Read Nyishi BETINAM PVVB 22 Bible Online

BETINAM PVVB 22 - Nyishi bible

BETINAM PVVB 22

¹“Noqg vbw-bor tulug svv hvvbam la mwwg sviya gaqxarbo tulungam no kvvmw peel wleq maabv. Noqg vbw-bor dookub bulam no bookurl boa jitayin.

²‍Hoo mwv noqg ogum ho dooma nyiloqkam hoo mwv hiyv no ham cengma nyiloqkam, no ham noqg namho boa tayin hoo noqg vbw-borv ham meegaq maady deedib, ham noqg lvgab daqg tayin. Ho no mwam ham jikur jitayin.

³‍Hoo no hoq nyinam luukin ham mwwg svdam mam ho mwwg vjam, ho noqg vbw-borwg hog ak nyiin bongam ham no kaapa baloqkam, no ham kvvmw peel wleq maabv.

⁴‍Noqg vbw-borwg svdam maalo hvvbv lamtag bwdw ho yoqlwq yukam ham no kvvmw peel wleq maabv. Hvbmabde hoq yoqlwqbo ham no mwam svkal naalin mingto.

⁵“Nyemv nyega vjam koomabv, ho nyegangv nyem vjam koomabv, hoggab soq sam hiyv nyidwn hv noqg Pwnbo At Swn bulum-kac dvb nyipa ku.

⁶“No svvn hooma lo kedho pvta osup ho pvta annv ko lvgab maalo pwpam gubdul doon boam no ham wpeql kaapa baloqkam, no ham annam la koam naamabv.

⁷‍No annam jarleq mvtwl kongam no nvvnw baloqkam naato, ho hoqhvb nyinamv noqg lvgab altayin, hoo no oyu go swwl dootayin.

⁸“Hwdlo no nam nitbo mvikam, namho loqjum mam aljaqb mwlwqto, ho hiyv kam noqg nam hoqgv danyib nyiv yoql layil yoqxwl siram.

⁹“Noqg roo boolu ho vly luunyi go liimabv, hvb liiba loqkam, noqg hoq liinam aaxiv xeelin balo no ham pumabv.

¹⁰‍Svdam mam la svvngam no lvkin gob rongo tuqn maabv.

¹¹‍Pud vjam la svcaq vjam lvkin gob no koomabv.

¹²“Noqg vj tulu cwwrw rwpyho no opu-anyinam cumlwq tvl no atv kootayin.

¹³“Nyi akv nyem mam nyem naal nywxw bwwpel hoo mwnwn oyum baloqkam

¹⁴‍hoo xaalyob bel mwnwn nyimur bogub bel hoo mwnwg eminam almadwb bekarnv begamv, ‘Ngo soq nyem sam naanum, hoo ngo mwnwn nywxw bwwnum, hvbmabde ngo mwnwn cwwtwqbo mvvngam gob hempa kumanum,’

¹⁵‍ho nyem nyijwr hoqg ab-annv mwnwn boolayil mwnwg cwwtwqb mvvngamb swwnam mam bopamg nyi nyiixa tulu dookub bopamg toggoqho boolin tayin.

¹⁶‍Hoo nyem nyijwrg abv nyi nyiixa tulungam betayin, ‘Ngo soq nyi sam ngoqg nyem koam nyem jinum, hoo mwv mwnwn sija oyum do;

¹⁷‍hoo kaato, mwv mwnwn nyimurl nyixiaq bogub benv begamv, “Ngo noqg nyem ko sam cwwtwqbo mvvngam gob hog hempa kuma.” Hoo hvbsujaqkam soq si ngoqg nyem koog cwwtwqb mvvngamb yocu-yabio nyinamv.’ Hoo bulv bopamg nyi nyiixa tulug agaho puutaqnam vjam taaborl kaakin tayin.

¹⁸‍Ho bopamg nyi nyiixa tulungv nyi ak ham nootul vcjaqb xipwql jwwtayin,

¹⁹‍hoo bulv mwwg galoqkv rup sikil lwwgwb xoolin tayin hoo ham nyem nyijwr hoqg abam jitayin, hoggab mwv Israelwg cwwtwqbo mvvngam tulug aoho almanbo yocu-yabio eminam baqa paku. Hoo mwn mwwg nywxwb dootayin. Mwv mwnwn mwwg swwnam bumpw ho tumin sul apaq dvb nyikram.

²⁰‍Hvbmabde nyem nyijwr hv cwwtwqb mvvngam kumab yocu-yabio gob hoo nyega hoqg benamv jvqtw kubaloqkam,

²¹‍ho nyi nyiixa tuluhv nyem nyijwr ham mwnwg abwg nam viyap bviywrho boolin tayin, hoo mwnwg bopam hoqg nyi tulungv mwnwn wlw lvgab sidwb hurx tayin, hoggab mwn mwnwg ab namlog Israelwg uraho vc loodab hvnyw dvb mwnwg nyem wma taab yocu-yabio gob nyipa ku. Hoqgab soq sib no nyil noqg pengko hoqgv alman boam mvpaq tayin.

²²“Nyi akv nyi asaqg nywxwngam doog baloqkam, vnyi-vnyiam sidwb mvtayin, nyegangam kam hoo nyem mam kam. Soq sib no nyil Israel hoqgv alman boam mvpaq tayin.

²³“Nyem begaqnam mvvngam mam nyegangv mwnwn bopam uraho kaapa layil hoo mwnwn doog baloqkam,

²⁴‍ho nulv vnyi-vnyiam bopamg toggoqho boolin tayin, hoo nulv vnyiam wlw lvgab sidwb hurx tayin, hoggab nyem nyijwr hv mwnwn bwwk maadwb mwn bopamg nyiilungam svka gab sogoq maanum, hoo nyega ak hoqg nyixiaqnamv mwv mwwg door-doopwg nywxwngam bwwgam gab. Soq sib no nyil noqg pengko hoqgv alman boam mvpaq tayin.

²⁵“Hvbmabde nyem begaqnam nyem nyijwram nyega akv nyoro ho wrwq layil mwv mwnwn nootul tublil nyily laqlaql doog baloqkam, hoqhvb nyinbo nyega aro ham sidwb mvtayin.

²⁶‍Hvbmabde no nyem nyijwram hog akkam mvmabv; hoggab mwn sidwb hvk jaqyo go nyimur nyij ma. Hoggab soq sib nyi akv mwwg door-doopwngam tooiyal mengnam hvb nyidwn,

²⁷‍hoggab mwv mwnwn nyoro ho wrwqnum, hoo nyem begaqnam nyem nyijwr hv mwnwn svkal mwpy kudwb sogoq sujaqkam mwnwn mwpil ywwlin bo akkam nyoro ho doomanum.

²⁸“Nyem begaq maanam mvvngam mam nyega ak wrwq layil mwv mwnwn nootul tublil nyily laqlaql doognam mam kaapa baloqkam,

²⁹‍ho nyega ak hv nyem nyijwr hoqg abam rup sikil camng go soorwb jidwb nyitayin, hoo mwn mwwg nywxwb nyitayin, hoggab mwv mwnwn hvnyw nyisu paku. Mwnwn mwwg swwnam bumpw ho tumin sul apaq dvb nyila kuram.

³⁰“Hiyv kam mwwg ab nywxwngam nywxw boomabv, ho mwwg abam mwv hvnyw nyisu dvb nyiram.