Read Nyishi BETINAM PVVB 25 Bible Online

BETINAM PVVB 25 - Nyishi bible

BETINAM PVVB 25

¹“Nyi vnyig pengko ho yolu dumin sub nyiloqkam hoo bulv mvl deela ho haatayin hoo bulug pengko ho nyegam tulungv pvvb mwbwq tayin, svswqbo nyi ham apaq jitayin hoo nyixiaqbo ham haqpaq tayin,

²‍ho nyixiaqbo ham jwwdwb nyib nyiloqkam, mwam hvvky tulungv gel karm tayin hoo mwwg kaagaho mwam hog hwdwg jwwdwb nyimur nyipan hwdgo xipwql jwwtayin.

³‍Campy gob mwam xipwql jwwm dvb jitayin, hvbmabde hoq lvvgho jwwm kumabv, hvb nyima baloqkam mwam campy laleqgo xipwq jwwta yi, ho noqg vnyiq kaagaho noqg vbw-boram nyij-nyipar tai.

⁴“Svv hvvbv am swqyikam hvvb agam mam no pupur purtum maabv.

⁵“Noqg lvkin gob doobam nam vbw-bor akwn ko doomab sileq baloqkam, hoqg nyega sileqnam nywxw ham nyi asaqkam nywxw bwwm mvmabv. Mwnwg nyol hoq vbw-bor akgon ham doog tayin hoo mwnwn mwv nywxw bootayin hoo mwnwn sileq kunam nyol hoqg nyis-mvsam nyij tayin.

⁶‍Hoo sinbo nyi hoqg eminam Israel hoqgv niim mvma dvb, mwnwg otuqcob nyega ko bwwnam ham mwwg sikbo vbw-bor hoqg ko gob sorab jitayin.

⁷‍Hoo sikbog vbw-borv nyi ak gon mwnwn nywxw booram hvl bebaloqkam, mwwg vbw-bor hoqg nywxw hv toggoqb wtayin hoo nyi nyiixa tulungam betayin, ‘Ngoqg nyolwg vbw-borv mwwg vbw-bor tulug eminam Israel ho doom dvb nyicwngam nyiramk hvl bedo; ngoqg nyolwg vbw-borv mwwg ngam nyis mvsam mwv nyima do.’

⁸‍Ho mwwg bopam hoqg nyi nyiixa tulungv mwam goqal hoo agam gootayin, hoo mwv mwnwn nywxwb bwwram hvl twrmangv hvl bebnyiloqkam,

⁹‍ho mwwg vbw-bor hoqg nywxw hv nyi nyiixa tulug kaagaho mwwg dookub haatayin hoo mwwg luxuq akwn twqsuql hurpaq tayin hoo mwwg nyuqm ho tacor coryaq tayin. Hoo mwn mwam birwql hoo betayin, ‘Mwwg atwg vbw-bor imiqkam swwrab mvma boam soq sib mvtayin.’

¹⁰‍Hoo mwwg imiq dvparam Israel ho hvl emin goqtayin, ‘Luxuq twqsuql hurpaqnam imiqkv’ hvl.

¹¹“Hwdlo nyi vnyi go yolu dumin suikam nyi akwn hoqg nywxwngv mwnwg nyolam nvvpy dvb nyi akwnwg otum mam nyumpiq baloqkam,

¹²‍no mwnwg alaqkam papaqto. No vcwr gokam aya kaapa maabv.

¹³“Noqg naara ho koi bvla anyob jaaka nannam baqmabv.

¹⁴‍Noqg namho koi bvla anyob xika nannam no doog maabv.

¹⁵‍Noqg Pwnbo At Sw nam jinam gvdaho no swwiyul doodwb, jot dvb la kvtaq dvb jaaka nanho jaag dvl jito, jot dvb la kvtaq dvb xika nanho xig dvl jito.

¹⁶‍Hiyv nyiv surub xiwq-xitol xil jin boam, noqg Pwnbo At Sw bulum-kac dvn.

¹⁷“Nulv Ijipt hoqgv lamta ho wdul dooi yikho Amalek nyiilungv hoggv nulam nyinum ham mwwpa to,

¹⁸‍hwdlo no lamta ho laanyi kuma bvla nyelin yukho mwv nam nyob panv noqg kokw hoq wnbo nyiilungam mingtwrnum, hoo mwv Pwnboam bos maanum.

¹⁹‍Hoqgab noqg Pwnbo At Sw nam noqg ceebio tulu hoqgv aado layil swrsob doom dvb, noqg Pwnbo At Sw nam gumn naam dvb gvdangam jipa kun, nyodo nvg niikum soqgv no Amalek nyi tulug nam nyinam mam mwwpaq laram; ho no mwwpa maab nyiram.