Read Nyishi BETINAM PVVB 28 Bible Online

BETINAM PVVB 28 - Nyishi bible

BETINAM PVVB 28

¹“Noqg Pwnbo At Sw benam mam dengky jaqb tvjwl, ho ngoqg soolo nam mwwg gaml jinam gaml mwlw sam hengab jaqb nyib nyiloqkam, noqg Pwnbo At Sw nam swcw nvg aosoqg nyob mwlwg pengko hoqgv xibin yaanam gob mvtayin.

²‍Hoo noqg Pwnbo At Swg yalam no tvjw baloqkam soq lvqc cinam mwlw si nam ruqtinl hoo noqg aoho haatayin.

³‍Noqg bopam mam lvqc citayin, hoo noqg nomtu rongongam lvqc citayin.

⁴‍Nam hummum-ho hoo riic-xemy bvla barm tayin hoo nam diix-dea kwnwram nwrj tayin hoo noqg svvngam hvvtw mvqlw mvtayin, noqg sibin-sviyangam koi yaiyab swwm tayin hoo noqg tuun-meengv lwxiam ko bwwl dootayin.

⁵‍Noqg iginam geeg dvb hoo noqg pwcwngam cwwg dvb lvqc citayin.

⁶‍Hwdlo no haaikam nam lvqc citayin, hoo hwdlo no lengyi kam nam lvqc citayin.

⁷“Noqg ceebiongv nam ceekol nyob paikam At Sw nam mviya nanam jitayin. Bulv nam ceekol nyob patab lamta baakin hoqgv lengs tayin hvbmabde bulv noqg aga hoqgv lamta kvn gob ya kepin-keral ketayin.

⁸‍Noqg noosungam la noqg hog mwlw nyinamho noqg aoho lvqcam haam dvb At Sw gaml jitayin. Hoo noqg Pwnbo At Sw nam jitanam gvdaho mwv nam lvqcam citayin.

⁹‍Noqg Pwnbo At Swg gaml tulungam no tal hoo mwwg lamtab wbaloqkam, mwwg dingr kunam hvb, At Sw nam mwwg dvrwqbo nyiilu ak gob mvtayin.

¹⁰‍Hoo At Swg eminho goqnam nyi gob swcw nvg aoso doonbo nyiilu mwlwngv nam kaapa tayin, hoo bulv nam bos tayin.

¹¹‍Hoo gvda uraho, At Sw noqg ab tulungam jidwb dingr kunam mam At Sw nam nyetwl swwm-geem dvb, hummum-ho riic-xemy bvla barm dvb hoo tuun-mee sol swwm dvb hoo nyookam diix-dea kwnwram nwrj tayin.

¹²‍At Sw mwwg albo gumn uddum doangam nam kuqko jitayin, moodam kvxaqmab nyodongam noqg gvdaho hom jitayin hoo noqg alaqkv bonam nyinam mwlwngam lvqc citayin. Hoo no naleqgo asaq nyob tulungam cwwrwq tayin, hvbmabde no bulug hoqgv ceemabv.

¹³‍Hoo ngoqg soolo nam gaml jinam noqg Pwnbo At Swg gaml tulu sam tvjwl hengab jaqb hoq tulu ham nyib nyiloqkam, At Sw nam nyig-wg bob mvtayin hoo nyimin-wmin gvnbob mvram, hoo no ao-aoyab caatayin hoo akob ikram,

¹⁴‍hoo ngoqg soolo nam gaml jinam gomcwr tulu sam no tvjw maab nyimabv, ho no lvqbwq bvkam hoo laqc bvkam wmabv, ho asaq pwnbo kokwb wmin gvl bul gab bon nyimabv.

¹⁵‍Hvbmabde ngoqg soolo nam gaml jinam noqg Pwnbo At Swg gaml tulu sam hoo mwwg pvvb tulu sam no tvjwl hengab jaqb nyil swwma baloqkam, soq beenam tulu si nam ruqtinl hoo noqg aoho haatayin.

¹⁶‍Beenamv noqg bopam ho haatayin, hoo beenamv noqg rongo ho haatayin.

¹⁷‍Beenamv noqg igin hoola noqg dupum-dvrab ho haatayin.

