Read Nyishi BETINAM PVVB 9 Bible Online

BETINAM PVVB 9 - Nyishi bible

BETINAM PVVB 9

¹“Israela, tato: soolo no Jordon kvtinb rabto, nam koi yaanbo hoo ator yaanbo nyob tulungam ruqpaqto, ho bulug sua go aob caadwb gurum nwqtumnam bopam tulungam naato,

²‍ho nyiilungv koi bvla ao dvn, Anakimwg ko tuup tulungam no cengdwn, hoo no tapa dvn, ‘Hiyv Anakwg ko tuup tulug agaho dvqrwq nyodwn?’

³‍Hoqgab no soolo cengto hiyv noqg otuqb wnbo noqg Pwnbo At Sw wm gunam hvb gudwn. Mwv bulam twrtayin hoo noqg kaagaho bulam munyiub tayin. Hoqgab no bulam ruqlin tayin hoo nam At Sw dingrnam hvb bulam nyebia jaqb sim tayin.

⁴“Bulam noqg Pwnbo At Sw noqg kaaga hoqgv ruqxa mvtwl, ‘Noqg hang ho hvl bemabv, ngoqg jvqtw dengkib nyigam gab At Sw ngam soq gvda sam gumn naam dvb boa pakun,’ hvb maas lak, hvbmabde soq nyob tulu si nyic-nyia gob nyigam gab At Sw bulam noqg kaagaho ruqpaq pakun.

⁵‍Noqg dvrwqb ho lootwb hang baqgam gab ma no bulug gvdangam gumn naata dvn, hvbmabde soq nyob tulug nyic-nyia nyigam gab noqg Pwnbo At Sw bulam noqg kaaga hoqgv ruqpaq pakun, hoo noqg ab tulu Abraham, Aisak, hoo Jakubnvn dingr kunam agam mam At Sw mwv biimab doom dvn.

⁶“Hoqgab, no cengto, noqg Pwnbo At Sw nam soq albo gvda sam noqg jvqtwb swwgam gab jima pan, hvbmabde no tamy bo nyiilub swwgam gab jipa kun.

⁷‍Mwwgab to hoo no mwwpa maab nyimab no hoggub deexa-raraho noqg Pwnbo At Swn hang lingtwr twrya dvb hang nyiluqnum. Ijipt gvda hoqgv nulv lengyik aal hoqgv jaq, sija soq gvda so haanam gob, nulv At Swn ceekol taleq paku.

⁸‍Nulv At Swn Horeb hookam hang lingtwr dvb hang nyiluqnum, hoo At Sw nulug lvgab haaxaqnv mwv nulam twryum tanum.

⁹‍Hwdlo ngo wlw lwpiangam naatab puutu aob caayikho, At Sw nulug lvgab birnam pvvbam lwpiangam jinum, ngo puutu aoho aal campy gola ai campy go doonum. Ho ngo wtw gokam dvma ho iss gokam twwma.

¹⁰‍Hoo Pwnbog lvqcw hoqgv xeqnam wlw lwpia tvqnyiam At Sw ngam jinum, hoo hoq wlw tvqnyi aoho At Swg nulam puutu aoho dookum yikho wm lvgab agam gomcwr goonam tulu ham xiqlwq kunum.

¹¹‍Hoo aal campy hoo ai campy kokw so At Sw wlw lwpia tvqnyi go, birnam pvvbam lwpia tulungam jiknum.

¹²‍Ho At Sw ngam benum, ‘Gorab gvdwl nyebia jaqb soqgv ipoq nuku, hoggab Ijipt hoqgv noqg boolin kunam nyiilungv nyic-nyiangam nyipa ku. Bulv nyebia jaqb ngoqg bulam gaml jinam hoqgv nyixiaq paku; Bulv bul gab dvvcw guss ak mvp paku.’

¹³“Hoq aoho, At Sw ngam benum, ‘Ngo soq nyi tulu sam kaapa kun, hoo kaato, soq nyiilu si tamy bo nyiilu go.

¹⁴‍Ngam vpwb apaq tvbv, ho ngo bulam twryum tayin hoo bulug eminam doa nvg niikum soqgv mvpaq tayin. Hoo ngo bulam koi sviya bvla ator yaadwb nyob dvpar lo ak mvtayin.’

