Read Nyishi BETINAM PVVB 32 Bible Online

BETINAM PVVB 32 - Nyishi bible

BETINAM PVVB 32

¹“Doangv tagab yaato, hoo ngo agam gootayin, hoo ngoqg agam gomcwr sam swcwngv tato.

²Ngoqg tomswrnam sam doody hvb dil mvto, ngoqg agam goonam sam gums caanam hvb nyimto, nyodo jaajangv nwmw vjw boam jaaiyaqnam hvb nyimto, hoo nwsin-nwmwngam nyodo jaabamnam hvb nyimto.

³Hoggab ngo At Swg eminho pui baqtayin; ngulug Pwnbog koinam mam xwwmin tayin!

⁴“Mwv lwwnv, mwwg bonam nyinamv jot kvl dvn, hoggab mwwg lamta mwlwngv jvqtw dvn. Mwv dengky bo bvla nyixiaq dooma bo Pwnbov, jvqtw ngvla lootwngv mwv.

⁵Bulv mwwg lvgab nyiwq-nyito paku; bulv mwwg koob nyikma hoggab bulv un-tar gvpa ku; bulv nyic bvl nyic-nyiya bo hotam gob nyipa ku.

⁶Paca bvla mwwlaq maanbo nyiilungv nulv, nulv At Swn soq sib jikurl jig yin yv? mwv noqg ab maai yv, hiyv nam pwnum, hiyv nam pwnum hoo nam swwm dvb mvknum?

⁷Kolwg aal tulungam mwwpa to; hotam-hotamb swwnam mam mwwka to; noqg abam tox to, hoo mwv nam kaakin tayin, noqg vbw tulungam tox to, hoo bulv nam betayin.

⁸Hwdlo mwlwngam koi yaanbo Pwnbov bulug nyob tulungam otu jinum, hwdlo mwv nyia koam mvpin-mvra yukho, mwv nyiilug gvda vrram mwrnum Pwnbog ko tuup tulug dvpar part-parnyongam kaalayil jinum.

⁹Hvbmabde At Swg otungv mwwg nyiilungv, Jakub mwwg xuqlin kunam otungv.

¹⁰“Mwv mwam diixa-rara gvdaho, hoo hog swwmab dooi yixin-yinin ko deexa-raraho kaapanum; mwv mwam gooyumnum, hoo mwam mwv kvvyw-tadanum, mwv mwam mwwg vnyiqho tuugabnam akgob pvvknum.

¹¹Xookam akv osup hoqgv jarab tayam, hoqg osup hoqg koam lobyumnam hvb, hoqg alapv lvbjin layil bulam nootu dvn, ho bulam nootul baql wg dvn,

¹²At Sw aro mwam koocumnum, asaq nyoodo pwnbo mwwg lvgab doomanum.

¹³Mwv mwam nyook aobo gvdaho xarl wwm dvb mvnum, hoo mwv rongo hoqg lengn boam dvnum, hoo mwv wlw hoqg tong ngolangam mwam biumnum, hoo wlw lwwtaqho olib svvnam naleqgo swwmnum.

¹⁴Svv hoqgv doxingam, hoo sviya hoqgv gwwiyam twwmin mvdwb jinum, Basan ho jwwtw bo sviya koam, yaap tvmwr tulu ngamla sibin tulungam somin mvnum, ho hikatala bo wtw am mam— hoo roo ala twwngam alboam no twwminum.

¹⁵“Hvbmabde Jesurun ox xupiabl swwnum, hoo dupaqnum; no ox xupiab dvb, vgwl dort dvb, hoo bumba mvla dvb swwnum; ho hiyv mwam hvb swwm dvb mvnbo Pwnboam mwv haqpaqnum hoo mwwg ywwlin bo Lwwnam bej-beparnum.

¹⁶Bulv mwam kaaneql hang raarab dvb asaq pwnboam xumnum; bulum-kac dvb bulv mwam hang nyiluql haaxaq mvnum.

¹⁷Bulv sony ui jvqtw pwnbo maanam, ho bulv nywywngam cengmanam pwnbo tulungam, ho oyu yoomab nitib haanbo pwnbo tulungam, hiyam nulug ab tulungv nywywngam bos maanam mam pwr jinum.

