Read Nyishi BETINAM PVVB 6 Bible Online

BETINAM PVVB 6 - Nyishi bible

BETINAM PVVB 6

¹“Soq si gamlv, nyid sanamv hoo pvvb tulungv nulug Pwnbo At Sw ngam nulam tomswr mvdwb jinum, ho nulv wlayil gvdangam gumn gob naata namho, nulv soq tulu sam nyil swwdwb nyitayin,

²‍ho no la noqg ko tuupv hoo noqg ko tuupwg kongv, noqg Pwnbo At Swn no bos kamyi nvpv, ngo nam gaml jinam mwwg pvvbam la mwwg gamlam noqg swwnam bumpw ho pvvl doog tayin, hoo no gvda so swwiyul tayin.

³‍Hoqgab tato, Israela, hoo hoq tulu ham hengab jaqb nyil wto, ho hoqhv noqg lvgab altayin, hoo Pwnbo At Sw nulug ab tulungam dingr kunam wtw lyuminko hoo ngola biqminko gvdaho nulv dooi kukam, nulv naleq go dumtwq-miilyw tayin.

⁴“Tato, Israela: Ngulug Pwnbo At Sw, mwv At Sw akinv.

⁵‍Noqg Pwnbo At Swn noqg hang lvgab hoo noqg yvj lvgab hoo noqg ator lvgab no aby tayin.

⁶‍Hoo soq gomcwr tulu lvgab ngo nam ngo soolo gaml jinam sam noqg hang ho mwwgab laka.

⁷‍No soq tulu sam noqg ko tulungam hingky jaqb tomswr tayin, hoo hoq tulu ham no hwdlo noqg nam ho dooikam, hoo hwdlo no lamta ho wikam, hoo hwdlo no gel karyi kam, hoo hwdlo no gorab yukam hoq tulu ham gool dootayin.

⁸‍Hoq tulu ham noqg alaqho kaacin dvb rubtaql apto, hoo hoq tulu ham noqg vnyiq cinyig pengko tuqt ho doom tayin.

⁹‍Hoq tulu ham noqg namwg viyap swwrw ho hoo noqg toggoq tuluho xeql ap tayin.

¹⁰“Hoo hwdlo noqg Pwnbo At Sw nam, noqg ab tulu Abrahamnvn, Aisaknvn, hoo Jakubnvn gvda jidwb dingr kunam ura ho nam boolwql koibo la albo bopam mam noqg mvmanam tulungam nam jiyikam,

¹¹‍hoo noqg nvvlwq maanamv nam ho albo dupum-dvrabpv bwwr tvl dootayin, hoo no atv sokum hwwmanam hoqgv iss twwtayin, hoo roo boolu hoo no olib svvn liimanam hoqgv hwdlo no bwwr dvb dvl dooikam,

¹²‍ho no hengab to hvbmab nyiloqkam hiyv nam nyera-paqnwb swwk nam lo, Ijipt gvda hoqgv boolin bo, At Swn mwwpa maab nyidwb moodv doodo.

¹³‍Noqg Pwnbo At Swn no bos dvb nyitayin. No mwam bon nyij tayin hoo mwwg emin ho no dingtayin.

¹⁴‍Nulv asaq pwnbo tulug kokwb, ho nulug door-doopw nyiilug pwnbo lvgab wmin gvmabv,

¹⁵‍hoggab noqg Pwnbo At Sw noqg pengko ho doon bov kaaneqbo Pwnbov, hvb nyima baloqkam noqg Pwnbo At Swg haaxaqkv noqg aoho haatayin, hoo mwv nam swcw nvg aosoqgv twryum tayin.

¹⁶“Nulug Pwnbo At Swn, nulv Massa ho pookanam hvb pooka maabv.

¹⁷‍Nulug Pwnbo At Swg gaml tulungam, hoo mwwg nyiyi-nyicangam hoo mwwg pvvb tulungam mwv nulam gaml jiknam ham nulv hingky jaqb pvvl doog tayin.

¹⁸‍Hoo no At Swg vnyiq kaagaho hoggv jvqtw dvn hoo aldvn ham nyitayin, ho hoqhv noqg lvgab altayin, hoo noqg ab tulungam albo gvdangam jitayin hvl dingrnam gvdangam no haal gumn naatayin

¹⁹‍ho At Swg dingr ko jaqb, noqg ceebio tulungam no ruqpaq tayin.

²⁰“Kokwngam hwdlo noqg ko tulungv nam tox yin, ‘Hoggv yu soq swwi-swwca tulu sam hoo gaml tulu sam hoo pvvb tulu sam ngulug Pwnbo At Sw nam gaml jiknam niqtuqkv i?’

²¹‍ho noqg ko tulungam no betam tayin, ‘Ngulv Ijipt ho Parog nyera raasurb swwnum. Hoo ngulam Ijipt hoqgv At Swg alaq ator hoqgv boolin kunum.

²²‍Hoo At Sw nyimanam mam nyil hoo swrdorxeqkam kaakinum, ho koi bvla bos looda dvb Ijipt nyiilungam ceekonum, hoo Paro la mwwg imiq nyiilungam ngulug vnyiq kaagaho ceekonum.

²³‍Hoo mwv ngulam Ijipt hoqgv boolin kunum, ho mwv ngulam ngulug ab tulungam jidwb dingr kunam gvdaho boolwq dvb mwwnum.

²⁴‍Hoo ngulug Pwnbo At Swn bos mvdwb, ho lwxiam ngulug al gab, soq pvvb tulu sam At Sw ngulam nyim dvb gaml jinam, ho mwv ngulam soolo siib swwl doom dvb pvvl ap kamyi nvpv.

²⁵‍Hoo ngulv mwwg gaml jinam hvb ngulug Pwnbo At Swg gaml tulungam ngulv hingky jaqb nyil doog baloqkam, hoqhv ngulam dvrwq dvb mvtayin.’