Read Nyishi BETINAM PVVB 31 Bible Online

BETINAM PVVB 31 - Nyishi bible

BETINAM PVVB 31

¹Ho Mojes soq gomcwr tulu sam Israelwg nyiilungam hvraqb agam goodunum.

²‍Hoo mwv bulam benum, “Ngo soolo vnyw 120 gob nyekam paku. Hoqgab ngo wi-wcal nyila kuma. At Sw ngam bepa kun, ‘No soq Jordon sam rabnyi kuram.’

³‍Noqg Pwnbo At Sw mwv atv noqg otuqb rabtayin. Mwv soq nyob tulu sam noqg kaagaho twryum tayin, ho no bulam gumn naatayin, hoo At Sw agam goopa kun, Josua noqg nyig bob nyitayin hvl.

⁴‍Hoo Amor nyi tulug lvpw at Sihon nvla Ognvn, hoo bulug gvdangam mwv bulug lvgab twryumnam hvb At Sw mwv bulam nyitayin.

⁵‍Hoo At Sw bulam nulug agaho jitayin, hoo ngo soolo nulam gaml jinam gaml tulu hvb no bulam mvtayin.

⁶‍Atorto hoo haakam to. Bulam bos maabv, hoggab noqg Pwnbo At Sw noqg otuqb wdwn. Mwv nam apaqram ho no haqpaqram.”

⁷‍Ho Mojes Josuanvn goqa nv hoo mwam Israel mwlwg kaagaho benum, “Atorto hoo haakam to, hoggab no soq nyiilu sam, At Sw, bulug ab tulungam jidwb dingr kunam gvdab bool wgtayin, hoo no bulam hoq gvda ham gumnwb naamto.

⁸‍At Sw noqg otuqb wtayin. Mwv noqg lvgab dooba tayin; mwv nam apaqram ho haqpaqram. Mwwdwql bos maabv.”

⁹‍Ho Mojes soq pvvb sam xeqtwl hoo ham Lebig ko tuup nyub tulungam jinum, hiyv At Swg birnam pvvb uddum mam joon boam, la Israelwg mwlwg nyi nyiixa tulungam.

¹⁰‍Hoo Mojes bulam gaml jinum, “Kvn vnyw nywxiam, nyera-paqnam tolin de vnywngam, Doogw Durum moodam,

¹¹‍Noqg Pwnbo At Sw mwv daalin kunam nyook ho hwdlo Israel nyiilungv hookum yin, no soq pvvb sam Israel nyi tulug bulug taga ho poory tayin.

¹²‍Noqg pamda uraho doonbo nyiilungam, nyegangam, nyem mam, hoo ko tulungam, hoo nyoodo nyiilungam hookum mvto, ho noqg Pwnbo At Swn bulv tatayin hoo mwam bos dvb cengtayin, hoo soq pvvb soq gomcwr tulu sam hengab jaqb nyito,

¹³‍No Jordonam rablayil gumn naatanam gvdaho no hog hwdgo dood deedib hoo bulug cengma bo ko tulungam ham talayil hoo noqg Pwnbo At Swn bos mvto.”

¹⁴‍Hoo At Sw Mojesnvn benum, “Kaato, noqg sig moodv hvvnwq duku. Josuanvn goqa to hoo kvvrwq minsko tombu ho no atv boolwqto, ho ngo mwam kanam nvmlwq tayin.” Hoo Mojes la Josua bunyiv kvvrwq minsko tombub wnum hoo bunyiv atv atam hoqho jipaq kunum.

¹⁵‍Hoo At Sw tombu ho doomwq piuar gob nyinv daqlinum. Hoo doomwq piuarv tombug haagaho doqdul doonum.

¹⁶‍Hoo At Sw Mojesnvn benum, “Kaato, noqg ab tulug lvgab no doonu tadkun. Ho soq nyiilu si swwrab layil bulug hoodu ko gvda uraho bulug pengko ho doonbo asaq pwnbo kokwb wmin gvl xumtayin, hoo bulv ngam haqpaq tayin hoo ngoqg bulam birnam pvvbam bulv mvpia tayin.

