Read Nyishi BETINAM PVVB 4 Bible Online

BETINAM PVVB 4 - Nyishi bible

BETINAM PVVB 4

¹“Hoo sija Israela, ngo nulam gamlam la pvvb tulungam tomswrnam tulu sam tato, hoo hoq tulu ham nyito, ho nulv swwkam yin pv, hoo nulug ab tulug Pwnbo At Sw nulam jitanam gvdangam, nulv wgdvl gumn naato.

²‍Nulv ngoqg gaml jinam gomcwr tulungam vbw maabv, ho ham naapaq kamabv, ho ngo nulam gaml jinam nulug Pwnbo At Swg pvvb tulu ham nulv pvvl apto.

³‍Baal-peorho At Sw hoggv nyiknum ham nulug atwg vnyiqkv kaapa kun, hoggab nulug Pwnbo At Sw nulug pengko hoqgv hiyv Peorg Baalam xumn bo nyiilungam twrnum.

⁴‍Hvbmabde nulug Pwnbo At Swn hiyv bugil swwn bov soolo godab swwl doodwn.

⁵‍Kaato, ngoqg Pwnbo At Sw ngam gaml jiknam hvb, ngo nulam gamlam la pvvb tulungam tomswr pakun, ho nulv hoq tulu ham nulv haalayil gumn naata ko gvdaho nyil doodwb nyitayin.

⁶‍Hoq tulu ham pvvto hoo ham nyil swwto, hoggab hoqhv nulam pumb rwnam bvla nyiilug kaagaho nulam cenglaq mvtayin, ho hwdlo bulv hoq tulug gamlam taikam, bulv betayin, ‘Jvqtw jaqb soq koibo nyob hoolu si pumb rwnam bvla cenglaqbo nyiilu go hvtayin.’

⁷‍Hwdlo jaqkam ngulv mwam goqyikam ngulug Pwnbo At Sw ngulam tapanam hvb, hiyvg koibo nyob hoolug pwnbov doodwn?

⁸‍Hoo hog hwdgo nyob hoolungv koi sujaqkam, ngo soolo nulam jvqtw bo gamlam la pvvb tulungam nulug agaho jinam hvb hiyvg koibo nyob hoolungv doodwn?

⁹“Hengab twqto, hoo noqg yvjam hingky jaqb pvvto, hvb nyima baloqkam noqg vnyiq kaanam mam no mwwpa maab nyita yi, hoo hoq tuluhv noqg hang hoggv noqg swwnam bumpw ho wleq tai yi. Hoq tulu ham noqg ko tulungam hoo noqg koog kongam cengm to—

¹⁰‍noqg Pwnbo At Swg agaho Horeb ho noqg daqa tai yik aalho, At Sw ngam benum, ‘Nyiilungam ngam goqkum tvb, ho ngo bulam ngoqg gomcwr tulungam tam tayin, ho bulv swcw nvg aoso swwl doody deedib ngam bos tayin, hoo bulv bulug ko tulungam kam tomswr tayin.’

¹¹‍Hoo puutungam wm hoqgv gul ao gvda hangam gul, doomwq hwrl hoo kanwb nyil kan putum yukho, no puutu lvggap ho haal daqnum.

¹²‍Ho At Sw nulam wm pengko hoqgv agam goolinum. Nulv gomcwr yalam tapanum, hvbmabde nyiip apo kaapa maanum; hoqho yal rooxongam tapanum.

¹³‍Hoo mwv mwwg birnam mam pvvbam nulam bibwqnum, ho mwv nulam hoqham nyil swwm dvb gaml jinum, hoqhv Pvvb Wywngv, hoo mwv hoq tulu ham wlw lwpia tvqnyi aoho xeqpnum.

¹⁴‍Hoo At Sw nulam gamlam la pvvb tulungam tomswr mvdwb hoq moodho ngam gaml jinum, ho hwdlo nulv gvdangam haalayil gumn naaikun nulv hoq tulu ham nyil swwtayin.

