Read Nyishi BETINAM PVVB 8 Bible Online

BETINAM PVVB 8 - Nyishi bible

BETINAM PVVB 8

¹“Ngo soolo nam gaml jinam gaml mwlw jaqkam nulv hengabl nyil doon tayin, ho nulv swwtayin hoo dumtwq miilyw tayin, hoo At Swg nulug ab tulungam jidwb dingr kunam gvdangam wl gumn naatayin.

²‍Hoo noqg Pwnbo At Sw nam soq vnyw campy so deexa-rara lamta mwlwho hoggub bool wg kunam ham no mwwpa dvb nyitayin, ho mwv nam yan mvdwb mvnum, ho no mwwg gaml tulungam pvvd nvi yv ma pvvma dvn yv, mwv noqg hangam cengdwb pookanum.

³‍Hoo mwv nam yan dvb mvnum hoo nam kano mvdwb jinum hoo no la noqg ab tulungv cengma dvb, nam manna lvgab hoonum, ho nyia kov wtw rooxongam dvl swwma dvn, hvbmabde At Swg agam hoqgv lengn bo gomcwr cwrx hoqgv nyia kov swwl doodwn hvl mwv nam cengm dvb mvnum.

⁴‍Soq vnyw campy so noqg vjv nyamanum hoo noqg lvpiangv goomanum.

⁵‍Noqg hangv cengto, nyia kov mwwg kongam gwrnyiaqnam hvb, noqg Pwnbo At Sw nam gwrnyiaqnum.

⁶‍Hoqgab mwwg lamtab wgdvl noqg Pwnbo At Swg gaml mwlw jaqkam no pvvtayin hoo mwam bos tayin.

⁷‍Hoggab noqg Pwnbo At Sw nam albo gvda urab boolwq tayin, hogloq gvda hv naleqgo pobungv, iss subuq buqlin bov, yorn hoola lywpa tuluho tominl doodwn,

⁸‍hoq gvdaho wtw amv la tanyeqkv, roo aaxiv la taoq svvn aaxiv hoo annar aaxiv naleqgo swwmin dvn, hoq gvdaho olib svvnv la ngolangv naleqgo doomin dvn,

⁹‍hoq gvdaho no dvs-twws xoomab dvminl dootayin, hoqho no hog akkam doomab nyiram, hoq gvdag wlw tulungv dvvcwb nyidwn, hoo yorn tulu hoqgv no tamangam dulinl naamin tayin.

¹⁰‍Hoo no dvdeq dvb dvminl dootayin, hoo no noqg Pwnbo At Swn nam gvda jigam gab no paql dootayin.

¹¹“Ngo nam soolo gaml jinam sam, no hengab to, hvb nyima baloqkam lokam noqg Pwnbo At Swn mwwpa maab nyil mwwg gaml tulungam la mwwg pvvb tulungam hoo mwwg nyiyi-nyicangam no mwwpa maab nyita yi,

¹²‍hwdlo no dvmin yin hoo naleqgo hog mwlwngam doog yin hoo albo nam mvl hoqho no dooikam,

¹³‍hoo hwdlo noqg svv tulungv hvvtw mvqlw yin hoo sviya tulungv naleq yin hoo noq rupv la hunv naleq yin hoo noqg doognam hog mwlwngv naleq-baceq yin,

¹⁴‍ho noqg hangv lartayin, hoo hiyv nam nyera raasurb swwk namlog Ijipt gvda hoqgv boolin boam, no noqg Pwnbo At Swn mwwpa maab nyita yi,

¹⁵‍hiyv nam koi jaqb la bos looda dvb nyinbo deexa-rarab, tvb-tapeq naleqko dookub hoo nywywngam iss cabg kam dooma ko gvdab, ho pwtw rwbw bo wlw hoqgv iss tolinlnam mam twwm tvl wg boam mwwpa maab nyita yi,

¹⁶‍nam deexa-raraho manna lvgab nam hoodeqnam mam, noqg ab tulungv cengmanum, ho nam kokwngam al mvdwb, mwv nam yan mvdwb mvnum, hoo nam pooka-yirka kunum.

¹⁷‍Hengab to, hvbmab nyiloqkam noqg hangv hvl beta yi, ‘Ngoqg gaml-ator rvla ngoqg alaq ator hoqgv ngo soq gumn nyet sam door tukum pakun.’

¹⁸‍Noqg Pwnbo At Swn no mwwpa tayin, hoggab mwv nam ator jitwl soqg gumn tulu sam nam door tukum mvpan, ho soolo aal namgub noqg ab tulungam mwwg dingr kunam pvvbam mwv nam pwbwb cengm pakun.

¹⁹‍Hoo noqg Pwnbo At Swn no mwwpa maab nyib nyiloqkam hoo asaq pwnbo tulug kokwb wb nyiloqkam hoo bulam bon nyijil hoo bulam xumb nyiloqkam, ngo nam soolo ruucw kwrgab dvb beo-belam gviyin no hoggub nyijaqkam niipaq tayin.

²⁰‍At Sw nyob asaqkam noqg vnyiq kaagaho niipaq mvnam hvb nam niipaq mvtayin, hoggab noqg Pwnbo At Swg yalam no tvjwl swwmanum.