Read Nyishi BETINAM PVVB 3 Bible Online

BETINAM PVVB 3 - Nyishi bible

BETINAM PVVB 3

¹“Ho ngulv Basan lamtab tobkur kunv caaknum. Hoo Basanwg lvpw at Og mwv la mwwg nyiilu mwlwngv ngulam Edrei ho nyob patab ceekol lengrwqnum.

²‍Hvbmabde At Sw ngam benum, ‘Mwam bos maabv, hoggab mwam la mwwg nyiilu mwlwngam hoo mwwg gvdangam ngo nulug alaqho gvqlwq jipa kun. Hoo Hesbon ho doonbo, Amor nyi tulug lvpw at Sihonnvn mvnam hvb no mwam mvtayin.’

³‍Ho ngulug Pwnbo At Sw Basanwg lvpw at Og nvkam, hoo mwwg nyiilu mwlwngam, ngulug alaqho gvqlwq jiknum, hoo mwwg ho nyi akkam dook maadwb ngulv mwam jwwtab kunum.

⁴‍Hoo hoq moodho doonbo bopam mwlwngam ngulv naaknum—ngulug bopam noum akkam doomanum—Argobwg swsw-sa Basanwg lvpw-haty Ogwg camx leq ax bopam mam naaknum.

⁵‍Soq bopam tulu mwlw sam ao jaqb gurum tulungam, toggoq tulungam, hoo yoqdwr lvgab lyvxar tulungam xwrtumnum, hoq lvg-lvgab naleqgo sulu nwqtum maanam nampam tulungv doonum.

⁶‍Hoo ngulv bulam twrkiq-twrmal twryumnum, ngulv hoggub Hesbonwg lvpw at Sihonnvn, mwwg bopam mam, nyega tulungam, nyem tulungam, hoo ko tulungam twrkiq-twrmal twryumnam hvb twrm tayin.

⁷‍Hvbmabde nyob pal naareqnam bopam tulu hoqg tuun-mee-ngam ngulv ngul gab nvviyiqnum.

⁸‍Ho ngulv hoq moodho Arnonwg Lywpa hoqgv Hermon Puutu namgub, Amor nyi tulug Jordon kvtin ho doonbo lvpw at vnyig gvdangam bulug alaq hoqgv naareqnum,

⁹(Sidon nyi tulungv Hermonam Sirion hvl goqnam, hoo Amor nyi tulungv ham Senir hvl goqnam),

¹⁰‍haapa gvda hoqg bopam mwlwngam hoo Gilead mwlwngam hoo Basan mwlwngam Saleka hoqg Edrei namgub, hoo Basan urag Ogwg lvpw-haty bopam mwlwngam naareq kunum.

¹¹(Basanwg lvpw at Og aro Repaim ho boum tvl doonum. Kaato, mwwg kartamnanv yoqdwr kartamv. Soq si Ammon nyi tulug Rabba nyook ho dooma namyv? Kiubit xicwb xikanamv, hoqg daayarv kiya kiubit, hoo taqtv kiubit vpynum.)

¹²“Hwdlo ngulv soq gvda sam hoq moodho gumnwb naaiyikho, ham Reuben nyiilungam la Gad nyi tulungam Aroyer dwrbu-dwrya hoqgv naarab layil Arnonwg Lywpa namgub hoo Gilead diisw gvda taqcgon la hoqg bopam tulungam bulam ngo jinum.

¹³‍Gilead gvda taqcgon, la Ogwg lvpw-haty Basan gvda mwlwngam, hoo Argob swsw-sangam, Manasseg nyob papo gon ngo jinum. (Basanwg gvda ham Repaim gvdangv hvl goqnum.

¹⁴‍Manasse nyob hoqg Jairv Argob swsw-sangam naalayil Geshur nyi tulug gvla Maakat nyi tulug gvda vrr namgub naanum, hoo nampam tulungam Habbot-jair hvl mwwg atwg eminho mingnum, hoqhv soolo godab doodwn.)

¹⁵‍Makirnvn ngo Gileadam jiknum,

¹⁶‍hoo Reuben la Gad nyiilungam ngo Gilead hoqgv naarab layil Arnonwg Lywpangam kviyw swcwb vrr dvb, ho Ammon nyi tulug vrr Jabbok pobu namgub bulam jiknum;

¹⁷‍ho Araba ngamkam, ho Jordonam gvda vrr gob mvnv, Kinneret hoqgv Araba Sa-svlo namgub, ho dou-cagag Pisga puutu daiyag Al Sa-svlo namgub jiknum.

¹⁸“Hoo ngo nulam hoq moodho gaml jil begamv, ‘Nulug Pwnbo At Sw nulam soq gvda sam gumn jipa kun. Nulug nyob panbo nyiilungam Jordonam rabg dvl nulug vbw-bor Israelwg nyiilu gab nyob pamto.

¹⁹‍Nulug nywxw tulu gvla, nulug ko anyo tulungv, hoo nulug tuun-mee tulungv (ngo cengdo nulv naleqgo tuun-mee-ngv doodwn) ngo nulam jiknum bopam tuluho dooiya twqto,

²⁰‍nulam doonu mvdwb jinam hvb, nulug vbw-bor tulungam At Sw doonu mvdwb jima deedib, hoo Jordon kvtinho nulug Pwnbo At Sw bulam jinam gvda ham bulv naama deedib nulv nyob pamin gvtayin. Ho ngo nulam jiknam gvdaho, nulv nyiicwr-cwrxiv wkur laikul mwwg gumnam naata yukun.’

²¹‍Hoo ngo hoq moodam Josuanvn gaml jinum, ‘Noqg Pwnbo At Swg soq lvpw at vnyiam hog mwlw nyinam mam noqg vnyiqkv kaapa ku. Ho noqg rabknam gvda alo At Sw lvpw-haty mwlwngam soq so nyinam hvb nyitayin.

²²‍Nulv bulam bos maabv, hoggab nulug Pwnbo At Sw nulgab nyob patayin.’

²³“Hoo At Swn hoq moodho ngo vcjaqb mvnyi-moiyul xuml benum,

²⁴‘Pwnbo At Swa, no noqg nyerangam noqg koinam mam la noqg alaq atornam mam no kaakinl nyirab paku. Hoggab doa nvg uraso hoo swcw nvg aoso hiyv noqg nyis tulungam nyinam hvb nyinbo pwnbov dood nvi yv?

²⁵‍Ngam anya mwwpa tvbv ngo Jordon kvtinwg albo gvdangam, albo diisw gvdangam hoo Lebanon gvdangam kvvnw do.’

²⁶‍Hvbmabde nulug pagoq gab At Sw ngam haaxaqnum hoo ngam tak maanum. Hoo At Sw ngam benum, ‘Noqg hoqgv tvnw kuma; soq pagoq gab ngam lokta no agam gook maabv hvnum.

²⁷‍Pisga puutu aob cao to hoo noqg vnyiqkv dou-haaga ngam hoo nyoodum nyookam hoo nyooko nyookam hoo dou-caga nyookam kaatayin, hoo noqg vnyiq hoqgv hoq tulu ham kaatv to, hoggab no soq Jordon pobu soqgv kvtinb rabnyi kuram.

²⁸‍Hvbmabde Josuanvn nyig mvdwb jito, hoo mwam haakam dvb la ator dvb jito, hoggab mwv soq nyiilu otuqb rabco tayin, hoo noqg soq kaanam gvda sam mwv bulam gumn naam tayin.’

²⁹‍Ho ngulv Bet-peor lywpa taqcgon ho dooknum.