Read Nyishi BETINAM PVVB 24 Bible Online

BETINAM PVVB 24 - Nyishi bible

BETINAM PVVB 24

¹“Nyega ak mwwg gab nyem ak naanum, hvbmabde mwnwn mwwg vnyiqkv kvvlwq kumanum hoggab mwn mwwg hinglwq-kvvlwq maadwb nyil doonum, hoo mwnwn mwv apaq gvi kun hvl pota taqg xeqtwl ham mwnwg alaqho gvqlwq tvl mwnwn mwwg nam hoqgv kanam namlin dukun, hoo mwn mwwg nam hoqgv wleq dukun,

²‍hoo mwn wlayil nyega asaq gab nywxwb swwk baloqkam,

³‍hoo kokwngam hoqg nyega hvvkam mwnwn oyuml haqpaq kunum hoo mwnwn apaq gvi kun hvl pota taqg xeqtwl ham mwnwg alaqho gvqlwq tvl mwnwn mwwg nam hoqgv kanam namlin dukun, ho mwnwg vnyi dvb nyol naanam hv kokwngam sik baloqkam,

⁴‍hiyv mwnwn kanam nampaq kun bo, otuqg nyol ak hv mwnwn mwwg nywxwb lokta naanyi kuram, hoggab mwnwn kacdvb nyipa ku, hoggab hoqhv At Swg agaho bulum-kac dvb nyipa ku. Hoo noqg Pwnbo At Sw nam gumn naam dvb jinam gvdaho nyicam no bvqlwq maabv.

⁵“Nitib nyem naanbo nyegangam sipai swwm dvb wwm maabv ho nyob dvpar gab bon nyim dvb kanam maabv. Mwwg nywxw naanam lvgab mwam vnyw nywgwb namho swrsob doom to.

⁶“Hiyv kam cvngparam huttab naamabv, hoggab ham naanamv nyi swwgam naanam hvb nyidwn.

⁷“Nyi ak mwwg Israelwg nyiilug vbw-bor hoqgv dvcobo ak kaapa baloqkam ho nyumwb boolayil hoo mwam nyera gob mvl ho mwam puqb nyiloqkam, ho hoqg dvco bo nyi ak ham sim tayin. Hoqhvb nyil noqg pengko hoqgv alman boam no mvpaq tayin.

⁸“Tviyiq dooi vc boam hengab jaqb nyito, Lebi nyub tulungv nam hoggv tomswr tayin hvbjaq no hengabl nyil wto. Ngo bulam gaml jiknum, hoqgab nulv hengab jaqb nyitayin.

⁹‍Nulv Ijipt hoqgv leng layil lamta ho wdu yikho noqg Pwnbo At Sw hoggv Miriyamnvn nyiknum ham mwwpa laka.

¹⁰“Hwdlo noqg door-doopwngam no hog ak cwwrwq yin, mwwg nam urab mwwg dingrwl huta taqn nannam naatab haamabv.

¹¹‍No lvvgho daqya tayin, hoo no hiyam cwwrwqnam ak hv huta taqn nannam nam agaho bwwlin jitayin.

¹²‍Hoo nyi ak hv jwwgw paloqkam, no mwwg hutanam mam aiyam noqg lvgab pvvmabv.

¹³‍Mwwg hutanam mam no doonyiv haaxy kalam mwam jikur tayin, ho mwv hoqg vj lvgab yubngam alwb yubtwl hoo mwv nam xil paqtayin. Hoo hoqhv noqg Pwnbo At Swg agaho noqg gab dvrwq gob nyitayin.

¹⁴“Noqg ree goqnam nyera ak hv jwwgw bvla vs-axaq ko-gab no mwam nyijab-nyiyiq maabv, mwv noqg vbw-bor akgon sujaqkam, ho nyoodo nyi sujaqkam hiyv noqg gvdag pamda tulug uraho doon boam nyijab-nyiyiq maabv.

¹⁵‍Hoq aal darangam no mwwg nyijongam jitayin, doonyiv haama taab jito (hoggab mwv jwwgw dvn hoo mwv hoqham xikal doodwn), hvb nyima baloqkam mwv At Swn nam ceeko mvdwb xabtayin, hoo no nyic gob nyidkun.

¹⁶“Bulug ko tulu nyigo gab ab tulungv sidwb nyiram, ho bulug ab tulug nyigo gab ko tulungv sidwb nyiram. Nyiicwr-cwrxiv mwwg nyic gab sidwb nyitayin.

¹⁷“Nyoodo nyiib nyigam gab ho ab doomab nyigam gab no jvqtwngam nyik-nyiya maabv, ho xwwmy vjam huttab naamabv,

¹⁸‍hvbmabde Ijipt ho no nyera raasur akwb swwnam mam mwwpa tayin hoo noqg Pwnbo At Sw nam hoqgv pvlywl naalinum; hoqgab soq sam nam nyim dvb ngo gaml jidwn.

¹⁹“Hwdlo noqg rongo am naak ho no am gaqg rongo ho mwwpa maab apaq baloqkam, ham no naatab wkur maabv. Hoqham nyoodo nyi gab, ab dooma bo gab, hoo xwwmy tulu gab doom to, hoqhvb nyibaloqkam noqg alaqho hog mwlw bon nyinam mam noqg Pwnbo At Sw nam lvqc citayin.

²⁰‍Hwdlo noqg olib svvn tulungam no nookum yin, no hoqg noumnam mam wkurl naamabv. Hoqham nyoodo nyi gab, ab dooma bo gab, hoo xwwmy tulu gab doomto.

²¹‍Hwdlo noqg roo boolug roo aaxiam pukum yin, no hoqg puumnam mam kokwngam puk maabv. Hoqham nyoodo nyi gab, ab dooma bo gab, hoo xwwmy tulu gab doomto.

²²‍Ijipt gvdaho no nyera raasur akwb swwnam mam no mwwpa tayin; hoqgab soq sam nam nyim dvb ngo gaml jidwn.