Read Nyishi BETINAM PVVB 26 Bible Online

BETINAM PVVB 26 - Nyishi bible

BETINAM PVVB 26

¹“Hwdlo noqg Pwnbo At Sw nam gumn otu naam dvb jinam gvdaho no haalayil hoo hoqho swwl dooi kun,

²‍noqg Pwnbo At Sw nam jinam gvda hoqgv no vly naaikun, noqg rongo hoqgv aaxy lengco bo tuugin noqg iginho no vlwq tayin, hoo noqg Pwnbo At Swg daalin kunam nyookub no ham baqa tayin, ho mwwg eminam hoqho doom dvn.

³‍Hoo hoq moodam oppis ho doonbo nyub dookub wl no mwam betayin, ‘Ngo soolo noqg Pwnbo At Swn bibwq dvn, ngulug ab tulungam jidwb dingr kunam gvda uraho ngo haapa kun.’

⁴‍Ho nyubv noqg iginam noqg alaq hoqgv naatayin hoo noqg Pwnbo At Swg yugw agaho ham joop tayin.

⁵“Hoo noqg Pwnbo At Swg agaho no birwq tayin, ‘Ngoqg abv nyiogy wgaqbo Arameanv. Hoo mwv Ijipt gvdab wnum hoo hoqho nyiogy wl doonum, ho mwwg dvparv nyiv anyonum, hvbmabde hoqho mwv koibo, atorbo, hoo nyiitw mvqlw bo nyob akwb swwknum.

⁶‍Hoo Ijipt nyi tulungv ngulam anya-kaasar dvb mvnum hoo ngulam nyijab-nyiyiqnum hoo ngulam nyera-paqn hvb bon nyim kunum.

⁷‍Ho ngulug ab tulug Pwnbo At Swn ngulv xabnum, hoo At Sw ngulug yalam tapa kunum hoo ngulug hentwr henam mam, hoo ngulug hentwr jaqb bon nyinam mam, hoo ngulam nyijab-nyiyiq kunam mam kaapanum.

⁸‍Hoo At Swg atorbo alaq hoqgv, hoo mwwg laqpo ator hoqgv, ho bos dvb koibo bonam nyinv, ho kaama-tamanam mam la swrdorxeqkam nyilayil, ngulam Ijipt hoqgv boolinum.

⁹‍Hoo wtw lyuminko hoo ngola biqminko gvdab mwv ngulam soq nyook urab boolwqnum hoo soq gvda sam ngul gab jinum.

¹⁰‍Hoo kaato, At Swa, no ngam jiknum gvda hoqgv aaxy otuqcob lengco boam ngo sija bwa yin.’ Hoo noqg Pwnbo At Swg agaho no ham joop tayin hoo noqg Pwnbo At Swg agaho xumtayin.

¹¹‍Hoo noqg Pwnbo At Sw nam albo hog mwlwngam nam la noqg imiqkam, nam la Lebi nyiilungam, hoo nyoodo nyiilungam noqg pengko ho jiknam mam no hwnyir-hvmar tayin.

¹²“Vnyw nywum hoqg noqg hog mwlw mvlinam mam no jibwql jilinam mam jidwb nyitayin, hoq vnyw ham jibwql jinam vnywngv hvl betayin, hoq vnywngam Lebi nyiilungam, nyiogy gilwqbo nyoodo nyiingam, ab dooma bongam, hoo xwwmy tulungam jitayin, ho bulv noqg pamda uraho dvdeq dvb dvtwl dootayin,

¹³‍ho noqg Pwnbo At Swg agaho no betayin, ‘Ngoqg nam hoqgv ngo dvrwqb jibwql jilinam mam akkam pvvma, ngo Lebi nyiilungam, nyiogy gilwqbo nyoodo nyiingam, ab dooma bongam, hoo xwwmy tulungam, noqg ngam hog mwlw gaml jinam mam ngo jipa kun. Noqg ngam gaml jinam mam ngo akjijaqkam nyimab nyima, ho ngo hoq tulu ham mwwpa maab nyima pan.

¹⁴‍Ngo nyix-riidu yikho jibwqnam hoqgv dvmanum, ho dvrwq maab nyiyikho ham ngo idaql pvvgin maanum, ho sin boam hoq hoqgv aky jimanum. Ngoqg Pwnbo At Swg yalam ngo tvjwnum. Noqg ngam gaml jinam hvbjaq ngo nyiknum.

¹⁵‍Noqg dvrwqbo dook, ao lvpw hoqgv kaabab gvdwl hoo noqg Israel nyiilungam la noqg ngulam jiknum gvda ked sam no lvqc citbv, no hoggub wtw lyuminko la ngola biqminko gvdangam ngulug ab tulungam jidwb dingr kunam.’

¹⁶“Soq aal so noqg Pwnbo At Sw nam soq gaml tulu sam la pvvb tulu sam nyim dvb jido. Hoqgab noqg hvvjw lvgab la noqg yvj lvgab no hengab jaqb soq tulu sam nyidwb nyido.

¹⁷‍No soolo bibwq pakun Pwnbov noqg At Swngv hvl, hoo mwwg lamtab no wtayin, hoo mwwg nyij-mujam hoo mwwg gaml tulungam hoo mwwg pvvb tulungam, hoo mwwg goonam mam tvjw tayin.

¹⁸‍Hoo At Sw mwv nam dingr kunam hvb, soolo nam mwwg gumn uddum hoqg nyiilu ngvku hvl bibwq pakun, hoo no mwwg gaml tulu sam pvvdwb nyitayin,

¹⁹‍hoo mwv nam dingr kunam hvb, mwv nam paqdwb hoo yuum dvb hoo mwwg pwnam nyob tulug pengko hoqgv nam mwlwngam koi yaadwb xidwb mvtayin, hoo noqg Pwnbo At Sw dingr kunam dvrwqbo nyiilu gob nulv swwtayin.”