¹⁵“Hoqgab nulv atv atam hengab jaqto. Hoggab Horeb ho hwdlo At Sw nulam wm pengko hoqgv agam gooyikho nulv nyiip apo kaapa maanum,

¹⁶‍hengab to, hvbmab nyiloqkam nulv nulug atgab hog guss ak lokam nyega hvb maalo nyem hvb nyimur nyil murty pwdwb nyitwq to,

¹⁷‍swcw nvg aoso svdin tulu hvb, doa aog pvta jarnbo tulu hvb,

¹⁸‍deela ho ngaml yvnbo topum-yorup hvb, iss uraho doonbo ngui tulu hvb murty pwtwq to.

¹⁹‍Hoo hengab to, hvbmab nyiloqkam no doa aob noqg vnyiqkv koodul, hoo hwdlo doonyiam kaapa yin, hoo poolam hoo takar tulungam, doa ao tol doon boam kaapa yin, nam lokam hoq tuluhv booxar tai yin, hoo hoq tulu ham xuml bul gab bon nyidwb nyikam yin pv, hog tuluhv nulug Pwnbo At Sw doa nvg niikum so doonbo nyiilu mwlw gab doom dvb jiknamv.

²⁰‍Hvbmabde At Sw nulam Ijipt hoqg dvvcw xvwr jwr-jwr ko hoqgv mwwg atwg gumn nyiilu gob nyim dvb, soolo soq sib nulam boolin pakun.

²¹‍Hoq aoho, nulug pagoq gab At Sw ngam haaxaqnum, hoo mwv ngam Jordonam ram mvmab dingr kunum, hoo nulug Pwnbo At Sw nulam albo gvdangam gumn jitanam ham ngam haam kumanum.

²²‍Hoggab ngo soqg gvda so sidwb nyipa ku; ngo hoggub nyijaqkam Jordonb rabnyi kuram. Hvbmabde nulv hoqg albo gvda ham rabol gumn naatayin.

²³‍Hengab to, hvb nyima baloqkam nulug Pwnbo At Sw nulug lvgab birnam pvvbam nulv mwwpa maab nyita yi, hoo nulug Pwnbo At Sw nulam nyima bvk hvnam mam nulv guss ak mwtwqto.

²⁴‍Hoggab nulug Pwnbo At Sw wm hvb lyomeq bov, kaaneqbo Pwnbov.

²⁵“Hwdlo no ko dool abwb la koog ko hosiqkv dooikun, hoo gvdaho akam dvb swwikun, nulv hog guss ak mvbnyiloqkam, hoo nulug Pwnbo At Swg vnyiq kaagaho hoggv almadwn ham nyib nyiloqkam, hoo mwam haaxaq dvb nyiluq baloqkam,

²⁶‍ngo soolo nulam hvvky kaaya mvdwb doangam la swcwngam goqdwn, ho nulv Jordonb rablayil gumn naanam gvda hoqgv nulam twryum tayin. Nulv hoqho oyu go dookram, hvbmabde twrkub twryum tayin.

²⁷‍Hoo At Sw nulam nyiilug pengko ho cwrsaq twqb mvtayin, hoo hogloq ho At Sw nulam cwrsaq twqb ruql mvk nyob tulug pengko ho nulv jaqnyo nyi gob nyitayin.

²⁸‍Hoo kaapa maanbo, ho tapa maanbo, ho dvma bo, ho suupa maanbo nyia kog alaq hoqgv pwnam mam nulv svvda ngamla wlwngam pwnbob xumtayin.

²⁹‍Hvbmabde hoq hoqgv noqg Pwnbo At Swn no meegaq baloqkam hoo no meepa tayin, ho no mwam noqg hvvjw-hara lvgab la noqg yvj lvgab meegaq baloqkam meepa tayin.

³⁰‍Hwdlo no vs-axaq yin, hoo vs-axaq tulu si noqg aoho kokw moodam haaikam, noqg Pwnbo At Swg dookub no wkur tayin hoo mwwg yalam tvjw tayin.

³¹‍Hoggab noqg Pwnbo At Sw aya mwwpa bo Pwnbov. Mwv nam apaqram, ho nam sim dvb jiram ho noqg ab tulungam mwv bulam dingrwl birnam pvvbam mwwpa maab nyiram.

³²“Hoggab Pwnbov nyia koam swcw nvg aoso pwnam aal hoggv naalayil, nam ko bwwma tai yikho doonbo otuqg aalam sija tox to, hoo doa nvg ywwtwr taqcgon hoqgv taqcgon nagub tox to, soq sib koibo pagoq nyinam ak doon mvi yv ho nywywngam tapanam yv.

