Read Nyishi BETINAM PVVB 23 Bible Online

BETINAM PVVB 23 - Nyishi bible

BETINAM PVVB 23

¹“Otum kwnam mvla peepaqnam At Swg nyi tulug dookum ho haanyi ram.

²“Nyem-nyega naangam maanbo hoqgv nyem-nyegab naalayil ko doonam ko tuluhv At Swg nyi tulu dookum ko ho haanyi ram. Hotam wyw namgub mwwg ko hosiqkv At Swg nyi tulug dookum ko ho haanyi ram.

³“Ammon nyi maalo Moab nyi tulungam At Swg nyi tulug dookum ko ho haam mvmabv. Hotam wyw gob bulv nyis jaqkam bulam At Swg nyi tulug dookum ko ho nwrba gob haam maabv,

⁴‍hoggab hwdlo nulv Ijipt hoqgv leng layil lamta ho wdu yikho bulv nulam dvs-twwsam lamta ho jirwq maanum, hvbmabde nulam beex mvdvb Mesopotamiyag Petor hoqgv Beyor gv ko tuup Balaamnvn ceeko mvdwb nyub goqanum.

⁵‍Hvbmabde noqg Pwnbo At Sw Balaamwg benam mam tamanum; nulam beenam mam, noqg Pwnbo At Sw lvqc gob ya mvknum, hoggab noqg Pwnbo At Sw nam aby dvn.

⁶‍No bulug swrsongam la bulug swwnam-geenam mam noqg swwnam bumpw ho nwrba gob meegaq maabv.

⁷“No Idom nyi tulungam oyum maabv, hoggab mwv noqg vbw-borv. No Ijipt nyi tulungam oyum maabv, hoggab mwwg gvdaho no nyiogy wl doogwnum.

⁸‍Bulug hotam oumho ko bwwnam akv At Swg nyi tulug dookum ko ho haala tayin.

⁹“Hwdlo noqg ceebiongam no ceekol nyob pad moodam, noqg svmcw uraho no dvrwq maan boam vcwr gokam nyimabv.

¹⁰“Nulug pengko hoqgv nyi ak gon dvrwq maanbo doola cablin baloqkam, mwv svmcw lvvgwb lengtayin. Mwv svmcw urab haanyi kuram,

¹¹‍hvbmabde ariyum yukun mwv iss lvgab gv hurs tayin, hoo doonyiv haaro yukun mwv svmcw urab haala taikun.

¹²“Svmcw lvvgho no dook nyook ak pvvtayin, hoo no hoqho lengdwb nyitayin.

¹³‍Hoo noqg lvgab loodab loq ak no doog tayin, hoo hwdlo no lvvgho dooikam, hoqg lvgab no ung dukoq tayin hoo noqg usum-eengam hoqho silwq-ilwq tayin hoo no svmcwb wkur yukun ham mwrlup peel haatayin.

¹⁴‍Hoggab noqg Pwnbo At Sw noqg svmcwg pengko ho nam boolin dvb wgaql yvdwn, hoo noqg ceebio tulungam noqg haabo ho jitayin, hoqgab hoggub nyijaqkam noqg svmcwngam dvrwq dvb doom to, ho mwv lokam noqg pengko ho kac boam kaapa tvl, noqg hoqgv tobkurl wleq kvmtwqto.

¹⁵“Nyera-paqn ak mwwg at-ai dook hoqgv kelayil nam ywwk dvb kilwq baloqkam, ham mwwg at-ai dookub no rookur maabv.

¹⁶‍Noqg bopam uraho mwv hogloq ho doodwb mwwbwq dvn, hoqho mwam noqg pengko ho, noqg lvgab doom to. No mwam alman boam nyimabv.

¹⁷“Israelwg nyem kov nywywngam xumk namlo ho meqjo bogub nyimabv, hoo Israelwg ko tuupv nywywngam xumk namlo ho meqkar bob nyimabv.

¹⁸‍Noqg meqjonam twngkam noqg Pwnbo At Swn aky jimabv, ho ikig bon nyijongam noqg Pwnbo At Swg namlo ho bwa maadwn, hoggab soq vnyi-vnyi sam noqg Pwnbo At Sw bulum-kac dvn.

¹⁹“Noqg vbw-boram noqg twngk cwwrwqnam mam, dvs cwwrwqnam mam, hog dupum-dvrab cwwrwqnam mam, no leqbaq tvl naakur kumabv.

²⁰‍No nyoodo nyi akam leqbaql naanam mam naatayin, hvbmabde noqg vbw-boram no leqbaql naamabv, hoggab no hogloq gvdaho haalayil ham gumn naal hog mwlw nyinam mam noqg Pwnbo At Sw lvqc citayin.

²¹“Noqg Pwnbo At Swn noqg dingr kunam mam, no ham niqtuq nyilin dvb oyu maabv, hoggab noqg Pwnbo At Sw ham hoggub nyijaqkam noqg galoqkv naadwb nyitayin, hoo ham no jima baloqkam hoqhv nam nyic gob nyitayin.

²²‍Hvbmabde no jidwb dingrnam mam dingma mabaloqkam, hoqhv nam nyic gob xitaq jiram.

²³‍Noqg nvbcwrv hoggv bir pakun, ham no hengab jaqb niqtuq nyilin dvb nyitayin, hoggab noqg Pwnbo At Swn noqg agam hoqgv jaq no atv tomj supa kun.

²⁴“Noqg door-doopwg roo boolu ho no haaikam, noqg aiyeqho dvdeq namgob dvto, hvbmabde noqg igin-naara ho pulwql baqmabv.

²⁵‍Noqg door-doopwg am rongo uraho haaikam noqg alaq lvgab vmlywngam ciqto, hvbmabde noqg door-doopwg am rongongam pee lvgab idaq jimabv.