Read Nyishi BETINAM PVVB 27 Bible Online

BETINAM PVVB 27 - Nyishi bible

BETINAM PVVB 27

¹Ho Mojes la Israelwg nyi nyiixa tulungv nyiilungam gaml jil begamv, “Ngoq soolo nulam gaml jinam mwlw sam tagabl swwto.

²‍Hoo no Jordon soqgv noqg Pwnbo At Sw nam jitanam gvdaho haaikun, no wlw pwt booloq meeg diidaq tayin hoo hoq tulu ham pioqlup nan lvgab pioqlup tayin.

³‍Hoo noqg Pwnbo At Sw nam jitanam wtw lyuminko la ngola biqminko gvdaho haaikun, noqg ab tulug Pwnbo At Sw hoggub nulam dingr kunam, no hoq wlw tulu aoho soq pvvb tulu sam xeqp tayin.

⁴‍Hoo hwdlo nulv Jordon pobungam rabxo kokwngam, nulv soq wlw tulu sam diidaql aptayin, Ebal Puutu so soolo ngo soqg pagoq gab nulam gaml jidwn, hoo no hoq wlw tulu ham pioqlup nan lvgab pioqlup tayin.

⁵‍Hoo alo noqg Pwnbo At Sw gab no wlw loq diidaql yugw mwj tayin. No hoq tulu ham yoqdwr dvvcw hoqgv taql mvn maabv;

⁶‍noqg Pwnbo At Sw gab no wlwngam taqlap maab yugw mvtayin. Hoo hoqho noqg Pwnbo At Swn no boyuqnam aky tulungam jitayin,

⁷‍hoo no swrso pwr akiam aky jitayin hoo alo no ham dvtayin, hoo noqg Pwnbo At Swg agaho no hwnyir-hvmar tayin.

⁸‍Hoo no soq pvvb tulu sam wlw aoho kaadar pvla dvb xeqp tayin.”

⁹‍Ho Mojes la Lebi nyub tulungv Israel mwlwngam benum, “Israela, cooikab dootwl hoo tato: soq aal soqgv noqg Pwnbo At Swg nyiilu gob no nyipa kun.

¹⁰‍Hoqgab ngoqg soolo nam gaml jinam sam no mwwg gaml tulungam pvvtayin hoo mwwg pvvb tulungam pvvl swwtayin, ho noqg Pwnbo At Swg yalam tvjw tayin.”

¹¹‍Hoq aalho Mojes nyiilungam yolu ruql begamv,

¹²“Hwdlo no Jordon pobungam rabyi kukam, soq nyiilu si Gerijim Puutu aoho nyiilungam lvqc cidwb daqtayin: Simeon, Lebi, Juda, Issakar, Josap, hoo Benjamin.

¹³‍Hoo Soq tulu si beedwb Ebal Puutu aoho daqtayin: Reuben, Gad, Aser, Jebulun, Dan, hoo Naptali.

¹⁴‍Hoo Lebi nyiilungv Israel nyi mwlwngv tapa dvb bibwq tayin:

¹⁵“‘Guss mvnbo nyi aoho beenamv haan ka, jem mvlaqbo alaq hoqgv guss mvtwl hoo ham kvsil aptvl xumnam hv At Swg bulum-kac dvb nyinamv.’ Hoo nyiilu mwlwngv birwql betayin, ‘Amen.’

¹⁶“‘Mwwg abam la mwwg annam modul xil swwma boam beenamv haatayin.’ Hoo nyiilu mwlwngv birwql betayin, ‘Amen.’

¹⁷“‘Mwwg door-doopwg gvda vrram muk-mviya boam beenamv haatayin.’ Hoo nyiilu mwlwngv birwql betayin, ‘Amen.’

¹⁸“‘Hiyv nyiqca bo nyiingam lamta wmur gvnboam beenamv haatayin.’ Hoo nyiilu mwlwngv birwql betayin, ‘Amen.’

¹⁹“‘Nyoodo nyiilungam, ab dooma bo tulungam, hoo xwwmy tulungam jvqtwngam nyij maanboam beenamv haatayin.’ Hoo nyiilu mwlwngv birwql betayin, ‘Amen.’

²⁰“‘Mwwg ab nywxwngam bwwn boam beenamv haatayin, hoggab mwwg abam mwv hvnyw nyisunum.’ Hoo nyiilu mwlwngv birwql betayin, ‘Amen.’

²¹“‘Hiyv svdinam nywxw-nyol bwwdwn ham beenamv haatayin.’ Hoo nyiilu mwlwngv birwql betayin, ‘Amen.’

²²“‘Hiyv mwwg any-bwrm mam nywxwb doogdvn, ham beenamv haatayin.’ Hoo nyiilu mwlwngv birwql betayin, ‘Amen.’

²³“‘Hiyv mwwg aiyam nywxw bwwn boam beenamv haatayin.’ Hoo nyiilu mwlwngv birwql betayin, ‘Amen.’

²⁴“‘Hiyv mwwg door-doopwngam kvsil mengn boam beenamv haatayin.’ Hoo nyiilu mwlwngv birwql betayin, ‘Amen.’

²⁵“‘Hiyv svswqb swwn bo nyiingam hilw twwm dvb kam naan boam beenamv haatayin.’ Hoo nyiilu mwlwngv birwql betayin, ‘Amen.’

²⁶“‘Hiyv soq pvvb mvnam gomcwr tulu sam tal nyima boam beenamv haatayin.’ Hoo nyiilu mwlwngv birwql betayin, ‘Amen.’