³³‍Nyiilungv wm pengko hoqgv pwnbog agam goonam yalam takanam yv, no hoggub tapa peel hoo sija godab swwl doonam hvb dood nvi yv?

³⁴‍Ho hiyv pwnbov asaq nyob hoolu pengko ho wlayil hentwr hemlayil, koox dvb nyilayil, swrdorxeq nyilayil, hoo nyob palayil, alaq ator jaqb nyilayil hoo laqpo ator layil, hoo koi jaqb bos dvb bon nyilayil, mwv atv nyob hoolungam naalin layil nyob ak gob mvknum, soq mwlw sam nulug Pwnbo At Sw nulug vnyiq kaagaho nulam Ijipt ho nyij maan mvi yv?

³⁵‍Nam soq sam kaakin kunum, ho no cengknum At Sw Pwnbov hvl; mwwg lvvgho asaq dooma dvn.

³⁶‍Doa ao hoqgv mwv nam mwwg yalam tapa mvnam, ho mwv nam gwrnyiaq dvb mwwnum. Hoo swcw nvg aoho nam mwwg koibo wm mam kaapa mvnum, hoo no mwwg gomcwram wm pengko hoqgv goonam mam no tapanum.

³⁷‍Hoggab mwv noqg ab tulungam aby ko-gab hoo bulug kokw ho bulug ko hosiqkam daalinum hoo mwwg koibo ator hoqgv nam Ijipt hoqgv mwv atv doobal boolinum,

³⁸‍ho nam boolwql bulug gvdangam otu nvvsiq mvdwb, nam koi yaan boam la ator yaan boam noqg aga hoqgv soolo aal namgub ruqpaqnum,

³⁹‍hoqgab soolo cengto, hoo noqg hang ho pvvl apto, At Sw Pwnbov doa nvg aongam hoo swcw nvg niikum mam koi yaadwn; mwwg lvvgho asaq dooma dvn.

⁴⁰‍Hoqgab ngo soolo nam gaml jinam ham, no mwwg pvvbam la mwwg gamlam pvvtayin, ho hoqhv noqg lvgab aljaqb nyil dooi nvpv hoo noqg kokwb noqg ko tulungv al yin pv, hoo noqg Pwnbo At Sw nam kol xaqgob noqgab doom dvb jinam gvda uraho noqg swwnam aalam nam swwiyu mvdwb jitayin.”

⁴¹‍Ho Jordonwg dou-cagaho Mojes bopam oum go xuqbwql pvvnum,

⁴²‍hiyv lajaqkam mwwg door-doopwngam ceebio doomab haqmapaq golo mengb nyiloqkam, nyi mengbo hv hoqb ketayin; ho mwv hoqg bopam ak gonho kilwq tai hoo mwwg swwgam ywwtayin:

⁴³‍Reuben nyi tulu gab Bejar deexa-rarag haapa bopam mam, Gad nyi tulu gab Gilead urag Ramot bopam mam, hoo Manasse nyi tulu gab Basan urag Golan bopam mam pvvtayin.

⁴⁴‍Mojes soq pvvb tulu sam Israelwg nyiilu agaho mvl apnum.

⁴⁵‍Hwdlo Israel nyiilungv Ijipt hoqgv bulv lengd kukho, Mojes soq swwi-swwca tulu sam, gaml tulu sam, hoo pvvb tulu sam agam goonum,

⁴⁶‍Jordon otuqg taqcgonwg Bet-peor lywpa ho, hiyam Mojes la Israel nyiilungv hwdlo Ijipt hoqgv lenglayil Amor nyi tulug lvpw at Sihonnvn Hesbon gvdaho doon boam nyob pal mviya yuk ho agam goonum.

⁴⁷‍Hoo bulv mwwg gvdangam la Basanwg lvpw at Ogwg gvdangam gumn naanum, soq Amor lvpw at vnyig Jordonwg dou-caga otuqho doonbo gvdangam;

⁴⁸‍ho Arnon lywpag gamb bviywrg Aroyer hoqgv Sirion Puutu namgub (hoqhv Hermon namgub),

⁴⁹‍Jordonwg dou-caga Araba lywpa lvgab Araba sa-svlo namgub, ho Pisga puutu yorn lvggap namgub gvdangam gumn naaknum.