¹⁸‍Beenamv noqg nvmmam nvpho hoo noqg gvdaho, noqg sibin-svv ho hoo noqg sviya pvtw ho haatayin.

¹⁹‍Hwdlo no haaikam beenam gob nyitayin, hoo hwdlo no lengyi kam no beenam gob nyitayin.

²⁰“At Sw beenam mam, mwwdar-mwwpar maanam mam, hoo noqg hog mwlw nyik ho nam mwwcu-mwwiya mvnam mam, nam kanam jitayin, ho noqg almanbo bon tulungam nyigam gab no nyebia jaqb twrl hoo yuupaql nyiitayin, hoggab no ngam haqpaq paku.

²¹‍No haal gumn naata ko gvdaho At Sw mwv nam twryum maady deedib iicw-tobum dooiyam nyim tayin.

²²‍At Sw nam biaqpo-biaqyo un gvm dvb, mear karm dvb, liya dooi karm dvb hoo og dwr-dwr dvb vc mvdwb, hoo jwwxa xaam dvb hoo vly-axeqkam yaapaq mvdwb hoo tapin puul sim dvb jwwtayin. Soq tulu si nam twryum maady deedib ruqtayin.

²³‍Noqg dumpo ao doangv tama hvb nyitayin, hoo noqg uraho swcw doon bov yoqdwr hvb nyitayin.

²⁴‍At Sw noqg gvdaho diimwram nyodob hol mvtayin. Nam twryum maady deedib doa hoqgv diimwr hol tayin.

²⁵“Noqg ceebio tulug agaho At Sw nam mvnyi-mviya dvb jitayin. No lamta baakin hoqgv lengs tayin hvbmab bulug aga hoqgv lamta kvn hoqgv keleq tayin. Hoo swcw soqg lvpw-haty mwlwngam no bosil koornam gob nyitayin.

²⁶‍Hoo noqg svmangam doag pvtangv la swcw soqg svdin tulug dvs gob nyitayin, hoo bulam bos belaml ruqxa bo akkam dooram.

²⁷‍At Sw nam jwwtayin Ijipt hoqg hil-pwp lvgab la biaqpo-biaqyol un-tar gvmwl hoo tvriq nyimwl hoo axaq xaqgin-xaqyin dvb mvtayin, ho nam mwp bo akkam dooram.

²⁸‍At Sw nam rugaq mvdwb hoo nyiqca mvdwb hoo dumpo mwwdar mvma dvb jwwtayin,

²⁹‍hoo ai kanam nyiqca bov dwqtupl geqnam hvb aal lvpangam no dwqtupl geqtayin, hoo noqg lamta tuluho no wdar maab wtayin. Hoo nam lwxiam nyijab-nyiyiql hoo naalil naareq tayin, hoo nam nyi akkam svka bo dooram.

³⁰‍No nywxw begaq sutayin, hvbmabde nyega asaqkv mwnwn bwwtayin. No namlo poos tayin, hvbmabde hoqho no doopa ram. No roo boolungam mvs tayin, hvbmabde hoq aaxiam no dvpa kuram.

³¹‍Noqg svv hvvbam noqg vnyiq kaagaho patab sutayin, hvbmabde ham no vdin dvpa ram. Noqg svdam mam noqg vnyiq kaaga hoqgv bool wgtayin, hvbmabde no ham bookur nyokram. Noqg sviyangam noqg ceebio tulungam jimin tayin, hvbmabde nam svka bo akkam dooram.

³²‍Noqg kaad lalab noqg ko tuupam la nyem koam nyiilu asaqkam jitayin, noqg swwnam bumpw ho bulam mwungul dootayin, hvbmabde nam svka bo dooram.

³³‍Noqg cengka maanam nyob hoolungv noqg duqtwr duql rongo mvnam aaxy-amaram dvtayin, hoo lwxiam nyijab-nyiyiql ocu-aiya dvb mvtayin,

³⁴‍ho noqg vnyiq kaanam tuluhv nam rugaq dvb mvtayin.

³⁵‍At Sw noqg lwbwngam la lvpiangam hil-pwp pwt looda pwm dvb jwwtayin, ho nam mwp bo dooram, noqg lvc koro hoqgv dumrwq tvqyw namgub un-tar rooxo dvb mvtayin.