¹⁵‍Ho ngo puutu hoqgv tobkur laikul nyebia jaqb ipoq kunum, hoo puutungv wm lvgab gudul doonum. Hoo birnam pvvb xiqlwqnam lwpia tvqnyiv ngoqg alaq lvqnyi ho doonum.

¹⁶‍Hoo ngo kaanum, hoo kaato, nulug Pwnbo At Swn nulv ceekol nyic nyiknum. Nulv nul atgab hun lvgab svv koam murty pwpa ku. Nulv nyebia jaqb At Sw nulam gaml jinam hoqgv nyixiaq paku.

¹⁷‍Hoqgab ngo lwpia tvqnyiam joorabnum hoo nulug vnyiq kaagaho ngo ham ngoqg alaq lvqnyiv joodub kunum.

¹⁸‍Ho ngo otuqg nyinam hvb At Swg agaho aal campy ho ai campy go bumjo tvl xumnum. Ho ngo wtw gokam dvma ho iss gokam twwmanum, hoqhv nul mwlwg nyic nyigam gab, hoq hv At Swg vnyiq kaagaho mwam hang lengl haaxaq dvb alman boam nyigam gab.

¹⁹‍Hoggab At Sw nulam ceekol hang lingtwr twryal haaxaq deenam mam ngo vcjaqb bosnum, hoggab mwv nulam twrdwb mwx-mvaq kunum. Hvbmabde hoq mood hookam At Sw ngoqg benam mam tanum.

²⁰‍Hoo At Sw Aaronnvn haaxaqnum hoo mwam mengdwb mwx-mvaq kunum. Hoo hoq mood hookam ngo Aaron gab swgwnum.

²¹‍Ho nulam nyic-nyia nyim bo nulug hun lvgab svv ko murty mvnam ham ngo naanum, hoo ham wm lvgab parnum hoo ham vmwq gob mvnum, hoo ham mui yumgub nyima deedib riqmwqnum. Hoo ngo muiyam naalayil puutu hoqg tolbo pobu tuluho topaq mvdwb tvvlwqnum.

²²“Nulv Tabera hookam, hoo Massa hoola Kibrot-hattaaba ho At Swn hang lingtwr dvb hang nyiluqnum.

²³‍Hoo hwdlo At Sw nulam Kades-barnea hoqgv wgdvl mwwg nulam jiknam gvdangam gumn naam dvb gaml jil wnwk hvl kanam yik ho,’ nulv nulug Pwnbo At Swg gaml jinam mam ceekol taleqnum hoo mwam mwwjw maanum ho mwwg yalam tvjw maanum.

²⁴‍Ngo nulam hwdlo aal hoqgv cengknum hoq aal hoqgv jaq nulv At Swn ceekol taleq paku.

²⁵“Hoqgab ngo At Swg agaho aal campy go ho ai campy go bumjo tvl mwam xumnum, hoggab At Sw benum, mwv nulam mingyum tayin hvl.

²⁶‍Hoo ngo At Swn swgwnum, ‘Pwnbo At Swa, noqg gumn otungam noqg koi jaqb bon nyil pvlyw kunam mam, hoo noqg atorbo alaq hoqgv Ijipt hoqgv boolin kunam, noqg nyiilungam twryum maabv.

²⁷‍Noqg nyera Abrahamnvn, Aisaknvn, hoo Jakubnvn mwwpa to. Soq nyiilug tamynam mam, bulug nyic-nyia nyinam mam, ho bulug nyic nyinam mam tuugabl kaamabv,

²⁸‍hvbmab nyiloqkam noqg ngulam boolin ko gvdangv betayi, “At Sw bulam mwv jitanvk hvl dingr kunam gvdaho boolwq nyokma, hoggab mwv bulam ceebio baqnum, bulam deexa-raraho mengdwb mwv bulam boolin kunum.”

²⁹‍Hoggab bulv noqg nyiilu ngvla noqg gumn otungv, hiyam noqg koibo ator hoqgv la noqg laqpo ator hoqgv no boolin kunamv.