¹⁸Nam swwm dvb jinbo Lwwn akam no mwwpa maanum, hoo hiyv nam ko bwwn bo Pwnboam no mwwpa kuma.

¹⁹“At Sw ham kaatwl hoo bulam haqpaqnum, hoggab mwwg ko tuup tulungv la mwwg nyem kov hang nyiluq paku.

²⁰Hoo mwv benum, ‘Ngoqg nyuqm mam bulug hoqgv kvs tayin; ngo bulug vtwr-anyangam kaaya tayin, Hoggab bulv nyic-nyiya hotam goku, hiyvg ko tulungv akkam mwwjw dvb nyima dukun.

²¹Bulv pwnbo maanam xumnv ngam kaaneq dvb mvpa ku; bulug murty xumnam lvgab bulv ngam hang kaaneql haaxaq dvb mvpa ku. Hoqgab nyiilu maanbo nyob asaqkam kaaneq mvdwb ngo bulam mvtayin. Paca bo nyob akam bulam haaxaq mvdwb ngo bulam mvtan.

²²Hoggab ngoqg haaxaqnam hoqgv wm mam rwgab gvikun, hoo hoqhv Sux-ywlw ura namgub gulwq tayin, swcwngam la hoqg ho swwn boam guiyum tayin, hoo puutu tulug gwwlam wm tolwq tayin.

²³“‘Hoo ngo bulug aoho ciqcaq-bviyaqnam tulungam paal aptayin; ngoqg uppuqkam bulug aoho vblwq tayin;

²⁴bulv kano lvgab yuupaq tayin, hoo nyoqsiqbo vc-aiyv dvmeqnum hoo cumdwqbo dooi-palamv haatayin; bulam ceekol soogam gam dvb ngo svdin tulungam kanam tayin, ho cumdwq gvnbo tvb tulungam bulam cem dvb kanam tayin.

²⁵Lvvgho yvnboam lyoqr orioq lvgab sim tayin, hoo nam uraho doon boam bos sol, yaapa jaqkam hoo nyijwr jaqkam, gwwi twwdu bo ko jaqkam hoo dum dumpu nyi jaqkam sim tayin.

²⁶Ngo hvl bepa kun pv, “Ngo bulam vmwq yumgub twqmwq tayin; nyia ko hoolu hoqgv bulam mwwpa mvk maadwb ngo tipaq tayin,”

²⁷ngo ceebio tulug hang nyiluqnam mam bos mvma dvb mvmanam yv, hvb nyima loqkam bulug ceebio tulungv oksub mwwtanum, hvb nyima nyiloqkam nyiilungv hvl betanum, “Ngulug alaqkv mviya pakun, soq mwlw sam At Sw nyimanum.” ’

²⁸“Hoggab bulv tomswr-hony bo nyob hoolu gob nyimanam, bulug pengko ho cenglaqbo doomanum.

²⁹Bulug pengko ho mwwlaqbo doonyi loqkam, bulv soq sam cenglaq subco; bulug haata bo pagoqkam bulv mwwlaq subco!

³⁰Hoggub akinv lwwyw akam ruqmin gviyin dviyv, hoo vnyiv lwwyw camg kem dvb mviyin dviyv, bulug Lwwnv bulam puqpaq manyiloqkam, hoo At Sw bulam jipaq paku?

³¹Hoggab bulug lwwn hv ngulug Lwwn hvb nyima dvn; bulv atv atv ngulug ceebio tulu gob nyidwn.

³²Hoggab bulug roo annv Sodom hoqgv nvvsiqnamv hoo Gomorrag rongo hoqgv nvvsiqnamv; bulug roo aaxiv cumdwq doonbo roo aaxiv; bulug roo opiumv kacaqbo roo opiumv;

³³bulug roo alangv tvb cumdwqkv hoo borta cumdwq hvb nyidwn.

³⁴“ ‘Soq tulu sam noqg noosu ho pvvcuml ap maap nvi yv, ngoqg gumn noosu ho morx tubl ap maap nvi yv?

³⁵Ree daqnam mvla laqm-baqmnamv ngoqgv, hoggab bulug duleql giqd moodv haatayin; ho bulug dwr-kano aalv alaqhv hvvnwq duku, hoo bulug sid moodv nyebia jaqb haadku.’