³⁶“No la noqg ab tulungv cengka maanam nyob hoolu ak noqg lvpw-hatiam la lvpw atam naam dvb At Sw boolwq tayin. Hoo hoqho no svvpongam la wlw pwnam pwnbo tulungam xumtayin.

³⁷‍Hoo no koor-kaaraq dvb, dootin gob, hoo At Swg nam boopaqko nyiilug pengko ho nam bej-bepar tayin.

³⁸‍No rongo ho naleqgo vliv liilwq sutayin hvbmab anyo go nookum tayin, hoggab hoqham takamv ham duiyum tayin.

³⁹‍No roo boolungam liilwq tvl ham hingkib mvxaq sutayin, hvbmabde no hoqg roo alangam twwpa ram hoo roo aaxiam kam pukum ram, hoggab ham topumv duiyum tayin.

⁴⁰‍Noqg dwrbu-dwrya ho no olib svvnv naleqgo daqs tayin, hvbmabde no atv olib kuty neeka ram, hoggab noqg olib pv yuupaq tayin.

⁴¹‍No nyem-nyega kov doos tayin, hvbmabde bulv noqgab dooram, hoggab bulam nyumwb bootayin.

⁴²‍Noqg rongog svvnam la aaxiam takam-yorupv dwtwr xaatayin.

⁴³‍Noqg pengko ho nyoodo nyiingv koi-koi yaab noqg aoho swwrab tayin, hoo no ako-ako yaab ita yukun.

⁴⁴‍Mwv nam cwwrwq tayin, hoo no mwam cwwrwq nyok ram. Mwv dumpob nyitayin, hoo no amimb nyitayin.

⁴⁵“Soq beenam tulu si noqg aoho haatayin hoo nam ruqmin gvl hoo ruqtinl nam twryum tayin, hoggab noqg Pwnbo At Swg agam mam no tvjw ma, ho mwv nam gaml jinam mwwg gaml tulungam no pvvk ma.

⁴⁶‍Soq tulu si nam la noqg hosiqkam nwrba gob lomd bvla swrdorxeq gob kaacin dvb ceeko tayin.

⁴⁷‍Hoggab noqg Pwnbo At Swn noqg hangv hwr cwrcwr bvla hwnyir-hvmarl bon nyij kuma, hoggab noqg lvgab hog mwlwngv naleqgo doogam gab,

⁴⁸‍hoqgab At Swg nam ceebiongam kanam mam noqg ceebio tulungam no kano hvngwr lvgab, ho talo tvl, hoo hog akkam doog maab bulam bon nyij tayin. Hoo mwv nam twryum maady deedib noqg lwwpo ho dvvcw luukam tulwq tayin.

⁴⁹‍At Sw nam ceeko mvdwb swcw nvg ywwtwr aado hoqgv nyob hoolu ak boa tayin, hiyvg agam goonam mam no talaq ram, hv xookam cilwqnam hvb cilwq tayin,

⁵⁰‍mootar-gamtar bo nyob hv nyekam-xoxam kam hoo ko anyongam kam aya kaapa ram.

⁵¹‍bulv nam dwtwr maady deedib noqg sibin-svvngam hoo noqg rongog vly-axeqkam dvtayin; hwdlo bulv nam dwtwr maady deedib, bulv noqg am mam, roo alangam, ho kutiam, ho noqg svv hvvcam mam ho noqg sviya ko apaq ram.

⁵²“Noqg gvda mwlwho noqg mwwgwl ao dvb la hwngkw dvb gurum tulu ham yaqpia maady deedib, bulv noqg pamda tuluho nam naareql aptayin. Hoo noqg Pwnbo At Sw nam gvda jiknam mwlwho bulv noqg pamda tuluho nam naareql aptayin.

⁵³‍Hoo noqg ceebio tulungv noqg hog mwlwngam naareq tvl nam mwwdwq dwqmnum, ho noqg Pwnbo At Sw nam jinam noqg kepo hoqg ko tulug vdinam no dvtayin.

