Read Nyishi BETINAM PVVB 5 Bible Online

BETINAM PVVB 5 - Nyishi bible

BETINAM PVVB 5

¹Hoo Mojes Israel nyi mwlwngam dvgoq goqkumnum hoo bulam benum, “Israel nyi tulunga, ngo soolo nulam tapa dvb gaml tulungam la pvvb tulungam agam benam sam tato, hoo nulv hoq tulu ham ceng dvl hoo hoq tulu ham hingky jaqb nyito.

²‍Ngulug Pwnbo At Sw ngulug lvgab Horeb ho birnam pvvb ak mvknum.

³‍Nulug ab tulu rooxongam At Sw soq birnam pvvb sam mvmanum, hvbmabde soolog soq swwl ngulug lvgab doonbo bvkam pvvb mvknum.

⁴‍At Sw nyuqtuq-moorv kvvrwql nulam wm pengko hoqgv puutu ho agam goonum,

⁵‍hoq moodho ngo At Swg gomcwram nulam bibwq jidwb, At Sw gvla nulug pengko ho daqnum. Hoggab nulv wm mam bosnum, hoo nulv puutu aob cao maanum. Mwv benum:

⁶“‘Ngo noqg Pwnbo At Swngv, hiyv nam nyera-paqnwb swwk namlo, Ijipt gvda hoqgv boolin kunum.

⁷“‘Ngoqg lvvgho no asaq pwnbo tulungam doog maabv.

⁸“‘Doa nvg niikum so, ho swcw nvg aoso, swcw nvg niikumg iss ura bolo, no noqg atgab hog ak kvvyw-tac dvb guss pwmabv.

⁹‍No bulug agaho pvxwl xumabv ho bul gab bon nyimabv; hoggab noqg Pwnbo At Sw kaaneqbo Pwnbov, hiyv ngam ceebio baqdwn hoo ab tulug nyimurnam mam ngo ko hotam tommum tvmpy namgub laqm-baqm dvn,

¹⁰‍hvbmabde hiyv ngam aby boam hoo ngoqg gaml tulungam pvvn boam lwwyw-lwwyw gob abiam kaakin kindu dvn.

¹¹“‘No noqg Pwnbo At Swg eminam besam-beyam ben maabv, hoggab hiyv mwwg eminam besam-beyam benboam, At Sw hoq nyi ham nyixiaq dooma hvl beram.

¹²“‘Noqg Pwnbo At Sw nam gaml jinam hvb, At Swg Doonu aalam mwwgabl, dvrwq dvb pvvto.

¹³‍Aal loox go no bonam nyitayin, hoo noqg nyis mwlwngam nyito

¹⁴‍hvbmabde kvn aalv noqg Pwnbo At Swg Doonu Aalv. Hoq aalam no bonam akkam nyimab, hvbkalam no ho noqg ko tuupv, ho noqg nyem kongv, ho noqg nyerangv hoo noqg paqnv, ho noqg svv hvvbv ho noqg svdamv ho hoqg tuun-meengv, ho noqg toggoq tulug uraho dooba bo nyoodo nyiingam, ho noqg nyerangam hoo paqnam bulam doonu mvto.

¹⁵‍No Ijipt gvdaho nyerab swwl doonam mam no mwwpa tayin, hoo noqg Pwnbo At Sw nam mwwg alaq ator hoqgv hoo laqpo ator layil nam naalinum. Hoqgab Doonu Aalam hingky jaqb pvvm dvb noqg Pwnbo At Sw nam gaml jipa kun.

¹⁶“‘Noqg ann-abam modul swwto, ho noqg Pwnbo At Sw nam gaml jinam hvb, ho no swwiyu tayin, hoo noqg Pwnbo At Sw nam swwm dvb jinamv gvda so no aljaqb swwtayin.

¹⁷“‘No nyi mengmab.

¹⁸“‘Hoo no atwg nywxw-nyolam bwwxin maab.

¹⁹“‘Hoo no dvco comab.

²⁰“‘Noqg door-doopwngam no xaalyo hvvky jimab.

²¹“‘Noqg door-doopwg nywxwngam, kaaby maabv. Hoo noqg door-doopwg nammam, mwwg rongongam, ho mwwg nyerangam, ho paqnam, mwwg svv hvvbam, ho mwwg svdam mam, ho noqg door-doopwg doognam dupum-dvrab pam kaaby maabv.”

²²‍Soq gomcwr tulu sam At Sw nulam puutu ho wm pengko hoqgv, doomwq hoqgv, hoo muqya opum kan hoqgv tadar pvla dvb yalam dulin jinum; hoo mwv hoq lvvgho asaq vbw maanum. Hoo mwv hoq tulu ham wlw lwpia tvqnyi ho bulam xiqlwq tvl hoo ham ngam jinum.

²³‍Hoo puutu ho wmv gudul doonum, ho nulv muqya-opum kan hoqgv yalam tapa kalam twqda, nulug nyob hoolu hoqgv peelo bo tulu ngvla nulug nyi nyiixa tulungv, nulv ngoqg ogumb haanum.

²⁴‍Hoo nulv benum, ‘Kaato, ngulug Pwnbo At Sw mwwg yuunam mam la koinam mam kaakinum, hoo ngulv mwwg yalam wm pengko hoqgv tapanum. Soolo aal so ngulv kaapa paku, Pwnbog lvgab agam goorwqbo nyiv soolo godab swwl doodo.

²⁵‍Hoqgab sija ngulv hoggab sitayin? Hoggab soq koibo wm si ngulam guxtai. Ngulug Pwnbo At Swg yalam ngulv lwgta tapa kubnyiloqkam, ngulv sitayin.

²⁶‍Hoggab swwl doonbo Pwnbog wm pengko hoqgv agam goonam mam tapa bo nyia kov ngulug soolo godab swwl doonam hvb hiyv doodwn?

²⁷‍Ogumb hvvnwq gvdwl ngulug Pwnbo At Swg benam mam tato hoo ngulug Pwnbo At Sw hog mwlwngam ngulam agam gootayin, hoo ngulv ham tapa tayin hoo ham nyitayin.’

²⁸“Hoo hwdlo nulv ngam agam gooikam, At Sw nulug gomcwram tapanum. Hoo At Sw ngam benum, ‘Bulv nam agam goonam mam, ngo soq nyiilug gomcwram tapa paku. Bulug agam goonam mwlw hv bulv kvtaq dvb goopa.

²⁹‍Oa bulv ngam bos dvb hoo ngoqg gaml tulungam pvvdwb, lwxiam soq mwwcib mwwky baloqkam, hoqhv bulug lvgab al tayin hoo bulug hotam mvkam nwrba gob al tayin!

³⁰‍Wg dvl hoo bulam beto, “Nulug tombub wkur tuku.”

³¹‍Hvbmabde no, so ngoqg lvgab daqto, hoo nam ngo hog mwlw gamlam hoo nyis-mvsam hoo pvvb tulungam nam betayin ho no ham bulam tomswr tayin, ho ngoqg bulam gumn naamdvb gvda jita ko ho bulv alwb nyil doog tayin.’

³²‍Hoqgab nulv nulug Pwnbo At Swg nulam gaml jinam mam hengab jaqb pvvtayin. Nulv lvqbwq bvkam ho laqc bvkam wkar-war maabv.

³³‍Nulug Pwnbo At Sw nulam gaml jik jaqb nulv lamtangam wdwb nyitayin, ho nulv swwtayin, hoo hoqhv nulug lvgab al tayin, ho nulug gumn naanam gvdaho nulv vigo swwiyul dootayin.