no nyumwb boodwn,

¹¹‍hoo nyumwb boonam nyem pengko hoqgv no kangam bo nyem akam noqg nywxwb mwnwn no nvvnw baloqkam,

¹²‍hoo noqg namho mwnwn no boa baloqkam, mwnwg dumpo dum mam reqpaq tayin hoo mwnwg lvqsinam geqpaq tayin.

¹³‍Hoo mwnwn nyumwb bootaq nan vjam mwn kooly tayin hoo pool bargwb mwn namho mwnwg ab-annam mwwdwq nyix-riil dootayin. Hoq kokwb no mwnwn nyem naatayin hoo mwnwg nyol gob nyitayin, hoo mwn noqg nywxwb nyitayin.

¹⁴‍Hvbmabde no mwnwn kvvlwq mabalo, mwnnvn mwnwg mwwlwq koob wwm tayin. Hvbmabde no mwnwn twngkwb puqdwb nyiram, ho mwnwn no paqnwb bwwla ram, hoggab mwnwn no doog paku.

¹⁵“Nyega akv nywxw vnyi go doob nyiloqkam, akwn ham abynum hoo akwn ham aby yoomanum, hoo abynam akv la aby maanam akv mwam ko dooj kunum, hoo ko bwwconam akv aby maanam hoqgv dook baloqkam,

¹⁶‍ho hwdlo aalam mwwg gumnam mwwg ko tuup tulungam mwv otu jisiq yukun, mwwg aby maanam nywxw hoqg ko bwwconam mam doom tvl, mwv mwwg abynam nywxw hoqg ko tuupam ko bwwconam gob xila ram,

¹⁷‍hvbmabde aby maanam hoqg ko bwwconam mam, mwv ko bwwconam gob xitayi, ho mwwg doognam hoqgv mwv vi yaagwn mwam jitayin, hoggab mwv mwwg otuqcob ator torlinamv. Mwv tuup vbwb nyigam gab hv mwwg nvvdinv.

¹⁸“Nyi akv tamy bo la taleqbo ko tuup ak doog yin, mwv mwwg ab-ann benam mam tama tayin, hoo bulv mwam gwrjaqkam, mwv bulam tagabram,

¹⁹‍ho mwwg ab-annv mwam nootu layil mwwg dook nyook hoqgv mwam nyi nyiixa tulug dookwg bopam toggoqb boolin jitayin,

²⁰‍hoo bulv mwwg bopamg nyi nyiixa tulungam betayin, ‘Ngunyig soq ko tuup si tamy bvla taleqdo; mwv ngulug tomswrnam mam tama dvn; mwv dvlam-twwlam do.’

²¹‍Ho bopamg nyi mwlwngv mwam sidwb wlw lvgab wlw hurx tayin. Hoqhvb noqg pengko hoqgv no alman boam mvpaq tayin, hoo Israel nyi mwlwngv ham tatwl hoo bos tayin.

²²“Hoo nyi ak ham, mengpaq dvb jaq mwv nyic-nyia nyik baloqkam hoo mwam sim himpa mwwd nyiloqkam, no mwam svvn aoho pvqswrl paqyin to,

²³‍hvbmab mwwg svmangam svvn ho ai namgub doom mvmabv, hvbmabde hoq aal darangam no mwam svma liitayin, hoggab pvqswrl paqyinam nyi akv Pwnbog beenamv. Noqg Pwnbo At Sw nam gumn otu gob jinam gvda ham no kac mvmabv.