Read Nyishi BETINAM PVVB 29 Bible Online

BETINAM PVVB 29 - Nyishi bible

BETINAM PVVB 29

¹Horeb ho bulam birnam pvvb jinam lvvgho, soq birnam pvvb gomcwr tulu sam Moab gvda uraho dooi yikho, Israel nyiilungam betam mvdwb At Sw Mojesnvn gaml jinum.

²‍Hoo Mojes Israel nyi mwlwngam goqkumnv hoo bulam benum: “Paro nvla mwwg nyera tulungam la mwwg gvda mwlwngam At Sw noqg vnyiq kaagaho Ijipt gvdaho hog mwlw nyinam mam no kaapa kun,

³‍koi jaqb hentwr hemnam mam, kaangaq dvb nyinam mam, hoo koi jaqb nyima takanam mam, noqg vnyiqkv kaapkun.

⁴‍Hvbmabde soolo aal so At Sw nulam cenglaqnan hangam ho kaalaqnan vnyiqkam ho talaqnan nyurungam jima pakun.

⁵‍Ngo nulam vnyw campy go deexa-raraho bool wgnum. Noqg gv hoqg vj tulungv nyamanum, hoo noqg lvpia hoqg samtaqkv nyamanum.

⁶‍Nulv dvs doomanum, hoo nulv twws doomanum, ho ngo nulug Pwnbo At Swv hvl nulam cengm dvb jinum.

⁷‍Hoo hwdlo nulv soq nyook so haai yikho, Hesbonwg lvpw at Sihon hoo Basanwg lvpw at Og ngulam ceekol nyob patab haanum, hvbmabde ngulv bulam mviyanum.

⁸‍Ngulv bulug gvdangam naaknum hoo ham Reuben nyobam, Gad nyobam, hoo Manasse nyob papo gon otu nvvsiq mvdwb jinum.

⁹‍Hoqgab soq birnam pvvb gomcwr tulu sam tagab gvdwl hoo ham nyil swwn to, ho nulug hog mwlw nyinamv nulam niqtuq lengtayin.

¹⁰“Nulug Pwnbo At Swg agaho nulv soolo doqdu dvn: nulug nyob hoolug peelo bo tulungv, nulug nyi nyiixa tulungv, nulug saab tulungv, hoo Israelwg nyi mwlwngv,

¹¹‍noqg svmcw ho doonbo nulug ko anyo tulungv, nulug nywxw tulungv, hoo nyoodo nyi tulungv, ho noqg wsw pvmwqbo ak hoqgv naalayil noqg iss bwwnbo namgub,

¹²‍ho noqg Pwnbo At Swg birnam pvvb uraho dingr dvb haadwb nyitayin, hogloq ham noqg Pwnbo At Sw soolo nam nyidul doodwn,

¹³‍ho mwv nam soolo mwwg nyiilu gob xuqbwq pakun, hoo mwv nam dingrnam hvb mwv noqg Pwnbob nyitayin, hoo mwv noqg ab tulu, Abrahamnvn, Aisaknvn, hoo Jakubnvn dingr kunam hvb nyitayin.

¹⁴‍Nulam aro ngo soq birnam pvvb mvnam sam mvma gviyin,

¹⁵‍hvbmabde hiyv xeq soolo ngulug lvgab ngulug Pwnbo At Swg agaho doqdu dvn, hoo hiyv xeq soolo ngulug lvgab dooma bo mwlw lvgab mvg yin.

¹⁶“Ngulv Ijipt gvdaho hoggub doonum, hoo ngulv nyob tulug pengko ho hoggub haanum ho nulv hoggub wpeq kunam, ham nulv cengdo.

¹⁷‍Hoo nulv bulug oyum dvb nyinam tulungam kaapa ku, bulug svvnam la wlwngam, rupam la hunam murty mvnam tulungam bulug pengko ho doonam mam kaanum.

¹⁸‍Hengab to, hvb mabaloqkam nulug pengko hoqgv nyega maalo nyem, ho nyob maalo dvpar hoolu akwg hangv soolo ngulug Pwnbo At Swg hoqgv aado tai hoo soq nyob tulug pwnbo tulungam xumtayin. Hengab to, hvb mabaloqkam nulug pengko hoqgv ommiam la kacaqbo aaxiam swwlin mvnbo rwb ak doota yi,

¹⁹‍nyi ak hwdlo mwv soq birnam pvvbwg gomcwram tapa yin, mwwg hang lvgab mwv atv hempwl begamv, ‘Ngo swrso tayin, ngoqg tamy bo hang lvgab no ws jaqkam.’ Soq si gumsiam la pwtw boam aado wpaq gvnam hvb nyitayin.

²⁰‍At Sw mwam apaq jidwb mwwbwq ram, hvbmabde At Swg haaxaqnamv la mwwg kaaneqnamv nyi akam mwk juunam hvb ceeko tayin, hoo soq kitap so xeqpnam beenam tuluhv mwwg aoho dootayin, hoo At Sw mwwg eminam nyodo nvg niikum soqgv tipaq tayin.

²¹‍Hoo Israelwg nyob hoqgv mwam aro dwr-kano hentwr-kaasam hem dvb At Sw xuqlin tayin, ho soq Pvvb Kitap so beenam mam xeqp kunam hvb nyitayin.

²²‍Hoo hosiq ak olo, nulug kokwb swwrab deenbo ko tulungv, hoo nyoodo nyiingv aado gvda hoqgv haatayin, hoo betayin, hwdlo ngulv soq gvda soqg hentwr henam sam hoo At Swg ham vc cim dvb mvnam mam kaaikam—

²³‍gvda mwlwngam tvlw-mwjwr la al lvgab wm parnam hvb nyinum, hog akkam liitwl swwm dvb nyimanum, hoo nwmw-nwsin beggarko doomanum, At Sw mwwg haaxaql hoo hang lingtwr yikho Sodom mam la Gomorrangam, Admangam la Jeboiim mam parpaqnam hvb parpaqnum—

²⁴‍gvdag nyob mwlwngv betayin, ‘Hoggub yu At Sw soq gvda sam mvpa kun? Hoggv yu nyij tvl, soq swdjaqg koib hang lengnum?’

²⁵‍Ho nyiilungv betayin, ‘Bulv bulug ab tulug Pwnbo At Swg birnam pvvbam mvpia ko-gab, ho hwdlo mwv bulam Ijipt gvda hoqgv boolin yikho mwv bulug lvgab pvvbam mvnum,

²⁶‍hoo bulv wknv asaq pwnbo tulungam bon nyijil hoo bulam xumnum, bulug cengmanam pwnbo tulungam hoo mwv hoq tulu ham xum dvb jimanum.

²⁷‍Hoqgab At Swg haaxaqnamv soq gvda sam ceekol wm tolwqnum, ho soq kitap so xeqpnam beenam tulungam haam pakun,

²⁸‍hoo At Sw haaxaql wm bioqnam hvb bioqnum hoo koi loodab hang lingtwrnv bulam gvda hoqgv buusuql buupaq pakun, hoo bulam asaq gvdaho hurpaq paku, bulv soolo hoqho dood kun.’

²⁹“Kvsnam pagoqkv ngulug Pwnbo At Sw gv, hvbmabde belinl bepornamv ngulv hoo ngulug ko tulu gab nwrba gob dootayin, ho ngulv soq pvvb soqg gomcwr mwlw sam nyil dooi nvpv.