⁵⁴‍Nyega mwlwngam kaap yaan bvla dvrwqb swwnbo nyiv mwwg vbw-boram, atwg abynam nywxwngam, hoo ko doonyu-doonyia bo tulungam mwv oyum tayin hoo bulam dvs gob dvtayin,

⁵⁵‍ho mwv hiyam kam mwwg ko tulug vdinam dvg ram, hoggab mwv hog akjijaqkam dvs dook maanum, ho noqg pamda tulungam noqg ceebiongv naareq tvl nam mwwdwq dwqm ko-gab soq sib nyinum.

⁵⁶‍Nyem mwlwngam kangam yaan bvla dvrwqb swwn bov, ho mwnwn ko bwwiywk jaq hoqgv lvpia samdaql wka maanbov, mwnwg tumanam nyolam, mwnwg ko tuupam hoo nyem koam oyum tayin,

⁵⁷‍mwn atwg kepo hoqgv kongam bwwlinl bwwxo tvl, bulam ham mwn kvsil dvtayin, hoggab mwn hog akjijaqkam dvs dook maanum, ho noqg pamda tulungam noqg ceebiongv naareq tvl nam mwwdwq dwqm ko-gab soq sib nyinum.

⁵⁸“Soq kitap so pvvb gomcwr tulu xeqpnam mam no hengab jaqb nyima ko-gab, ho noqg Pwnbo At Swn yuud bvla swrdorxeq eminam no bos kamanam,

⁵⁹‍ho At Sw nam la noqg hosiq tulug uraho nywywngam cengka maanam la mwp lamanam hentwr-kaas bo dooi vcam, hoo nywywngam xooma bo luusaq-luusaq vcam haam tayin.

⁶⁰‍Hoo noqg vcjaqb bosnam, Ijipt hoqg vc cinam tulu ham mwv noqg aoho haam tayin, hoo hoqho tuluhv nam kaqgabl dootayin.

⁶¹‍Hwdlo nam twrma deedib, soq pvvb kitap so xeqpa maanam vc-ai hoo hentwr-kaas mwlwngam, At Sw noqg aoho haam tayin.

⁶²‍Nulv doag takar tvvb dumtwq-miilywnum, hvbmabde nulug nyiingv jaqnyo taikun, hoggab noqg Pwnbo At Swg agam mam no tvjw maanum.

⁶³‍Hoo At Sw nulug aoho alboam la nulam dumtwq-miilyw mvdwb nyidwb al mwwpanum, hoqhvb At Sw nulug aoho mucu-mviyanam mam la nulam twryum dvb al mwwpa dvn. Hoo no gvdangam haalayil gumn naatanam hoqgv nam ngo buusuql buupaq tayin.

⁶⁴“Hoo At Sw nam swcw nvg ywwtwr gon hoqgv ywwtwr gonwb nyiilug pengko ho cwrsaq twqb mvtayin, hoo hoqho no la noqg ab tulungv cengka maanam svvpo ngamla wlw pwnam pwnbo tulungam no xumtayin.

⁶⁵‍Hoo nyob tulu pengko ho no doonu ko kaapa ram, hoo noqg lvc somnu ko nyook jijaq gokam dooram, hvbmabde At Sw nam hoqho tvmdwrnan hangam hoo piorabl kaanyi kumanam vnyiqkam hoo mwwdwqnam yvjam jitayin.

⁶⁶‍Noqg swwgam lwxiam mwum dvb nyitayin. Aiyam la aalam no bos sol dootayin hoo noqg swwgv hog akkam mwwgw doomanum.

⁶⁷‍Aram no betayin, ‘Oyum nyiloqkam alpa mwwnum!’ hoo ariyum mam no betayin, ‘Ar nyiloqkam alpa mwwnum!’ hoggab noqg hangv vc loodab bos sol doogam gab, hoo noqg vnyiq kaanamv hoqhvb kaagam gab, soq sib bedwn.

⁶⁸‍Hoo At Sw nam soq nyiody book lamtab lokta boom kuram hvnam ho, nam iss jaajib lokta Ijipt ho bookur tayin; hoo alo no noqg ceebio tulungam no atv raasur gob puqtayin, hvbmabde alo nam nyi rvnbo akkam dook ram.”