Read Nyishi BETINAM PVVB 33 Bible Online

BETINAM PVVB 33 - Nyishi bible

BETINAM PVVB 33

¹Soq si Pwnbo nyera Mojesg mwwg sima taab Israelwg nyiilug lvgab lvqc cinamv.

²‍Mwv benum, “At Sw Sinai hoqgv haanum hoo Seir hoqgv ngulug aoso haanum; mwv Paran Puutu hoqgv huto huulwq jinum; mwv cam lwwyw dvrwqbo ak hoqgv haanum, mwwg lvqbwq alaqho wm bioqn boam bwwnum.

³Vv, mwv mwwg nyiilungam abynum, dvrwqbo mwlwngv mwwg alaqho doonum; hoqgab bulv noqg dwqkap wmin gvnum; noqg galoqkv tomswrnam mam nvvrwq dvn,

⁴ho Mojes ngulam gaml jinum, Jakubg nyob tulungv hookum yukho gumn nvvsiq mvnum.

⁵Hwdlo nyiilungam nyigbo tulungv hookum yukho, ho Israelwg nyob mwlwngv lvkin gob hookum yukho, At Sw Jesurun ho lvpw atwb nyinum.

⁶“Reubennvn swwm to, hoo sim yo, hvbmabde mwwg nyi dvparam anyo mvto.”

⁷‍Hoo soq sam Judanvn benum: “At Swa, Judag yalam, tato, hoo mwwg nyiilu dookub mwam boa to. Noqg alaqkv mwam nyig paku, hoo mwwg ceebio tulungam ceeko mvdwb svkanum.”

⁸‍Hoo Lebinvn mwv benum, “Noqg Tummim mam Lebinvn jito, hoo noqg Urim mam noqg dvrwqbo akam jito, hiyam no Massa ho pookanum, hiyam no Meriba ho iss gab yolu dunum;

⁹hiyv mwwg ab-annam benum, ‘Ngo nulam modul swwram’; mwwg vbw-bor tulungam hoo mwwg ko tulungam mwv at gv mwwmanum. Hoggab bulv noqg gomcwr ramla hoo noqg birnam pvvbam pvvnum.

¹⁰Bulv Jakubnvn noqg pvvb tulungam hoo Israelam noqg pvvbam tomswr tayin; noqg otuqho bulv sulum mwwtayin hoo noqg yugw ho boyuqnam akiam partayin.

¹¹At Swa, mwwg dupum-dvrab pam lvqc cito, hoo mwwg alaqho bon nyinam mam loorwqto; sony nyot hvb nyinbo mwwg ceebio tulungam mwmwqto, hiyv mwam oyum dvn, ho bulv lokta gorab kuram.”

¹²‍Benjaminnvn mwv benum, “At Swg abynamv swrsob doon ka. Koibo Pwnbov mwwg swwnam bumpw ho gooyuml doog gvnka, hoo mwwg pengko ho doon ka.”

¹³‍Hoo Josapnvn mwv benum, “At Sw mwwg gvdangam lvqc cignvka, doa toloq mwlwngam xibin yaanam akiam, hoo swcw nvg niikum hoqg issam lvqc gvnka,

¹⁴doonyi xvvlwnam dvngam bo aaxiam hoo moodam kvxaqmab naleqgo aaxy xeem dvn,

¹⁵kolwg ab tulug puutungv mwlwngam alyanbov swwlin nvka hoo yorn tulungv kuiyum namgub naleqgo aaxy xeeminl doonka,

¹⁶ho gvdangv mwlwngam alyanbo lvqcam bwwr tvl dootayin hoo hoq nwmw-nwsin gvdaho doon boam mwv mwwsw tayin. Soq lvqc tulu si Josapg dvparam nyigbo aoho dootayin, mwwg vbw-bor tulug pengko ho mwam lvpw atwg ko tuup gob xuqpa kun.

¹⁷Svv hvvb bwwconam hvb—mwv ator dvn, hoo mwwg vrrwngv nyoro talin hvvb vrrw tulu hvb nyidwn; hoq lvgab mwv nyiilungam nwqdwn, bul mwlwngam, swcw nvg ywwtwr namgub nwqdwn; hoq tuluhv Iprayimg lwwyw camg, hoo Manasseg lwwyw gob atorl nyob palaqbo hvb nyidwn.”

¹⁸‍Hoo Jubulunam mwv benum, “Jubuluna, noqg lvvgwb wdu ko ho, hoo Issakarv, noqg tombu tuluho hwnyir-hvmar to.

¹⁹Bulv nyiilungam bulug puutu ho goqa tayin; hoqho bulv jvqtw pwram jitayin; hoggab bulv sa-svlo hoqgv naleqgo gumnam naalinum hoo xuqx uraho kvsil doonbo gumn uddum mam naalin paku.”

²⁰‍Hoo Gadnvn mwv benum, “Hiyv Gadwg gvdangam koi dvb mvnum mwv xinam jaqkv! Gad sony nyot ak hvb rintuml tooiya dvn; mwv al-alaqkam kotwr-kobwrl mvdwn.

²¹Mwv gvda albo jaqkam xuql atgab naadwn, hoggab nyigbo tulu gab pvvbwql ap jidwn; hoo mwv nyiilungam nyigbo lvgab haadwn, Israel lvgab mwv At Swg jvqtw pvvbam pal wg dvn, hoo Israel gab mwv pw-hwwdwn.”

²²‍Hoo Dannvn mwv benum, “Dan sony nyot ko hvb nyidwn ho mwv Basan hoqgv pojuq juqlin dvn.”

²³‍Hoo Naptalinvn mwv benum, “Naptalin nga, mwwswnam lvgab doonum, hoo At Swg lvqc cinamv bwwr tvl doonum, swnyiqkam la nyooko nyookam gumn doogdvn.”

²⁴‍Hoo Asernvn mwv benum, “Aserwg ko tuup tulungv mwlw jaqkam xibin yaanamv; mwwg vbw-boram mwam mwwsw mvto, hoo mwwg lvpiangam kuty uppumho mwam cobiuq mvto.

²⁵Noqg loqjumv yoqdwram la tamangam mvtayin, hoo noqg swwnam bumpwngv noqg ator gob nyitayin.

²⁶“Jesuruna, Pwnbo hvb asaq pwnbo akjijaqkam dooma dvn, nam svka dvb doangam xvryiqdvn, cwwnyiaq-doonyiaq mwlw tv noqg yuunamv.

²⁷Nwrba cwtam Pwnbov noqg doogw nyookv, hoo kuiyum xaqb mwwg alaqkv nam ura jaqb svka dvn. Hoo ceebiongam mwv noqg aga hoqgv ruqpaq dvn hoo twryum mvdwb gaml jidwn.

²⁸Ho Israelv swrsob doonum, dvs-twws naleqgo doomin ko gvdaho Jakub vp-cwkwb doonum, hiyvg nyookam doa toloq gumsiv iss jil doognum.

²⁹Hemp bongv no, Israela! Hiyv noq hvb nyidwn, At Sw ywwlinam nyiilungv, noqg svtam cwwgwngv, hoo noqg mviyanan lyoqr orioqkv! Noqg ceebio tulungv nam bumjo tvl xumtayin, hoo bulug gorbw aob no caataml wtayin.”