¹⁷‍Ho hoq aalam ngo bulam haaxaq tayin, hoo ngo bulam haqpaq tayin hoo ngoqg nyuqm mam bulug hoqgv kvs tayin, hoo bulv twrtayin. Hoo almanv la vs-axaqkv naleqgo bulug aoho haatayin, ho bulv hoq aalam betayin, ‘Soq alman tulu si ngulug aoso haanam si hvbnyiloqkam ngulug Pwnbov ngulug pengko so dooma gab nyima sui yv?’

¹⁸‍Hoo bulv alman hog mwlwngam nyigam gab hoq aalam ngoqg nyuqm mam ngo hoggub nyijaqkam kvs tayin, hoggab bulv asaq pwnbo lvgab wknv bulam xumpa ku.

¹⁹“Hoqgab sija soq bemin sam xeqto hoo ham Israelwg nyiilungam tomswr to. Bulug agam ho soq bemin tulu sam bemto, ho soq bemin tulu si Israelwg nyiilungam ngoqg hvvky gob ceeko tayin.

²⁰‍Hoggab bulug ab tulungam ngo jidwb dingr kunam wtw lyuminko la ngola biqminko gvdaho ngo bulam boolwq pakun, hoo bulv dvdeq dvb dvtwl hoo dort dvb swwpa kun, bulv asaq pwnbo dookub wtayin hoo bulam xumtayin, hoo ngam haqpaq tayin hoo ngoqg birnam pvvbam mvpia tayin.

²¹‍Hoo hwdlo naleqgo almanv la vs-axaqkv bulug aoho haaikam, soq bemin si bulam hvvky gob nyil mwwpa mvtayin (hoggab hoqhv bulug ko tulug agam ho nywywngam mwwpaq lama dvb dootayin). Hoggab ngo bulam gvda jidwb dingrnam ho boolwq maatab, bulv hoggv nyidwb mwwdwn ngo soolo ham cengdo.”

²²‍Ho Mojes hoq aal daraho soq bemin sam xeqtwl hoo Israelwg nyiilungam tomswrnum.

²³‍Hoo At Sw Nunwg ko tuup Josuanvn gaml ator jil hoo benum, “Atorto hoo haakam to, hoggab ngo bulam jidwb dingrnam gvdaho no Israelwg nyiilungam boolwq tayin. Ngo noqg lvgab dooba dvn.”

²⁴‍Hwdlo Mojes soq pvvb kitap soq gomcwr tulungam vtwr-anyab xeqnya yukho,

²⁵‍At Swg birnam pvvb uddum mam joon bo Lebi nyiilungam Mojes gaml jinum,

²⁶“Soq Pvvb Kitap sam naato hoo noqg Pwnbo At Sw birnam pvvb uddum bviywrho ham pvvto, ho hoqhv nam hvvky ceeko bo ak gob dootayin.

²⁷‍Hoggab no taleqbo bvla tamy bob nyiib nyinam mam ngo cengdo. Kaato, soolo kam ngo nulug lvgab swwl doojaqkam, nulv At Swn ceekol taleq bob nyipa ku. Ngoqg sixo kokwngam hog hwdgo nulv taleq bob nyis yuk yv!

²⁸‍Noqg nyob hoqg nyi nyiixangam hoo noqg saab tulungam mwlwngam ngoqgab goqkum to, ho ngo soq gomcwr tulu sam bulug nyuru ho betayin hoo bulam swcw-nyodongv ceekol hvvky swwm dvb jitayin.

²⁹‍Hoggab ngo cengdo ngoqg sixo kokwngam nulv hoggub nyijaqkam almanbo nyiwq-nyitongam nyitayin hoo ngo nulam gaml jinam lamtangam wxaq tayin. Hoo haata bo aalam almanv nulam yoqlwq tayin, hoggab nulv At Swg vnyiq kaagaho hoggv almadwn ham mwam hang nyiluql haaxaq mvdwb nulug alaqkv bonam nyitayin.”

³⁰‍Ho Mojes soq bemin gomcwr tulu sam Israel nyi tulug hookum bo nyuru ho tapa mvdwb, benya maad deedib agam benum: