Read Nyishi BETINAM PVVB 7 Bible Online

BETINAM PVVB 7 - Nyishi bible

BETINAM PVVB 7

¹“Noqg Pwnbo At Sw hwdlo no gvdangam haal gumn naata yuk ho, mwv noqg aga hoqgv naleqgo nyob hoolungam ruqpaq jinum, hoqhv Hittait nyi tulungam, Girgas nyi tulungam, Amor nyi tulungam, Kanaan nyi tulungam, Perijj nyi tulungam, Hibitait nyi tulungam, hoo Jebus nyi tulungam, nam atam nyob koi yaab la ator yaanbo nyob kvn go ruqpaqnum,

²‍hoo noqg Pwnbo At Sw hwdlo bulam nam jiyikam, hoo no bulam mviyanum, ho no bulam twrkiq twrmal twryum dvb nyiky dvn. No bulug lvgab birnam pvvb mvnyiram hoo bulam aya mwwpa maabv.

³‍No bulug lvgab nyem naako-naapeq maabv, noqg nyem koam bulug nyega ko gab nyem jimabv ho bulug nyem koam noqg nyega ko gab nyem naamabv,

⁴‍hoggab bulv noqg ko tulungam ngam wmin gvmab wxar gvlayil asaq pwnbo tulu gab bon nyim tayin. Ho At Sw nam haaxaql hang lengta yi, hoo mwv nulam nyebia jaqb twryum tai yi.

⁵‍Hvbmabde nulv bulam soq sib nyitayin: nulv bulug yugw tulungam hoo bulug murty swwrw tulungam vmwq gob mvtayin hoo bulug Aserim mam pageq lotayin hoo bulug guss mvnam tulu ham wm hoqgv parpaq tayin.

⁶“Hoggab no noqg Pwnbo At Sw gab dvrwqbo nyiilungv. Noqg Pwnbo At Sw nam swcw nvg nyi mwlw pengko soqgv, nam mwwg gumn otu nyiilu gob daalin pakun.

⁷‍Hoqhv nulv nyiilu asaqkam mvqlw yaagam gabma At Sw mwwg abynam mam nulug aoho doomwl hoo nulam daalinum, hvbmabde nulv nyiilu mwlw hoqgv nyob anyo yaan bob nyinum,

⁸‍hvbmabde At Sw nam aby ko-gab hoo nulug ab tulungam dingrwl birwl apnam gab, At Sw mwv nulam mwwg alaq ator hoqgv nulug nyera raasurb swwl dook namlo hoqgv Ijipt lvpw at Parog alaq hoqgv boolin pakun.

⁹‍Hoqgab noqg Pwnbo At Sw Pwnbov hvl no cengto, dengky bo Pwnbov birwl apnam mam biim mvma dvn hoo hiyv mwam aby dvn hoo mwwg gaml tulungam pvvdwn ham lwwyw-lwwyw hotam xaqb, mwwg tumab abynam mam kaakin dvn,

¹⁰‍hoo mwam oyum bo tulungam mwv ree daql bulam twryum dvn. Mwam oyum bo tulungam mwv laqm-baqm mvmab nyima dvn. Ho mwv nyet nyuqm mam ngonya nyuqm gob nyim tayin.

¹¹‍Hoqgab no gaml sam hengab jaqb nyil doog to hoo ngo soolo nam gamlam la pvvb tulungam tomswrl gaml jidwn.

¹²“Hoo nulv soq pvvb tulu sam tvjwl hoo pvvg dvl hoo nyito, noqg Pwnbo At Sw nam birwl apnam pvvbam pvvtayin hoo noqg ab tulungam dingr kunam tumab abynam mam jitayin.

¹³‍Mwv nam aby tayin, nam lvqc tayin, hoo nam dumtwq-miilyw mvtayin. Mwv nam hummum-ho tvl-rvl swwm tayin hoo noqg gvdangv aaxy-amaram xeem tayin, noqg rongongam hoo noqg roo alangam hoo noqg kutiam, noqg svv hvvtwngam hoo noqg sviya pvtwngam naleqgo swwm tayin, noqg ab tulungam mwv jidwb dingr kunam gvdaho haal dooikun.

¹⁴‍No nyiilu mwlwngam lvqc cibin yaanam gob nyitayin. Noqg pengko ho twrngum bo nyi akkam dooram ho noqg tuun-mee ngvkam twrngum ram.

¹⁵‍Hoo At Sw noqg dook hoqgv vc-ai mwlwngam aadob naapaq tayin, hoo noqg cengknum Ijipt hoqg almanbo dooi yv akkam nam nyoqsiq ram, hvbmabde hiyv nam oyu dvn hoq aoho hog mwlwngam mwv vlwq tayin.

¹⁶‍Hoo noqg Pwnbo At Sw nam jinam nyiilu mwlwngam no mingtwr tayin. Noqg vnyiqkv bulug aoho aya kaapa maabv, bulug pwnbo tulu gab bon nyimabv, hoggab hoqhv noqgab ceebiob nyitayin.

¹⁷“Noqg hang ho no hvl bed nyiloqkam, ‘Soq nyob tulu si ngam koi yaado. Hoggub ngo bulam ruqpaq nyotayin yu?’

¹⁸‍no bulam bos maabv hvbmabde noqg Pwnbo At Sw Paro nvla Ijipt nyi tulungam hoggv nyiknam ham mwwpa to,

¹⁹‍noqg vnyiqkv bulug hentwr henam mam kaanum, lomdwb luusaq jaqb nyinam mam, swrdorxeq nyinam mam, atorbo alaq bon nyinam mam, hoo noqg Pwnbo At Sw laqpo laqtor layil nam boolin kunum. Noqg bos sognam nyiilungam noqg Pwnbo At Sw hog mwlwngam nyil wgtayin.

²⁰‍Hoq aoho, noqg Pwnbo At Sw bulug pengko ho vc looda hentwr-kaasam kanam tayin, hwdlo no kvs bo tulu hamkam mingtwr maady deedib akkam apaqram.

²¹‍Bulam no bos maabv, hoggab noqg Pwnbo At Sw mwlwngam koi yaanbo, hoo swrdorxeqbo Pwnbov noqg pengko ho dooba dvn.

²²‍Noqg Pwnbo At Sw noqg lamtangam swrso dvb soq nyob tulu sam anyo-anyob mvl mvpaq tayin. No lvkin cwqnyi ho bulam mingtwr baloqkam, nyorog svdinv naleqgo nam ceeko dvb swwlin tai yi.

²³‍Hvbmabde noqg Pwnbo At Sw bulam nam jipa kun hoo hwdlo bulam twryum maady deedib, bulug pengko ho mwwdar-mwwpar mvma dvb koibo pagoq ak haanum.

²⁴‍Hoo mwv bulug lvpw atam noqg alaqho jilwq tayin, hoo bulug eminam no doa nvg niikum soqgv niipaq mvtayin. Bulam twryum maady deedib hiyv kam nam ceekol dvqrwq nyoram.

²⁵‍Bulug pwnbo tulug guss pwnam tulungam no wm lvgab parxa tayin. No bulug doognam rupam la hunam kaaby maabv, ho no atgab naamabv, hvb nyima baloqkam hoqhv nam pwd-poto gob nyitayin, hoggab hoqhv noqg Pwnbo At Sw gab bulum-kac dvb nyidwn.

²⁶‍Hoo noqg namho no bulum-kac dvb nyinbo dupum-dvrab pam bwa maabv hoo hoqhv nam lokam kvl jeeg tai yi. No hoq tulu hoqgv aado looda to hoo ham vcjaqb oyum to, hoggab hoqhv kvl jeeg deenbo pagoqkv.