Read Nyishi BETINAM PVVB 30 Bible Online

BETINAM PVVB 30 - Nyishi bible

BETINAM PVVB 30

¹“Hoo ngo noqg agaho lvqcam la beenam mam mvpaq jipan, hoo noqg Pwnbo At Sw nam nyob tulug pengko hoqgv ruqp yin, ho hwdlo hoq tulu si noqg aoho haaikam, ho no soq tulu sam mwwpa tayin,

²‍hoo noqg Pwnbo At Sw dookub hookur tuku, no la noqg ko tulungv, hoo noqg hang lvgab hoo noqg yvj lvgab, ngo soolo nam gaml jinam mwwg agam yalam sam tvjw to,

³‍ho noqg Pwnbo At Sw nam nvtaq kunam mam jikur tayin hoo nam hang biil aya mwwpa tayin, hoo noqg Pwnbo At Sw mwv nam nyiilu pengko hoqgv cwrsaq-twqb ruqpaqko hoqgv lokta nam bookum tayin.

⁴‍nam doa nvg ywwtwr ho ruqpaq kujaqkam, noqg Pwnbo At Sw nam hoqgv goqkum tayin, hoo mwv nam hoqgv nookur taikun.

⁵‍Hoo noqg ab tulungam gumn naanam gvda uraho, noqg Pwnbo At Sw nam boolwq taikun, ho no ham gumn naatayin.

⁶‍Hoo noqg Pwnbo At Sw noqg hangam la noqg hosiq tulug hangam mux mvtayin, ho noqg Pwnbo At Swn noqg hang lvgab hoo noqg yvj lvgab aby tayin, ho no swwl dootayin.

⁷‍Hoo noqg Pwnbo At Sw hiyv nam nyob-nyet pan boam soq beenam tulu sam nam hang baqn boam la ceebio tulungam jilwq tayin.

⁸‍Hoo no lokta At Swg agam yalam tvjw tayin hoo ngo nam soolo gaml jinam mwwg gaml tulu sam pvvto.

⁹‍At Sw noqg alaqkv bonam nyinam mwlwngam swwm-geem tayin, nam hummum-ho riic-xemy bvla barm tayin hoo nam tuun-meengam naleqgo sol swwm tayin hoo noqg nyookam diix-dea kwnwram nwrj tayin. Hoggab At Sw noqg ab tulungam hwnyir-hvmar mwv lokta nam swwm-geem dvb hwnyir-hvmar dvn,

¹⁰‍hwdlo noqg Pwnbo At Sw dookub noqg hvvjw lvgab hoo noqg yvj lvgab no hookur layil, soq Pvvb Kitap so xeqpnam mwwg gaml tulu sam hoo mwwg pvvb tulu sam, no noqg Pwnbo At Sw agam yalam tvjw tayin.

¹¹“Hoggab ngoqg soolo nam gaml jinam gaml si noqg gab cengla maanbo ma, hoo aado kama dvn.

¹²‍Hoqhv doa ao tol dooma dvn, hoggab no begamv, ‘Hiyv ngul gab doa aob caala yil ham naal jitayin, ho ngulv ham tatwl hoo ham nyidwb nyitayin?’

¹³‍Hoqhv sa-svlo lvvg alo dood nvi yv, hoggab no begamv, ‘Hiyv ngul gab sa-svlo lvvgwb wlayil ham naa jitayin, ho ngulv ham tatwl hoo ham nyidwb nyitayin?’

¹⁴‍Hvbmabde gomcwrv noqg ogum si doodwn. Hoqhv noqg agam lwkw hv hoo noqg hang lwkw hv doodwn, hoqgab no ham nyito.

¹⁵“Kaato, ngo soolo noqg agaho swwgam la alboam, sigam la alman boam pvvpa kun.

¹⁶‍Ngoqg soolo nam gaml jinam gaml tulu sam no tvjwl, noqg Pwnbo At Swn abil, mwwg lamtab wl, hoo mwwg gaml tulu sam hoo mwwg nyicw-mwcwngam la mwwg pvvb tulu sam pvvb nyiloqkam, no gvdangam haalayil gumn naatanam ho noqg Pwnbo At Sw nam swwm dvb la dumtwq-miilyw dvb nam lvqc citayin.

¹⁷‍Hvbmabde noqg hangv aado, hoo no tamab asaq pwnbo kokwb wmin gvl bulam xuml hoo bul gab bon nyibaloqkam,

¹⁸‍ngo soolo bibwq dvn, no hoggub nyijaqkam yuupaq tayin. No Jordonam rablayil gvdangam gumn naatanam ho no swwiyul dooram.

¹⁹‍Ngo soolo swcw-nyodongam nam ceekol hvvky swwm dvb goqdwn, ho noqg gab ngo swwgam la sigam, lvqcam la beenam mam mvp jipa kun. Hoqgab swwgam xuqto, ho no la noqg hosiqkv swwl dootayin,

²⁰‍noqg Pwnbo At Swn abil, mwwg agam yalam tvjwl hoo mwam bugil swwto, hoggab mwv noqg swwgv hoo nam swwiyu mvdwb jitayin, ho noqg ab tulungam, Abrahamnvn, Aisaknvn, hoo Jakubnvn, At Swg jidwb dingr kunam gvdaho nam doom dvb jitayin.”