³⁶Hoggab At Sw mwwg nyiilungam ywwlin tayin hoo mwwg nyera tulug aoho aya mwwpa tayin, hwdlo bulug huqlwngam mwv wleq dvb kaapa yin hoo hoqho danyi doon ge ho pagy doon ge akkam dookram.

³⁷Ho mwv betayin, ‘Bulug pwnbov hoglo yu, hogloq lwwn ho bulv cwwgwl dvqgwnam ak hv,

³⁸hiyv bulug ox xupiab boam pwr jinam mam dvnbov hoo bulug twws aky jinam ham twwn bov? Bulam gorab gvdwl nulam svka koto; bulam nulug ceetornan gob nyim to!

³⁹“ ‘Sija kaato ngo, ngo aro, Pwnbov, hoo ngoqg lvvgho pwnbo asaq dooma dvn; ngo mengdwn hoo ngo swwm dvn; ngo un mvgdvl hoo ngo mwp dvn; hoo ngoqg alaq soqkam hiyv kam naalin nyoram.

⁴⁰Hoggab ngoqg alaqkam ngo doa aob ica dvn hoo ngo nwrba gob doonam xaqb dingr dvn,

⁴¹ngoqg kwlwq-kvlaqbo lyoqr orioqkam ngo pwreq baloqkam hoo ngoqg alaqkv pw-hwwnam mam naatayin, ngoqg ceebio tulungam ngo ree daqtayin hoo ngam oyum boam ngo laqm-baqm tayin.

⁴²Mengnam hijum mam la nyumwb boonam hijum mam, dum aasob baqn bo ceebiog dumpo hoqgv— ngoqg uppuqkam ngo hijum lvgab twwm tayin, hoo ngoqg lyoqr orioqkv vdin dvm tayin.

⁴³“Doa nga, mwwg lvgab hwnyir-hvmar to; mwlwg pwnbov mwam pvxwl xumto, hoggab mwv mwwg ko tulungam ree daqdwn hoo mwwg ceebio tulungam ree daqdwn. Mwam oyum boam mwv laqm-baqm dvn hoo mwwg nyiilug gvdangam mvxaq jidwn.”

⁴⁴‍Mojes haalayil soq bemin gomcwr mwlwngam nyiilungam tapa dvb goql betamnum, mwv la Nunwg ko tuup Josua bunyiv.

⁴⁵‍Hoo hwdlo Mojes soq gomcwr tulu sam Israel mwlwngam agam goonya yukho,

⁴⁶‍mwv bulam benum, “Ngo soolo nulam beo-belam gomcwr benam tulu sam noqg hvvjw lo nvvrwq to, ho hoq tulu ham nulv nulug ko tulungam gaml jisiq tayin, ho bulv soq pvvb gomcwr tulu sam hengab jaqb nyidwb nyitayin.

⁴⁷‍Hoggab soq si nulgab gomcwr asarbo ma, hoo nulv Jordonam rablayil gumn gob gvda naatanam ho soq gomcwr soqgv nulv swwiyul dootayin.”

⁴⁸‍Hoq aalho At Sw Mojesnvn agam goonum,

⁴⁹“Jeriko taqcgonwg, Moab gvdag Abarim la Nebo puutub cao to, hoo hogloq ham ngo Israelwg nyiilungam gumn gob jidynam mam, Kanaan gvdangam tuul kaaka to.

⁵⁰‍Hoo hogloq puutub cao tayin hoq aoho sitayin, hoo noqg nyiilungam goqkum to, noqg vbw Aaron Hor Puutu ho siyikho mwwg nyiilungam goqkumnam hvb goqkum to,

⁵¹‍hoggab Jin deexa-rarag Meriba-Kades iss ho Israelwg nyiilug pengko ho, ngo nam mwwjwnam mam mvpia kunum, hoo hoggab Israelwg nyiilug pengko ho no ngam dvrwqbo gob xik-paqk maanum.

⁵²‍Hoggab no gvdangam kootul no kvvtwq tayin, hvbmabde ngo Israelwg nyiilungam gvda jitanam ura alo no haanyi kuram.”